2 Timothy 3

NGƗNI LA LƗGA NANDINYAMBA KAVLE VAT YAIGANDƗ

Yaiga ngɨni la lɨga nandinya nɨma sakwat kavle vat yaigandɨ. Wuka yelavɨpmangat wowun. Wan njɨmbla tɨgiyaa nɨmba ndi ndina mbangɨ kat mɨna kwunaka ndina mbangɨ kat mɨna woviyaguga lɨgiyandi. Nat nɨmba kat ana vɨga woviyaguga lɨgiyandi. Nɨma vat sanya kat maawut viyalɨndɨ yelavɨka lɨgiyandi. Nɨn apma nɨmba nɨn waa waigandi. Nat nɨmbana sɨ viyesendagiyandi. Nat nɨmba kat njɨka waigandi. Ndina nyaek nyɨme waa nyaangɨk kat wupmak kat kai waigandi. Ndi ana sɨvu kɨgiyandi nat nɨmba kat. God waa vapmba yetɨvak kat ndi kai waigandi. Nɨn mbak waala kat yilɨna kavle vak vla ndi nat nɨmba kat wupma yigiyandi. Nat nyan ndina kavle maawut kwunapmat wandeyan ndi kai waigandi. Ndi nat nɨmba kat watsoga waigandi. Ndi namwiya nɨmba ndi. Apma vak yetɨvak kat ndi kai waigandi. Ndi kwundi kamwin kwi namwiya nɨmba ndi. Nat nɨmba kat yelavɨtapman ndi ndina mbangɨ mɨna yelavɨka yetɨlɨgiyandi. Nɨn apma nɨmba nɨn waa ndi yelavɨtɨgiyandi. Ndi God kat ana yelavɨka woviyaguga lɨgiyandi. Ndi ndina mbangɨ kat mɨna yelavɨka yetɨlɨgiyandi. Nat nɨmba yetɨnja vak kat vɨlaa God waa vapmba yetɨgandi waa yelavɨkiyandi. Ndi ndina maawupmba ana God waa vak yetɨlɨgandi. Mandɨp mandɨp waga mandɨp vapmba yiga yetɨlɨgandi. Wungi vat kavle vat yiga yetɨlɨga nɨmba kat mɨn kai waa kwagala mɨla. Wundi kavle vapmba yeta nɨmbana nat nɨmba kavle nyaangɨt yi ya mbuka yetɨlɨgandi nat nɨmba kat. Ndi ngay wuleilaa maawut sɨtapma ta taagwa kat wan kavle nyaangɨt wuleiga ndi kat mbutɨgandi. Ndi kat mbutɨnja nyaangɨt ndina maawupmba lamba ngwandɨlaa tɨgandi. Ndi woviyaguga wan nyaangɨk kat tɨgandi. Wundi taagwa kɨta nyaangɨt mɨna wutɨga tsaagwa ana ndi. Mandɨt mandɨt nyaangɨt wutɨga taawa ndi. Ndi tagula maawutno ana lɨgandi. Ndi kavle maawut sɨka lɨga tagwa ndi. Wan kavle vapmba yetɨnjeyan apma nyaangɨtna angwa ndina maawut ana ngwandɨndɨ, yelavɨkiyandi. Tamba wumbit vɨlɨlɨk palɨ mbɨla sɨ Janis Jambris Moses kat kai wambɨt. Wundi kavle nɨmba wumbɨt nyan kai wamba vla ndino wan apma nyaangɨk kat kai walɨgandi. Ndina maawut kavle savle yetɨlɨnja vat mɨna yelavɨka lɨgandi. Ndina maawupmba God waa apma nyaangɨt ana yelavɨka lɨndi. Wan yetɨlɨnja kavle vat nɨman ana yigiyandɨ. Kwo kavle vatnat tɨgiyandɨ. Kavle vat yiga yetɨlɨnja vak ngɨni la nat nɨmba ndina mɨnimba vɨlaa yelavɨkiyandi. Yetɨlɨnja vak kwo vatnat tɨgandɨ waa yelavɨkiyandi. Tamba wumbɨt nyan yiga yeta kavle vak kat vɨlaa mbɨk kavle nyan mbɨk waa mbɨk kat wandi.

GOD WAA APMA NYAANGƗT MAAWUPMBA YELAVƗKA KWUTAA ALƗ MƗLA

10 Tamba mɨnogwinala lɨga wan apma nyaangɨt vɨsɨmogwiwa vat vɨga wupmɨn. Yetɨwa vak vɨmɨn. Wuna maawupmba lɨga vat aywaa mbukwun mala vɨga wuka lɨgamɨn. God kat maawupmba yelavɨka kwutaa yetɨwa vak vɨmɨn. Mandɨp mandɨp vak yilapman yetɨwa vak vɨmɨn. Nat nɨmba kat kwunaka woviyaguga yetɨwa vak vɨmɨn. Tagula maawutno tɨwa vat vɨmɨn. 11 Wun kat nɨma vat yinja vak vɨmɨn. Wun kat nɨma vat yinjangat tɨga wan kwutaa yetɨwa apma vat ana kwagalawun. Antiok Aikoniam Listra walɨnja ngepma kuvupmba la nɨmba wun kat nɨma vak kavle yivat yilɨnja vak kat vɨlaa ana vaaka yiwun. Njambwi nyan wun kat kwunatndɨ mala kwo lɨwun. 12 Kɨta nyan Kraist Jisasnogwinala kɨta vat apma vat yetɨvat wandeyan nat nɨmba wan nyan kat kai waa nɨma vat yigyandi. 13 Wundi kavle nɨmba woseka walɨga nɨmba ndi kavle vat yigiyandi. Ndinai njɨtɨga kavle vat nat nɨmbana maawut kavle yilɨgandɨ. Ndino ndina maawut nɨmbun kavle yigiyandɨ. 14 Mɨn kapma vapmba lɨga nyan mɨn. Mɨna waamba wutaa maawupmba yelavɨka kwutaa lɨma nyaangɨt mɨn ke kwagalaga. 15 God wandɨ, tamba pɨlɨwutnja nyaangɨt mat nyan tɨga mɨn wan nyaangɨt mɨn wuka lɨma nyaangɨtna. Wan apma nyaangɨt wutaa Kraist Jisas kat mɨna mbangɨ wiyo waavi taagandɨ, lɨmeyan njɨmbla njɨmbla wan apma vat yetɨmeya vat klaigamɨn. 16 God wandɨ, tamba pɨlɨwutnja nyaangɨt ndina yelavɨk vapmba ana pɨlɨwutnji. God ndina maawupmba ngwandɨlaa wandɨ mala wan nyaangɨt pɨlɨwutndi. Wan tamba pɨlɨwutnja apma nyaangɨt apma vatna angwa vɨsɨmogwilɨgandɨ. Kavle vat yiga yetɨnjeyan wan apma nyaangɨt nɨn kat kai walaa kwunatɨgandɨ. Apma vat tɨneya vat nɨn kat vɨsɨmogwilɨgandɨ. 17 Wan Godna apma nyaangɨt kwutaa yetɨna nyaangɨt nɨn kat kwondu kwindɨ. Wan kwondu klalaa nɨn Godna nɨmba nɨn ndɨna njɨvwa nɨn apma vat kwukiyanɨn.

Copyright information for `IAN