1 Chronicles 29

1 Stori 29:10-18

Devittä Yawe iniŋ oretkuk

10 Devittä käbeyä iŋamiken Yawe ŋode iwetpäŋ iniŋ oretkuk;

O Yawe, oranin Isrel täŋo Anutu, gäkken ganiŋ oretoret tärek-täreki nämo it täyon.
11  a  Gäk kunum gänaŋ ba kome terak, wäp biŋam, kehäromi, peŋyäŋek, ba epmäget kudän kuduptagän gäkŋata biŋamgän täkaŋ. Gäk imaka kuduptagän yabäŋ yäwatta biŋam, ba imaka kuduptagänta intäjukun it yämik täyan.
12  b  Täŋpäkaŋ ahäŋ bumbum ba wäp biŋam gäkken nanik äbäk täyak. Täŋkaŋ gäk imaka kuduptagän täŋo ärowani. Ämawebe kudupta wäp biŋam ba kehäromi yämikta gäk ketkaken kehäromi itak.
13 Unita Anutunin, gäka bänep täga nadäŋ gamiŋpäŋ wäpka biŋam säkgämän yäpmäŋ akukamäŋ.

14  c  Täŋpäkaŋ iron taŋi pähap pekamäŋ ŋonita nadäwätäk täyat. Mebäri imata gäkä näk ba ämawebenaye äpani ŋonita nadäŋ nimiŋiri iron taŋiinik ŋo pekamäŋ? Näk nadätat, imaka imaka kuduptagän yäpmäŋ kuŋat täkamäŋ uwä gäkkengän äbäŋ morek täkaŋ. Unita iron gamikamäŋ ŋowä gäk ketkaken naniktä äbanigän.
15  d  Naniye oraniyetä kome terak kadäni keräpigän it täŋkuŋo udegän, gäkä nibäŋiri kome mähem ude nämo, kome terak itpäŋ-nadäknin keräpigän ude täk täkaŋ. Kome terak irit kuŋat-kuŋatnin uwä imaka bäräŋeŋ ahäŋpäŋ paot täkaŋ ude bumik. Nin kumäŋ-kumäŋ täga nämo irepmitne.
16 Unita Yawe Anutunin, wäpka kudupita kudupi yot kubä täneta täŋ-bumbum pekamäŋ ŋowä gäk ketkaken naniktä äbanigän. U kudup gäkŋogän.

17 Täŋkaŋ Anutu, näk ŋode nadäk täyat; Gäk äma bänepnin nibäŋpäŋ nadäwanitä äma imaka u ba u täŋpayäŋ nadäŋpäŋ täŋyäkŋarani terak nämo, kudän siwoŋi terakgän täk täkaŋ udewanita gäripi nadäk täyan. Unita bänepna siwoŋi terak, ba äma kubätä peŋ näwerirän nämo, näkŋaken gärip terak imaka ŋo peŋ gamitat. Täŋpäkaŋ ämawebekaye ŋo imaka, iniken gärip terak iron buŋät gamiŋirä yabäŋpäŋ oretoret taŋi nadätat.
18 Unita Yawe, oraniye Abraham, Aisak, Jekop täŋo Anutu, ämawebekaye iron kädet tägagämän täkaŋ ŋo nämo paorekta nadäŋ yämiŋiri bänepi täŋo gäripini pen kaŋ it yäpmäŋ kwän. Ba täŋkentäŋ yämiŋiri bänepi gäkkengän peŋpäŋ kaŋ kuŋat yäpmäŋ kut.
Copyright information for `IOU