2 Thessalonians 1

Wan pas wun Pol pɨlɨwukna pasa. Sailas, Timoti wunogwinala lɨgambɨt. Tesalonaikamba yisola la nɨna nyaek Godna mbaapma nɨmba kat pɨlɨwutɨna pasa. Nɨna njambwi nyan Jisas Kraistna mbaapma nɨmba ngwuk. Nɨna nyaek God nɨna njambwi nyan Jisas Kraist awagapma kwilɨmba vak klangwangat wanɨn. Apma maawut sɨka yetɨngweya vak klangwangat wanɨn.

POL GOD KAT SƗVU KƗLƗGANDƗ

Kɨta mbaapma nɨmba, awat sowat woviyaguga lɨngwa vat nɨman yilɨgandɨ. God waa nyaangɨt kwutaa lɨngwa vat nɨman yilɨgandɨ. Kwutaa lɨngwa vat vɨlaa God kat ngwuk kat tɨga njɨmbla njɨmbla sɨvu kɨlɨganɨn. Sɨvu kɨlɨna vat nglaatndɨ. Ngi kat tɨga God kat yelavɨpmak kat yisola la nɨmba kat kwutaa lɨngwa vak kat tɨga mbutɨganɨn. Ngwutna sɨ kwusolɨganɨn. Nat nɨma sakwat nɨmba ndi kat kavle vat yilɨngandi. Ndi vaaka kwutaa lɨnja vak apma vak ana kwagalandi. Ndi ndina maawutmba nɨmamba kwutaa lɨgandi waa ndi kat mbutɨganɨn.

NGWUK KAT YILƗNJA KAVLE VAK KAT GOD ANA KEMATƗGANDƗ

Ngwuk kat yilɨnja kavle vak kat God ana kematɨgandɨ. Wan ngwuk kat yinjeya nɨma vak ngwuk kat kwunakiyandɨ waa God yelavɨtɨgandɨ. Wan kavle vat ngwuk kat kwunatndɨ maa ndɨna mbaapmamba wuleilaa apma vat nɨnogwi lɨgiyangwuk. Wan kavle vat ngwuk kat kwunatndɨ maa God tɨga vla tɨgiyangwuk. Ngwuk kat nɨma vat yilɨga nɨmba kat ngɨni God awat ndi kat nɨma vat yigiyandɨ. Ndi kat nɨma vat yiweyan nlaakiyandɨ waa wandɨ God. Njambwi nyan Jisas yaiga njɨmblamba ndɨna njambwi enselonala yaigandɨ. Ya vla vɨka yaigandɨ. God kat kai walɨga nɨmba kat yandeya njɨmbla awat ndi kat kai waga sɨgiyandɨ. Nɨna njambwi nyan Jisas kat wanja apma nyaangɨk kat kai walɨga nɨmba kat yandeya njɨmbla awat ndi kat kai waga sɨgiyandɨ. Mbambala ngwuk kat nɨma vapmba yilɨgandi. yandeya njɨmbla ngwuk kat yat njawiya ngwula waa waigandɨ. Nɨno nɨn kat wupma waigandɨ. Wan kavle nɨmba ndi kat sɨndɨ mala njɨmbla njɨmbla kavle savle yetɨgiyandi. God tɨga kavamba ana lɨgiyandi. Ndi kat kɨkligiyandɨ. kapma kavamba yiga lɨgiyandi. Wan kavamba lɨga God kwondumba apma vat tɨndeya vat ana vɨga lɨgiyandi. 10 Ngwuk kat wan apma nyaangɨt mbutnɨn maa wutaa ngwula maawupmba kwutaa lɨngwuk. Jisas yaiga njɨmbla ndɨnai waa nyaangɨt maawupmba yelavɨka kwutaa lɨngwa vak ndɨna sɨ kwusogiyandɨ. Mɨnagwi ndɨna mbaapmamba lɨga nat nɨmba ndɨ kat vɨlaa apma nglei njɨvwa kwutndɨ waa waigangwuk. 11 Apma vapmba yetɨnjangat ndi kat kwunap mɨla waa God kat njɨmbla njɨmbla wagalalɨganɨn. Ngwutna maawupmba apma vat yetɨvak wangwa vak God ngwuk kat kwondu kwindɨ maa kwukngwangat wanɨn. God kat ngwula maawupmba yelavɨka kwutaa lɨga kwukweya apma njɨvwa God ngwuk kat kwondu kwindɨ maa kwukngwangat wanɨn.

Copyright information for `IAN