2 Timothy 2

KRAIST JISASNA SOLDIA VLA LƗGANƗN

Mɨn wuna nyan, mɨno wupma lɨgiyamɨn. Kraist Jisas awagapma kwinda apma vat klalaa mɨn tagula ava lɨgiyamɨn. Mɨn nɨma sakwat nsmbana nɨndɨmba laataa lɨmɨn mɨn kat mbukwa nyaangɨt nat apma nɨmba kat yiga ambuk. Nat nɨmba kat sɨmagagiyaa nɨmba kat vɨlaa ambup mɨla. Ndino mbupma nyaangɨt nat nɨmba kat mbupmba ndi. Ndina maawupmba mbup mbutandi. Nɨn Kraist Jisasna soldia vla lɨganɨn maa kavle nɨmba ndi vat yilɨga nɨn kat. Mɨn kat vat yivat yindi wana vaatɨmeya. Mɨn tamba soldia mɨn. Soldia kwo lɨga nɨmba kwutɨga njɨvwa ana kwutɨgandɨ. Wan njɨvwa kwagalalaa ndɨna njambwi nyan walɨga njɨvwa mɨna ndɨ kwutɨgandɨ. Ndɨna njambwi yelavɨtɨga maawupmba njɨvwa kwutɨgandɨ. Kwulaka yilɨga nyan ndɨna maawupmba yelavɨka pɨlɨndeyan ndɨ wan nyan apma wenga nda ana klaigandɨ. Wanjeya vapmba yelavɨka pɨlɨga kwulaka tata yindeya ndɨ wan nyan apma wenga nda klaigandɨ. Kɨta nyan ambugat kwutaa naandeyannda apma vat wokega sɨk wagwundɨ, ndɨ wan nyan ndɨna lak tatak ndɨna ambuna nda klandeyan wovuna. Mɨn kat mbutɨwa nyaangɨt yelavɨp mɨla. Njambwi nyan mɨn kat apma maawut wawa vak kat yelavɨka yetɨmeya maawut kwigiyandɨ.

Jisas Kraist kat ndɨno ndɨ kat nɨma sakwat kavle vak yalɨndɨ. Wan vak kat mɨna maawut ke tɨvɨga. Jisas ndɨ Devitna mbaapmamba la nɨmbana mbaapmamba yalaa tɨndɨ. Ndɨ kat sɨndi, Wundumbu yilaa lɨga laatndɨ. Njɨmbla njɨmbla wan nyaangɨt mbutɨgowun. Wuno wun kat nɨma sakwat kavle vat wun kat yalɨndɨ. Wan apma nyaangɨt mbutɨwangat wun kat kwutaa man taamba ngilaa kalabusmba taagandi. Kavle nɨmba kat nginja vak vla wun kat ngilaa kalbusmba taagandi. God waa nyaangɨt mbutɨwa nyaangɨk kat kai wandi maa ana ngɨlɨndɨ. 10 Wun kat nɨma vat yinjeya vak kat wun nɨmamba ana yelavɨka lɨgowun. God wandɨ lɨga nɨmba kat tɨga wan njɨvwa kwutɨgowun. Kraist Jisas ndi kat kwigiyaa apma vat yetɨnjeya vak klanjangat wowun. Wan vak klalaa ndi njɨmbla njɨmbla Godnogwinala kɨta vat apma vat yetɨgiyandi. 11 Tamba wanja nyaangɨt wan apma nyaangɨt kɨngiyan. Jisas kiya vak vla kiyavak kat nɨn ana vakiyanɨn. Ngɨni kiyalaa njɨmbla njɨmbla ndɨnogwinala apma vat tɨgiyanɨn. 12 Ndɨ kat kwagalalapman yineyan ndɨnogwinala tɨga nat nɨmba kat vɨga lɨgiyanɨn. 13 Jisasna njɨvwa kwukiyanɨn waa walɨneya nyaangɨk kat kai walaa kalɨtaa mandɨp vak yineyan ndɨ Jisas nɨn kat mandɨp mandɨp vak ana yigiyandɨ. Wanda nyaangɨpmba mɨna yigiyandɨ nɨn kat.

GODNA NJƗVWA KWUTƗGA NƗMBA GOD NDI KAT VƗGA LƗGANDƗ

14 Mɨn kat mbukwa nyaangɨt nat nɨmba kat ambuk. Kaawa viya nɨmamba nyaangɨt ngambulɨnja vak kat God wutaa kai walɨgandɨ. Kai walɨnda vak ndi kat awamba wan vak ke yetɨnja waa awa. Wan kavle nyaangɨt wutaa ndina maawut kavle yigiyandɨ. 15 God mɨn kat kwiya njɨvwa mɨn apma vat kwuka alɨ. Apma vat kwupmeya ngɨni God kat vɨlaa mɨna mbangɨ ana wup yigiyandɨ. God waa apma nyaangɨt yigumba ndinyangu kat savagu ambup mɨla. 16 God kat kai walɨnja nyaangɨt kwagala. Ke wuka. Wan nyaangɨt wan God kat kai wanjeya nyaangɨt wukiya nɨmba kavle vat yetɨnjeya vak nɨman yigiyandɨ. 17 Wan nɨmba ngambulɨga kavle nyaangɨt wutɨga nɨmbana maawupmba kawiya vla kɨlɨgandɨ. Kavle vat ngambulɨga nɨmbanala tɨlɨgambɨk vɨlɨlɨk palɨ Haimenias Failitas. 18 Wumbɨt vɨlɨlɨk palɨ apma nyaangɨk kat kai waa kwagalalaa mandɨt nyaangɨpmba ngambulɨmbɨt. Wumbɨt nyan kupma wambɨt. Kiya nɨmba tamba laatndi waa wambɨt. Nat nɨmba wan nyaangɨt wutaa ndina maawut nyɨm nyɨm walɨndɨ, wan apma nyaangɨt kwagalavat nat nɨmba wandi. 19 Wan mbaapma nɨmba ana alɨpsɨga Godna mbaapma nɨmba kat kwulaiyandi. Godna mbaapma nɨmba taunja kwaalɨk tɨga vla lɨgandi. Wan njambiya taaga nyan, God, anda nɨmba ndi wuna mbaapmamba lɨga nɨmba. Anda nɨmba ndi nat mbaapmamba lɨga nɨmba waa vɨga God njambiya taagalɨgandɨ. Kɨta nyan wuna mbaapmba wuleilaa tɨndeyan ndɨ wan nyan kavle vak kat kwagalagiyandɨ waa walaa God njambiya taagalɨgandɨ.

20 Nɨma ngaymba nɨma sakwat aw yaanjɨ lɨgandɨ. Nat aw yaanjɨ golmba kwutnjana. Nat aw yaanjɨ silvamba kwutnjana. Nat aw yaanjɨ mimba kwutnjana. Nat aw yaanjɨ kɨpmamba kwutnjana. Nat aw yaanjɨmba apma nda naangalaa nat aw yaanjɨmba kavle nda naangandi. 21 Ngwula kɨta nyan kavle vak kat kwagalalaa apma vapmba yetɨnjeyan wan apma nda naaganjeya aw yaanjɨ vla lɨgiyandɨ. Wan ngayna njambwi nyan vɨlaa wan apma aw klalaa wan apma nda naagagiyandɨ. Ngwutno nɨmbun nɨma sakwat apma njɨvwa njambwi nyan njɨvwa kwukiyangwuk. 22 Mɨn kwandɨ nyangu yetɨga kavle vak yetɨ mɨla. God waa apma nyaangɨpmba mɨn nɨmamba kwutaa yetɨ mɨla. Nat nɨmba kat vɨga yetɨga woviyaguga alɨ mɨla. Nat nɨmba kat vɨga yetɨga woviyaguga alɨ mɨla. Waliavak yilɨnja vak kwagala mɨla. Nat nɨmba ndina apma maawupmba yelavɨtaa njambwi nyan kat wagalalɨgandi. Ndinogwinala kɨta vat yetɨ mɨla. 23 Kwo kavle nyaangɨk kat kaawa viyaa ngambulɨnja nyaangɨt wan nyaangɨt kat mɨn ke wuka. Kwagala mɨla. Wungi vat kavle nyaangɨt waliavat ngambulɨnja nyaangɨtna. Mɨn ke wuka. 24 Njambwi nyana njɨvwa kwutɨga nyan waliaga viyavak kat mɨn mɨna maawupmba ana yelavɨka lɨgiyamɨn. Mɨn kwo yetɨgiyamɨn. Mɨn apma vat mɨna nɨma sakwat nɨmba kat kwunaka yetɨ. Ndi kat wan apma nyaangɨt vɨsɨmogwiga yetɨlɨgiyamɨn. Wan kavle vat yetɨnjeya vak kat mɨna maawupmba wana ndi kat kɨmbut ygia yelavɨtɨmeya. 25 Mbutɨma nyaangɨk kat wupmak kat kai walɨgiya nɨmba ke ndi kat njɨka waga. Ndi kat yigumba tangaka ndina maawut kwunakiyamɨn. Kupi maawut yelavɨtaa wama apma nyaangɨpmba kwutaa lɨnjangat God anagandɨ ndi kat waigaa. 26 Wan nɨmba mbambala Setena nyaangɨt tamba wuka lɨgandi. Seten ndi kat tamba kwutaa lɨgandɨ. Mandɨt kupi maawupmba yelavɨtnjeyan Seten kat kwagalalaa apma vat yetɨgiyandi.

Copyright information for `IAN