Isaiah 60

Aisaia 60:1-6

Jerusalemtä Anutu täŋo peŋyäŋek terak säkgämän api irek

Ekänitä Jerusalem ŋode iwetak; Gäkŋo peŋyäŋek äbäŋ gamitak! Yawe täŋo peŋyäŋek säkgämäntä gäkä terak ijiŋ-yäŋetak unita akuŋpäŋ edap dapuri ude ijiŋ-yäŋe! U ka! Gubam kubiritä äbori äbori komeni komeni uwäk täŋirän bipmäŋ urani pähap gänaŋ itkaŋ. Upäŋkaŋ Yawetä gäkä terak ijiŋ-yäŋek täyak. Ba iniken ägonitä uwäktäŋ gamik täyak. a  Täŋirän ämawebe komeni komenitä gäkŋo peŋyäŋek kaŋpäŋ gäkken api ämneŋ. Bureni, edap dapuritä pom terak tädoreko udegän peŋyäŋeŋiri kome unitäŋo intäjukun ämatä akumaŋ gäkken api ämneŋ.

Eruk, ijiwi kwäpäŋ yabäŋ äyäŋut tä; Ämawebekaye uken-uken kuŋtäŋpä kuŋkuŋo u äneŋi äbäkaŋ. Nanakaye ban naniktä äbäkaŋ. Ba äpetkaye imaka, buramiŋ yäpmäŋ äbäkaŋ. Ude äbäŋirä yabäŋkaŋ bänepka gupka kuduptä oretoret pähap api nadäwen. Täŋpäkaŋ kadäni ugän gäpe taŋi taŋi gwägu pähap terak kuŋaranitä kome banken nanik tuŋum säkgämän säkgämän yäpmäŋ gäkken api ämneŋ. Täŋkaŋ Midian Efa komeken nanik kamel mäyaptä äbä gäkken api it tokŋeneŋ. Ba Siba nanik ämawebe gol ba imaka käbäŋi säkgämän nikekpäŋ yäpmäŋ äbäŋpäŋ Yawe täŋo wäpi biŋam api iniŋ oretneŋ.

Copyright information for `IOU