a6.3Lm 13.1

Wis 6

Ngode Datagaliwabehanda agali haguane ti hangu hanguhondo biabe mo minigo ogo

Ai áyu agali haguane dindi bibahende ngaru handaya ho haga kemiru tígua i̱naga bi larogo hale halu manda bayale bi ogoni ngago mo yadaba. Tígua dindi dewaore handaya ho howa wali agali dewaore tí andaneha kagola tíni turu timbuni ho haga kemi. Anigo ai baya hangu hale hadaba. Ngode Datagaliwabe daligaore kago ibugua handaya ho howa haru holene hongo ogoni tínaga giha mo ya hene. Ani bialu biabe tígua birimigo damene mo tale biai haya. Ani buwa mani bulene tígua miniha yu kemigo handa walia hai haya. a  Ainde Ngode Datagaliwabe ibuni kini timbuniore kago howa ibugua biabe timbuni tíhondo mo ngiyago yu howa tígua mana tigabi ngago talialu bulene manda nabi haga kemi. Tígua Ngode Datagaliwabenaga mana ngagobi hame ledagobi talia nabi kemigoni. Ani bialu kemigonaga Ngode Datagaliwabehanda tí bo wahai holebira. Heneneore Ngode Datagaliwabehanda wali agali hongo timbuni yu karu pani timbuniore nelo miaga ka. Ibugua wali agali daga nawini karu dara halu tiha ko ngaru la nabi wahaga ka. Anigo agali haguane bu karu pani nelo miralo hendene timbuniore nelo mulebira. Ngode Datagaliwabe ibu Anduane Homogoore howa ibugua bibahende karubi ngarubi handaya ho hai howa mbiralihondo gi nahagaore ka. Mbirali ibu haguane handame haga heaguabi haguane ndo heaguabi gi nahaga ka. Ngode Datagaliwabe ibunime wali agali bibahende wabiai hene. Ibugua wali agali daga nalene bu karu wabialu wali agali mini lene karubi ibugua dege wabini. Ani bialu ibugua ti ogobi dege dege handaya ho haga. Ani howa wali agali mini lene hongohe karume bialu karu baya hanguore mo tale bulebira. Bi o laroruni i̱na agali timbuni kini kemiru tí lawai halu bi laro. Tígua hale howa mana bayale tigabi bulene ngago yu howa mana ko bulene ngago nabi wahai halimulo laro. 10 Tí kemiru aria mbirame Ngode Datagaliwabenaga mana ngago mana tigabi ngagoria howa talialu hayagua nde ogoni ibuni Ngode Datagaliwabenaga wali agali kagoha hatago ho holebira. Tí kemiru aria mbirame Ngode Datagaliwabenaga mana ngago baya hangu manda bu heagua nde ibu dabolene harangi ibu hongo howa heyu kagola ko birida lolene mbira ibuha nawulebira. 11 Ani bulebirago manda bialu bi i̱na tíhondo lawai harogo baya hangu gubalini ho holene nga. Ani beremigola tígua manda bayale ngago mo yu holeberemi.

Mini gigabi wulene ngago ibu baya gibiore mbira nga

12 Mini gigabi wulene ibu wáholene hale hongohe hundia nabiaga ale nga. Wali agalime ibu mo yule howaore taya bialu kago ibugua abale mo yulene erekui nabi ngagoria mo yulebira. 13 Mini gigabi ibuni wali agalime ibu gubalini howa taya bialu karuhondo abale mo walia haga ka. 14 Wali agali egerebagiore panga dugualu mini gigabi wulene taya bima pole tagira pialu karia ibuniore abale anda haneni ngola haga. 15 Wali agalibi mbirago ibu mamage howa mini gigabi wulene ogoni taya biyagua nde ogoni ibuha mini bayale wialu ibunaga miniha mo palia holene karulo holebira. 16 Mini gigabi wulene ogoni ibugua wali agali bayale karu taya bialu mbirali handa walia hayagua ogoni ibula baya hangu mandagi haga nga. Wali agali ti kagoria ta nabi howa ngola halu tihondo bayale biaga. Ani bialu tinaga mini ngago bibahendeha ngola hai haga. 17 Wali agali mini gigabi wulene mo yu hole hamelo heagua nde tigua ogoni mo yulenaga lo manda bulenego hameore lo kagome mo yaga. Wali agali ogoni mo yulenaga hongo howa lo manda bialu kago ibuha mini gigabi mini bayalebi ibaga. 18 Wali agali ibuhondo turu ho karume mana bayalebi mana tigabibi biaga ngagobi ogoninaga mana lo ngagobi mo walia harago talialu haga. Wali agali ti ogoninaga bi ledagobi mana ngagobi talialu haga ka. Wali agali mana uruni talialu kago ibu haabobo bu holene bayale ngago mo yu holebira. 19 Ai wali agali tinaga holene bayale mo yu heneru ti Ngode Datagaliwabela mandagi haabobo bu ka. 20 Anidagua biagago ai wali agali bibahende mini bayale mule hamelo karu ti mani Ngode Datagaliwabenaga handame howa haru holene ngagoria ti haguane holebira. 21 Ani biagago ai kini timbuni bu kemiru-o ainde tí tíninaga hongo timbuni ngemirubi yári baya ngamarubi gubalini ho hemiyagua nde tígua mbirale uruni baya hangu yu howa agali haguane haabo holenaga tí mini bayale wulene hongo howa yu dungu lo holene nga.

Solomono ibu mini gigabi wulenenaga biabe bulene henego ogo

22 Áyu i̱na tíhondo mini bayale ogoni ogoale lalubi ibu ogodagua tagira ibaga lalubi languliya. Ina bi mbira tihondo ya do naholebero. I̱na bi ogoninaga mbira tíhondo mo do naholebero. I̱na ibunaga biabe biaga ngago mo pana hai holebero. Ibunaga biabe ogoni pigane Ngode Datagaliwabe ibugua mbirale bibahende wabiniyangi howa biniya. Ai i̱na tíhondo ke̱ howa nalolebero. 23 I̱ wali agali mendenaga manda timbuni ngago hondowa dimagoli haga karu baba mandagi naholebero. Anidagua larogoni irane mini bayale ngago baba biamaga nahaga nga manda bialu naholebero. 24 Wali agali dewaoreme mini bayale mo yu heagua nde dindi ogo baya taraore mbira wulebira. Ani bialu kini ibu mini bayale wu howa wali agali handaya ho howa haru hayagua nde ibunaga wali agali bayale holebira. 25 Ai áyu i̱na tíhondo lawai harogo baya hangu mo yalimu. Bi i̱na tí lawai harogome tí biamogo bulebira.

Copyright information for `HUI