Amos 3

Amos 3:1-8

Yawetä Isrel ämawebe komi piä yämayäŋ täyak u mebäri nikek

Amostä ŋode yäŋkuk; Isrel ämawebe Yawetä Isip nanik tämagut yäpmäŋ äbani in man Yawetä täwetak ŋo juku peŋpäŋ nadäwut. Uwä ŋode yäyak;

a  Äma äbot komeni komeni u bämopiken nanik ingänpäŋ näkŋata biŋam itta iwoyäŋpäŋ watä säkgämän it tamik täyat.
Mebäri unita momijin kudupta yäŋpäŋ kowatawä komi piäken api tepmaŋpet.
Jide? Äma yarätä bok jop täga kuŋatdeŋ? Nämo, man yäŋpäŋ-nadäk täŋkaŋ uyaku kuŋatdeŋ.
Ba laion, bipiken tom kubä nämo ureko uwä kähän imata yäwek?
Ba laion gubaŋi ini mobä käwutken itpäŋ imata gera jop yäwek? Nämo, tom kubä naŋkaŋ uyaku gera täga yäwek.
Ba jide, äma kubätä barak käderiken barak yepmäŋitta gämam umumi nämo peweko uwä barak jide täŋpäŋ iŋirek? Nämo!
Ba tom kubä buŋep terak nämo äroŋirän kaik jide täŋpäŋ akwek? Nämo, tom kubä äroweko uyaku kaik täga akwek.
U udegän, yotpärare kubäken ämik täŋo womat mämä nadäŋpäŋ ämawebe nämo umuntäneŋ ba?
Ba yotpärare kubäken kadäni waki ahäweko uwä jide nadäneŋ? Uwä ŋode nadäneŋ; Waki ahätak ŋowä mebäri nikek. Yawetä pewän ahätak yäŋ nadäneŋ.

b  Unita bureni-inik ŋode nadäwut; Ekäni Yawe ärowanitä imaka kubä täŋpayäŋ nadäŋpäŋä profet piä ämaniye u jukun yäwerän nadäŋirä täk täyak.
c  Äma kubä laiontä gera yäŋirän nadäŋpäŋ nämo umuntäwek? Eruk, u udegän Ekäni Yawe ärowanitä äma kubäta man imeko uwä äma u jide täŋpäŋ man u yäŋahäkta meni täŋpipiwek? U täga nämo!
Copyright information for `IOU