Deuteronomy 30

Baga Man 30:1-20

Bänepi sukureŋirä Yawetä api täŋkentäŋ yämek

Mosestä Isrel ämawebe ŋode yäwetkuk; Imaka täwet yäpmäŋ äbätat ŋowä ahäŋ tamiŋpäŋ Yawe Anutujintä peŋawäkjinta yäŋpäŋ tadäpmäŋpäŋ täwat kireŋpewän äma äbori äbori bämopiken itnayäŋ täŋo uken itkaŋ apiŋo kon man ba tagwän man täwetpäŋ täwoŋärek täyat unita api juku pineŋ. Täŋpäkaŋ injin ba nanakjiye Yawe Anutujinken äyäŋutpäŋ nadäk bänepjin kuduptä apiŋo mani täwetpäŋ täwoŋärek täyat u buraminayäŋ täŋo uwä Yawe Anutujintä butewaki nadäŋ tamiŋpäŋ äma äbori äbori bämopiken yäŋ-täwat-pewän kuŋkuŋo uken nanik äneŋi tämagut päbä iritjin yäpän tägawäpäŋ bian säkgämän itkuŋo udegän api itneŋ. Yawe Anutujintä kome moräki moräkiken tadäpmäŋpäŋ täwat kireŋpewän kuŋkuŋo täŋpäwä u nanik yäŋ-butuŋpäŋ äneŋi tämagut yäpmäŋ päbä komejinken api tepmaŋpek. Bureni, kome nanjiyetä yäpmäŋpäŋ itkuŋo uken tepmaŋirän injinta api koreneŋ. Ude täŋirä Anututä täŋpewän nanjiyetä täŋpani udegän yärepmitpäŋ täŋbumbum pähap terak itkaŋ ahäŋ-bumbum api täneŋ.

Täŋpäŋ Yawe Anutujin uwä injinta ba nanakjiyeta bänepjin täŋpidäm taŋ tamiŋirän bänep nadäk-nadäkjin kudup ukengän api peneŋ. Ude täŋ tamayäŋ täko uwä kome uken täga api itneŋ. Ude täŋpäŋ Yawe Anutujintä tagwän man kudup u iwanjiye inta nadäwäwak täŋ tamiŋpäŋ tadäpmäk täŋpani u terak api buramiŋ yämek. Ude täŋirän inäwä Yawe gämoriken äneŋi kuŋatpäŋ näkä baga mani apiŋo täwetpäŋ täwoŋärek täyat u kudup buramiŋpäŋ api yäpmäŋ kuŋatneŋ. Täŋpäŋ inä Yawe Anutujin täŋo baga man ba yäŋkehäromtak mani Baga Man Kudän Täwani ŋo gänaŋ kudän täwani pätak u nadäŋpäŋ buramik täŋpäŋ äneŋi bänep nadäk-nadäkjin kuduptagän Yawe Anutujin-ken-gän pewä pärayäŋ täko uwä Anutujintä täŋkentäŋ tamiŋirän imaka imaka ketjintä tänayäŋ täkaŋ u ba nanakjiye ba yawakjiye ba ketem epänjin kudup ahäŋ-bumbum api täŋ yäpmäŋ kwek. Bureni, Yawetä nanjiyeta gäripi nadäŋ yämik täŋkuko udegän inta gäripi äneŋi nadäŋ tamiŋirän täŋbumbum terak api itneŋ.

11 Nadäkaŋ? Baga man apiŋo täwetpäŋ täwoŋärek täyat u bäräpi nämo. Intä täga buramiŋpäŋ tänaŋi. 12  a  Uwä kunum gänaŋ iränpäŋ uyaku ŋode yäneŋ; Netätä päro yäpmäŋ äpä nimänkaŋ nadäŋpäŋ buramine? Upäŋkaŋ ude nämo! 13 Ba gwägu udude käda nämo itak unita ŋode nämo yäneŋ; Netätä gwägu irepmit päŋku yäpmäŋ äbä nimänkaŋ nadäŋpäŋ buramik täne? 14 Nämoinik. Baga man uwä dubinjin-ken-inik itak. In nadäŋpäŋ buramik täneŋta u mejinken ba bänepjinken pewani pätak u.

15  b  Nadäkaŋ? Näk apiŋo imaka gäripi nikek ba irit bureni täwoŋäretat. Upäŋkaŋ kukŋiwä täktäk waki ba kumäŋ-kumäŋ kädet imaka, bok täwetpäŋ täwoŋäretat. 16  c  In Yawe Anutujin bänepjintä iŋitinik täŋkaŋ kädet peŋ tamani siwoŋigän iwatpäŋ baga man, mani kädet ba yäŋkehäromtak mani nadäŋpäŋ buraminayäŋ täŋo uwä irit säkgämän ahäŋ-bumbum täŋpäŋ äbot taŋi pähap api täneŋ. Täŋkaŋ kome korenayäŋ täkaŋ uken päŋku irirä Yawe Anutujintä iron taŋi api täŋ tamek.

17 Upäŋkaŋ bänepjintä Yawe mäde ut imiŋkaŋ mani utpäŋ bänep nadäk-nadäkjin anutu jopiken peŋpäŋ yäniŋ oretkaŋ unita watä epän tänayäŋ täŋo uwä in kuduptagän api paot moreneŋ. Näk apiŋo man ude täwetat. In Jodan ume irepmitpäŋ kome korenayäŋ täkaŋken uken kadäni käroŋi nämo api itneŋ. 19 Näk apiŋo kunum bibik yarä u iŋamiken irit ba kumäŋ-kumäŋ, kon man ba tagwän man unitäŋo kädet kawä tärekta mebäri täwetpäŋ täwoŋärek täyat. Unita in injin ba nanakjiye kuduptagän irit täŋo kädet iwatta nadäk kaŋ pewut. 20  d  Ude täŋkaŋ Yawe Anutujin bänepjintä nadäŋ imikinik täŋpäŋ mani buramiŋpäŋ ugän kaŋ yäpmäŋ wädäwut. Nadäkaŋ? Yawe uwä iritjin bureni unita ude tänayäŋ täŋo uwä Yawetä orajin pähap Abraham Aisak ba Jekop unita kome yämikta yäŋtäreŋkuko uken kadäni käroŋi api it yäpmäŋ kuneŋ.

Copyright information for `IOU