a4.2Har 25.31-40
b4.3Mo 11.4
c4.6Esr 5.2, Hos 1.7
d4.10Mo 5.6
e4.11Mo 11.4

Zechariah 4

Lamu hale wiagane irane wiaria hendenego ogo

Dahuliyali ala i̱la bi lalu haribagome i̱ hewaria ibalu i̱ paliahondo haradagua biwaria barila haya. Ani buwa ibugua i̱hondo hale halu lalu, Í̠na agile dege hendedebe, laya. a 

Ani layagola i̱na ibuhondo ladai bialu lalu, I̱na lamu hale wiagane irane mbira ngolome wabini ngaria hendedo. Lamu hale wiagane ogoninaga nguni daligahayagi ndisi be weli bedaore mo paga howa ngane hendedo. Lamu hale wiagane irane mbiraore ogoriani howa lamu karia ho gebaga bigi bidago odaruni ti hale delole iba be mbiraore ogoniha howa dege purogo lagadane hendedo.
Ai weli be wiaga biagonaga lene mende mendehabi ira olibe kira kane hendedo, lalu dahuliyali biagohondo ladai biru. b  I̱na uruni hondowa ai irane agibe lalu ibuhondo hale haru.

Ani hale halu hewaria ibugua ladai bialu lalu, Í̠na uruni manda nabi kebe, layagola i̱na ibuhondo ladai bialu lalu, Agali haguane-o i̱ manda nabiore kogoni, laru.

Anduane Homogo ibugua mbirale mbira buleore bero lalu Serubabelehondo bi mbira lowinigo ogo

Ani larugola dahuliyali biago ibugua ladai bialu, Bi ogo agali haguane Serubabele kagohondo lamibe, laya. Bi ogoni Anduane Homogohanda lalu, Í̠na biabe berego bialu í̠naga ami agali kegonaga hongonibi í̠ninaga hongonibi ndo bialu holebere. I̱ dinininaga hongo í̠ha kagome biabe berego bayale bialu holebere. c  Í̠ poregoha mbirale taibi hari timbuni wedarubime hapai hayaguabi i̱nime mo waholebero. Ani bialu kogola í̠na i̱naga anda gialo wahene biago lone bia dai bulebere. Anda ogoni bule pigane bialu howa anda háinaga ege to̱le̱ dunini wia maro bialu kegola wali agali tigua hondowa lalu, Anda ogoni bayaleoreda, laga bialu hongo howa ga̱ ladagadaga bialu holebira, laya.

Ai Anduane Homogohanda bi mende langiyago ogo. Ibugua lalu, Serubabelehanda i̱naga anda ogoni bulenaga dindi gumuni godo tiga bialu gene wedago ibunioreme biai holebira. I̱naga anda ogoni biai kagola i̱naga wali agaliru tigua i̱nime í̠ ti karia pu layada lo manda biai holebira. 10 Biabe ogoni biai nahedagola i̱naga wali agalirume tinaga bu miniha genda ho holebira. Anigo Serubabele ibugua anda pigane tenialu bulenaga pu luni anda magi manda bulenaga yu howa bialu kago hondowa wali agali tigua turu timbuni ho holebira, laya lalu dahuliyali biagome lene. d 

Lamu hale wiaganebi ira olibe kirabi de hendenegonaga irane laminigo ogo

Dahuliyali biagome i̱hondo lalu, Lamu karia uruninaga manane Anduane Homogonaga de karia howa dindi bibahendeore ibugua handame haga ka, laya.

11 Ani layagola i̱na ibuhondo hale halu lalu, Lamu hale wiagane gene mende mendehayagibi ira olibe kira kago irane agibe. e  12 Ira olibenaga magane kira olibe lininaga weli piagane baibo harigawi ngolome wabinigoha mandagi kago ogoninaga iranebi langibe, laru.

13 Ani hale halu hewaria ibugua ladai bialu lalu, Í̠ uruni manda nabi kebe, layagola, i̱na ibuhondo ladai bialu lalu, Agali haguane-o i̱ manda nabiore kogoni, laru.

14 Ani larugola ibugua lalu, Ira olibe kira ogoni libu agali kira dindi bibahendenaga Anduane Homogo kagome ibunaga biabe bilo dabalu libunaga haguaneni olibe weli odo wialu helenego ka, lalu langiya.

Copyright information for `HUI