Isaiah 55

Aisaia 55:1-11

Ekäni täŋo iron pähap

a  Yawetä ŋode yäyak;

Eruk, umeta kotäkjin kawuktak täkaŋ in äbäkaŋ ume gwet tama naŋput! Ba moneŋjin nämo kuŋat täkaŋ inäwä äbäŋkaŋ ketem näkken yäpmäŋkaŋ naŋput yäk.
Täŋkaŋ äbäŋkaŋ ume gäripi nikek, gwäki nämo ŋo yäpmäŋkaŋ naŋput yäk.
b  Imata ketem bureni nämota moneŋ pek täkaŋ? Ba naŋpäŋ koki nämo täŋpanita komi piä imata täk täkaŋ?
Ude nämo, näkŋo man buramiŋpäŋ näkä täwet täyat ude tänayäŋ täŋo uyaku ketem tägagämäninik kubä tamiŋira naŋpä tokŋekinik api täneŋ.

c  Unita ämawebenaye, nadäwut. Näkken ämnayäŋ täkaŋ u säkgämän api itneŋ. Äbäŋirä inkät topmäk-topmäk, tärek-täreki nämo api täŋpet.
Täŋkaŋ Devitta nadäŋ imikinik täŋkuro udegän inta nadäŋ tamikinik api täŋpet.
Täŋpäkaŋ Devit uwä äma komeni komeni u yabäŋ yäwatta kehäromi ba wäpi imiŋkut. Ude täŋpäŋ uterak ämawebe u kehäromina kwawak yäwoŋäreŋkut.
Täŋ epän udewanigän inta tamayäŋ yäk. Inä ämawebe äbori äbori, komeni komeniken man pewä kuŋirä inken api ämneŋ.
Bian intä unita nämo nadäwani ba unitä inta nämo nadäwani upäŋkaŋ inken bäräŋeŋinik api ämneŋ.
Imata, Ekäni Anutujin, Isrel äbot intäŋo Anutu kudupi näkä täŋpewa u bureni-inik api ahäwek. Täŋkaŋ näk wäpjin biŋam api tamet.

d  Eruk, apiŋo Yawe tuängän itpäŋ inta itsämäŋtak unita inä äyäŋutpäŋ Yaweken gera yäŋpäŋ dubiniken kut.
Ämawebe waki täŋpani, kädet waki u peŋpäŋ äneŋi täkta nämoinik nadäŋpäŋ äneŋi Anutuken kuk täkot.
Nadäkaŋ? Anutu uwä ämawebe iniken äyäŋutpeŋ äbäk täkaŋ unita oraŋ yämiŋpäŋ momi peŋ yämikta gäripi nadäk täyak.

Täŋpäkaŋ Yawetä ŋode yäyak; Näkŋo nadäk-nadäkna u intäŋo ude nämo. Ba näkŋo täktäkna inigän inigäninik, intäŋo ude nämo.
e  Kunumtä kome kakätäŋpäŋ punininik itak udegän näkŋo täktäkna ba nadäk-nadäknatä intäŋo irepmitinik täyak yäk.

10  f  Täŋpäŋ näkŋo manna uwä iwän ude. Iwäntä taŋkaŋ äneŋi äyäŋutpeŋ näkŋaken jop nämo abäk täyak. Nämo, u kometa ume imiŋirän kome terak ketem säkgämän ahäk täkaŋ yäk. Ahäŋirä ämatä ätu yäpmäŋpäŋ naŋkaŋ ätu yerita pek täkaŋ.
11  g  Eruk, mena jinom udegän, u kwekopäŋ näkŋaken jop täga nämo äbek. Nämo, näkŋo manna u piä ude täŋpän yäŋ nadäk pek täyat u pära nämo täk täyak. Nämo, u kuŋpäŋ näkŋaken gäripna u däpmäŋ tärek täyak.
Copyright information for `IOU