Revelation of John 19

Gote Kapi Ninge Unguma

Kombu Babilon kamukumu keri lerimumunga imboma tono kolko Gote kapi ninge ungumu

Aku uluma pora nimu wali altopo pileru kinye mulu kombuna imbo awini ungu nimele mele ungu te wendo orumuna pileru. Akumani alako tokolio ningei,

“Goteni uluma pali paimbo tumbi tipe
moke tepalie teremo.
Imbi paa ola mololi apureli ambomu yuni apureli toli uluma terimumuni
mai kombuna imboma molko kenjingei nimumunga
aku ulu terimuma Goteni pilipe moke tepa apurupe yu mindili nopili nimu.
Aku ambomuni Gotenga kendemandema
topa kondorumu akumanga mememanga Goteni pundu tondopa mindili tirimu akumunga
yu kapi nimbo imbi lipo ola mundemili!
Mindili noromulu aulkena lipe tapondopa wendo ltimo ulumu yu kinye pepa,
yunge imbi paa olandopa molopa,
pa enge nilimu yu kinye pepa,
yu melema pali nokombalo imbimu kinye engemu talo peremo iyemu,”
ningo akume ningi.

Altoko alako tokolio ningei,

“Yuni yu topa kalomomunga ilio waliwalima omba
kau peremomunga Gote kapi nimbo imbi lipo ola mundemili!” ningi.
Iye nomi 24 kinye, mele koinjo mololi kite kinye, enoni iye nomi king polona moromo Gotenga kumbe kerena mainye pungo tamalu peko, yu kapi ningo imbi liko ola mundukolio ningei, “Aku tepa tepili! Gote kapi nimbo imbi lipo ola mundemili!” ningi.

Kano wali ungu te iye nomi king polona wendo ombalie nimbei,

“Eno yunge kongono imbo kendemande moromelema
pali, Nu linonga iye Awilimu ningo pipili kolko yunge ungumu taka liko pilko teremele.
Imbo awilima kape imbi naa mololima kape
enoni linonga Gote kapi ningo imbi liko ola mundengei!” ningi.

Kongi Sipsip Walomu ambo limbeimu langi awili teko koinge temanemu

Altopo pileru wali, imbo awinini ungu panjirimele mele ungu te, no awili topalie uwa nimo mele molo, mulu enge nimbe toromo mele ungu te pileru. Akumani ru ningolio ningei,

“Linonga Gote Awili Enge Pepa Imbi Awili Olandopamu Ltemo Iyemu
kamukumu iye nomi kingimu molopa melema pali
nokoromomunga yu kapi nimbo imbi lipo ola mundemili!
Sipsip Walomu ambo limbei waimu
kamukumu wendo oromo.
Yu ambo limbelomu Yu omba limbelo nimbe
nokopa moromomunga lino konopu penga pepili konopu tipo paimbo terimu nimbo
imbi lipo ola mundemili!
Goteni wale pakoli paa penga enge nili mini mana tepa kake telima pakopili nimbe timo,” ningi.
(Wale pakoli penga tirimoma Gotenga imbomani ulu pengama teremele uluma manda ltemo.)

Kano wali enselemuni nando nimbei, “Ungu nimbomu pipiana imbi tani, Sipsip Walomu ambo limbei langi koingena Goteni imbomando wangei nimbelo imboma eno tono kolaio! aku mele pipiana towi!” nimu. Aku tepa nimbelie kelepa ungu te peya nimbei, “I unguma Gotenga ungu paimboma,” nimu.

10 Aku nimu ungu pilipolio enselemunga kumbe kerena tamalu pepo kapi nimboi teru nalo yuni nando nimbei, “Nu aku ulu naa tewi! Nunge angenalini Jisasinga unguma imboma ningo tirimelema kinye nu kinye na kinye lino pali Gotenga kendemandema molopo kongono tenderemolo kani nuni Gote kau popo toko kapi niwi! Gotenga ungu nimbo tirimolo akumunga pulumu Jisasinga unguma nimbo tirimolo ulumu akumunga nu kinye angenali kinye na kinye lino peyama yunge kendemandema moromolo, nio,” nimu.

Iye te kongi os kakemunga umbulu molorumumunga ungumu

11 Mulu kombumu nambu topa lerimuna kanoru kinye kongi os kake telimu angilerimu, akumunga umbuluna ola iye te molorumu, akumu imbi leko Kongono Ambolopa Nokopa Kondopa Konopu Toya Toli Iyemu ningo, Ulu Paimboma Kau Teremo Iyemu nimele. Imbomanga kot pilipe opa teremo wali ulu toya tolimu kau teremo. Yu kot pilipe tumbi tipe moke tepa we naa lipe tapondoromo. Yu we opa teambo nimbe naa teremo. 12 Yunge mongo talo tipe elka mele genegene nimbe iye nomi kingima wainye pakoromele mele wainye awini yunge pinyewena pakoromo. Yunge kangina imbi te moromo, aku imbimu yunu pimo, lupe imbomani naa pimele. 13 Yu wale pakoli meme kaloli tule te pakoromo. Yunge imbimu Gotenga Ungumu. 14 Mulu kombuna amima kongi os kake telimanga molko yu lombili pungei puringi. Akuma wale pakoli kake paa penga mare, kalaro naa mololima pakoringi. 15 Yunge kerena mai kombuna imbo talapema pali topa opa teli loi gelea paa nenge nenge noli te peremo. Yu imbomanga pali iye awilimu molopa imboma paa enge nimbe nokopa molombalo. Gote Olandopa Engemunga mumindili paa olandopa kololi ulumu peremo wain mongoma kimboni kambulupe takelemakele tenderemo. 16 Yunge wale pakoli tule akuna kinye yunge palambena kinye imbi te moromo, akumu i tepa:

Iye Nomi Kingimanga
Yu Iye Nomi King Paa Olandopamu, Iye Awilimanga Yu Iye Paa Awili Olandopamu,
nimbe moromo.

17 Kanoru wali enana ola ensel te angilerimu, akumuni muluna mangoko andoringi keramando enge nimbe alako topalie nimbei, “Goteni langi awili koimomu nangei ongo nombeya teaio! 18 Iye nomi kingimanga onoma kape, amimanga iye nomimanga onoma kape, iye enge nilimanga onoma kape, osema kinye enonga umbuluna ola molko andoromele iyemanga onoma kape, imbomanga pali we moromele imboma kape, kongono we tendeko kendemande tenderemelemanga kape, imbi naa mololima kape, imbi mololima kape, enonga onomanga mindima nangei waio,” nimu.

19 Altopo kanoru wali mele takeramu kinye maina iye nomi kingima kinye kongi os umbuluna ola moromo iyemu kinye yunge amima kinye opa teamili ningo nombeya teringi. 20 Nalo Goteni ungu imbo tondomo ungumu pilipolio nimbo tiro nimbe kolo topa nimbe tirimu iye, kanomu mele takeramuni lipe tapondorumu neya ulu enge nili awini terimu akumu kinye, mele takeramu kinye, elo ka tirimu. Oi ulu enge nili terimu ulumani imbo mele takeramunga makomu kangina molopili ningo, yu none teli te teko wamoko teko anjiringimu popo toko kapi ningi kano imboma kondi torumu. Yu kinye mele takeramu kinye ka tikolio, kou salfa tipe nomba kondopa perimu muru paa awilina liko maindo munduringi. 21 Kongi os umbuluna ola molorumu iyemunga kerena opa teli loi gelea perimumuni enonga amima pali topa kondorumu, kano wali enonga onomanga mindima keramani ongo noringina kerama eno olo terimu.

Copyright information for `IMO