Isaiah 52

Aisaia 52

Jerusalem waŋkukopäŋ Yawetä yäpän tägaŋkuk

a  Eruk, Anutu täŋo kudupi yotpärare Jerusalem, gäk aku! Akuŋpäŋ täŋkehärom taŋpäŋ itkaŋ epmäget säkgämän säkgämän tek ude wädäwi ärowut.
Nadätan? Guŋ äbot, Anutu täŋo baga man nämo iwarani u gäk täŋpäwakta gäkŋo yewa gänaŋ äneŋi nämoinik api äroneŋ.
Unita täŋbute-bute peŋpäŋ kugun däpmäŋ äreyäŋpäŋ äneŋi intäjukun kaŋ it.
Täŋpäŋ iwan täŋo yen kehäromi kotäkaken topani u piräreŋpäŋ äneŋi säkgämän kaŋ it.

Unita Yawetä ŋode yäyak; Ämatä in nämo suwaŋpäŋ komi piäken tepmakta jop yäŋ-täkŋat yäpmäŋ kuŋkuŋ. Eruk udegän, komi piäken nanik äneŋi tämagurayäŋ täyat u moneŋ nämo peŋpäŋ api tämaguret.
Täŋkaŋ ämawebenaye Isip komeken itta pengän äpmoŋkuŋo uwä iniken gärip terak äpmoŋkuŋ. Täŋpäkaŋ kämiwä Asiria naniktä päbä yepmäŋitpäŋ yämagut yäpmäŋ päŋku komi piäken yepmaŋkuŋ.
b  Täŋpäkaŋ apiŋode Babilontä udegän täŋ yämitak. Ämawebenaye nämo suwaŋpäŋ komi piäken yepmakta yäŋ-yäkŋat yäpmäŋ kuŋkuŋ.
Komi piäken yepmaŋkaŋ intäjukun it yämiŋpäŋ sära man yäwet täkaŋ. Bureni, kepma kepma wäpna yäpmäŋ äpäk täkaŋ.
Unita kadäni näkä iwoyäwayäŋ täyatken uken ämawebenaye iwan keriken nanik yämagurira ŋode api yäneŋ;
Bureni, Yawetä ude api täŋpet yäŋ yäŋkuko u bureni ahätak yäŋ api nadäneŋ. Ude nadäwä tumbäpäŋ Anutu u bureni yäŋ api nadäneŋ.

Ämawebe kuduptagäntä Anutu täŋo kehäromi kwawak api käneŋ

c  Äma manbiŋam tägagämän yäpmäŋ äbäk täkaŋ unitäŋo kuroŋi säkgämän yäŋ yäwut!
Biŋam man tägagämän yäpmäŋ äbäk täkaŋ uwä ŋode; Saion pomken irani, Anutu täŋo bänep kwini inken pätak. U wakiken nanik tämagut täyak. Bureni, Anutujin uwä intäjukuninik itak!
Oi! Juku peŋpäŋ nadäwut; Watä ämajiyetä bänep oretoret terak gera pähap yäŋ irirä. Äma uwä ini dapuritä Ekäni Saion pom äneŋi äbäŋirän api käneŋ.
Unita Jerusalem yotpärare, gäk waŋpäŋ pat yäpmäŋ äbätan upäŋkaŋ oretoret pähap nadäŋpäŋ kap inigän kubä te!
U imata, Yawetä Jerusalem ämawebe butewaki täŋkuŋopäŋ wakiken nanik yämagurirän butewakini paotkuk.
10 Bureni-inik, Yawetä ämawebe komeni komeni iŋamikenä iniken kehäromini kudupi kwawak api yäwoŋärewek.
Täŋirän ämawebe uken-uken nanik u kuduptä Anutunin täŋo yäpätägak epän api kaŋpäŋ nadäneŋ.

Anutu täŋo epän ämatä komi bäräpi terak äroŋkuk

11  d  Eruk, Babilon kome peŋpeŋ kut! Täŋkaŋ kudupi yot täŋo tuŋum yäpmäŋ kunayäŋ täkaŋ in kudupiinik itkot. Imaka nämo iŋitta yäjiwärani u nämoinik iŋitneŋ.
12 Täŋpäkaŋ äpämaŋ kunayäŋ täkaŋ uwä kikŋutpäŋ bäräŋeŋ terak, äbekjiye orajiyetä bian iwan yabäŋ umuntaŋ Isip nanik äpämaŋ kuŋkuŋo ude nämo api kuneŋ. Nämo, Yawe, Isrel täŋo Anututä intäjukun mäden täŋ tamiŋpäŋ api tämagut yäpmäŋ kwek.

13 Nadäkaŋ? Epän ämanatä epäni täŋpayäŋ täyak u täŋirän bureni api ahäwek.
Ude täŋirän wäpi yäpmäŋ akuŋpäŋ iniŋ orerirä wäp biŋam ärowani api yäpek.

14 Upäŋkaŋ unitäŋo iŋami dapun ba gupi uwä wawani, äma bumik nämo. Unita äma mäyaptä kawä inide kubä täŋkuŋ.
15  e  Täŋpäkaŋ äma mäyaptä kawä waki täŋkuŋo udegän äma äbori äboritä epänita nadäwä ärowani api täneŋ. Ba kome täŋo äma ärowanitä kaŋpäŋ jäkjäk yamäŋpäŋ mankum api itneŋ.
U imata, dapuritä imaka kudupi ude api kawä täreneŋ, ba man kudupi ude api nadäwä täreneŋ.
Copyright information for `IOU