Romans 2

GOD SƗMBLAN ANA SƗLƗGANDƗ

Wan nɨmba kat wutaa yelavɨtɨgangwuk? Wan nɨmba kavle nɨmba ndi waa yelavɨtɨgangwuk? Ngwutnogwi aywaa wungi vat sɨgat. Ndinai yetɨga vapmba ana yetɨkiyowun waa ana God kat waigangwuk. Wan nɨmba kat kavle nɨmba ndi wangweyan ngwulai waa nyaangɨt ngwula lak yigiyandɨ. Kɨngi vak kavle vapmba yetɨlɨga nɨmba kat God awat sigiyandɨ. Vɨlɨganɨn. Sɨmblan ana sɨgiyandɨ. Kavle vatmba yetilɨngjangat God sɨgiyandɨ. Wungi kavle vapmba yetɨlɨnan God nɨn kat ana sɨgiyandɨ waa yelavɨtɨgangwuk? Ngwuk kat wagalavat wowun. Awa luwa. sɨgiyandɨ. God ngwuk kat kaiga lɨndan ana yelavɨtɨgangwuk? Ngwuk kat sɨlapman kawiga lɨgandɨ. Miwa yiga sɨlapman kawiga lɨgandɨ. Manda kat. Kupi maawut sɨkwangat sɨlapman kawiga lɨgandɨ. Kupi maawut sɨtapman ywɨlɨngweyan Godna kimbuk maawut tɨga vat kɨta yisoga laagalɨgandɨ. Ndinyangu kat Godna kimbuk maawut tɨga vatna kwigiyaa nandinya ndɨna maawut ana tɨvɨgiyandɨ. Sɨmblan ana kwigiyandɨ. Aywaa kwigiyandɨ. Yagiyaa nandinyamba kɨta nyan kɨta nyan kat wan nyana kɨpmamba yiga yetɨnda vapmba God kwigiyandɨ. Apma vat klavat tɨga, sɨmbɨ kɨvu nda klavat tɨga, God waa nyaangɨt wutɨga nɨmba kat God ndɨnai lɨga vla lɨgiyaa vat kwigiyandɨ. God kat kai walɨga kavle vapmba yetɨlɨga nɨmba kat God ndɨna kimbuk maawut tɨga vat aywaa kwigiyandɨ. Kavle vapma yetɨlɨga nɨmba ndi kat vat tɨnja vat kwulakiyandɨ. Juda walɨnja nɨmba Juda ana ndi nat nɨmba aywaa kavle vapmba yetɨnjeyan ndi kat vat tɨnja vat kwulakiyandɨ. 10 Apma vapmba yetɨlɨga nɨmba ndi kat apma vat tɨgiyandɨ. Juda walɨnja nɨmba Juda ana ndi nat nɨmba aywaa apma vapmba yetɨnjeyan ndi kat God tɨga vat tɨnjeya vat, kwonduo lsvat tɨnjeya vat, kao lapman tɨnjeya vat tɨgiyandɨ. 11 Wan vak ndinyangu kat aywaa tɨgiyandɨ. God kɨta vapmba ndinyangu kat aywaa yilɨngandɨ. Mandɨt mandɨt ana yilɨgandɨ. 12 Godnanamba Moses klalaa nɨn kat kwinda lo waa nyaangɨt kwutaa lɨga nɨmba kavle vapmba yetɨnjeyan God ndi kat wunai waa nyaangɨt tamba wutaa apma vat ana yetɨngwuk waga viyagiyandɨ. Moses kwiya lo kwutapman tɨga nɨmba kavle vapmba yetɨnjeyan God ndi kat viyagiyandɨ. Manda kat viyagiyandɨ. Ndina ngepma vak vɨga ndɨna maawupmba God waa nyaangɨt tɨga vat ngilɨga waa vɨlɨganɨn. Wupma God ndi kat viyagiyandɨ. Ndina maawupmba apma vat tɨga vak kat kavle vat tɨga vak kat yelavɨtɨgandi. Moses kwiya lo kwutaa lɨga Juda walɨnja nɨmba ndɨnai waa nyaangɨpmba yetɨlapman yɨnjeyan God ni kat ndɨnai yeta vak ana kwigiyandɨ. Ndɨnai waa lo kwuka wuka yetɨlɨga nɨmba kat mɨna ndɨnai yeta vat kwigiyandɨ. 16 God wandɨ maa Jisas Kraist ndinyanguna maawupmba lɨga vak vɨlaa ndi kat kɨta kɨta apma vat yigiyandi? E? Kavle vat yigiyandi? Waa yelavɨkiyandɨ. Wungi vak tamba wowun ngwuk kat. Njɨmbla njɨmbla ngwuk kat wan nyaangɨt walɨgowun.

JUDA YELAVƗTNJA VAK

17 Juda walɨnja nɨmba nɨn waa wangwuk. God kwiya lomba yetɨlɨganɨn waa wangwuk. Aoma vapmba yetɨlɨganɨn wangwuk. Godna maawut vɨlɨganɨn waa wangwuk. God waa lo vɨga save klaga vɨlɨpman tɨga nɨmba kat yambɨ sɨmbagalɨganɨn waa wangwuk. Kavle savle nɨmba kat, savelapman nɨmba kat sɨmagalɨnanan waa wangwuk. Maawut sɨtapman nɨmba kat sɨmagalɨganɨn waa wangwuk. God waa lomba apma nambuo lɨga vat tɨgandɨ waa wangwuk. 21 Nat nɨmba kat sɨmagalɨgangwuk. Ngwut avla sɨmagalɨgangwuk? Nat nɨmba kat ke sɨkwuka walɨgangwuk. Sɨkwutɨgangwuk? Sikwuka yambasɨk kwutɨgangwuk? Mimba viyaga waagan ke kwunaka walɨgangwuk. Wan waagan tɨga ngay wuleilaa waagan kait sɨkwutɨgangwuk? Wan kavle vapmba yilɨgangwuk. 23 Ngwuk walɨgangwuk. Godna lo kwutaa lɨganɨn waa walɨgangwuk. Woseka walɨgangwuk. God waa lo kwagalalaa kavle vat yetɨngwangat nat nɨmba vɨga God kavle nyan ndɨ God kat walɨgandi. 24 Tamba God waa nyaangɨt wupma pɨlɨwutndi. Kavle vapmba yetɨngwangat Juda ana ndi nat nɨmba God kat walɨgandi. Mɨn kavle nyan mɨn God kat walɨgandi waa pɨlɨwutndi.

25 Ngwutna mbangɨ pɨti maa God waa lomba yetɨngweyan wovuna. God waa lo kwagalalaa yetɨngweyan mbangɨ pɨtnja vak kwo valak tɨgiyandɨ. 26 Mbangɨ pɨtapman nɨmba God waa lomba yetɨnjeyan God ndi kat waigandɨ. Ngwuk wuna nyangu ngwuk waa waigandɨ. 27 Ngwut mbangɨ pɨtɨgan nɨmba njwuk. God waa lo lavungamba vɨlaa kwagalalaa yetɨngweyan mbangɨ pɨtapman God waa lomba yetɨga nɨmba ngwuk kat waigandi. Ndi kavle vapmba yetɨlɨgandi waa ngwuk kat waigandi. 28 Juda tɨga vla tɨvat wangweyan mbangɨ mɨna pɨti maa ana lɨgiyangwuk 29 Juda tɨnja vat kɨngiyan. God kat maawupmba yelavɨtɨgandi. Mbangɨmba mɨna kai. Wan vak ndinyangu ana vɨlɨgandi. God mɨna vɨga apma vatna walɨgandɨ.

Copyright information for `IAN