Isaiah 62

Aisaia 62:1-7

Jerusalemtä wäp kodaki api yäpek

Jerusalem, gäk nadätan? Näkä mankum nämo api iret. Nämo, gäka yäŋpäŋ ehutpäŋ yäŋapiŋtäyiwa Ekänitä täŋkentäŋ gamiŋirän irit säkgämäntä gäkä terak kwawakinik kaŋ ahäwän, kome dapuritä tamimaŋ peŋyäŋek täyak ude, ba bipmäŋ urani gänaŋ topäntä ijiŋ-yäŋek täkaŋ ude.

Anututä ude täŋkentäŋ gamiŋirän ämawebe komeni komenitä äneŋi kodak taŋpäŋ iriri api gabäneŋ. Ba unitäŋo intäjukun ämatä gäkŋo epmäget kudän kakinik api täneŋ. Täŋpäkaŋ Yawetä wäpka kodaki kubä gäweränkaŋ ugänpäŋ api gäwet täneŋ.
Bureni, Yawe Anutukatä gäk gabäŋgärip api täŋpek, ämatä porak gwäki ba notek merärokita gäripi nadäk täkaŋ ude.
a Kadäni uken wäpka Eŋi Sinsim yäŋ wari nämo api gäwetneŋ, ba Kome Waki Kawuki yäŋ wari nämo api gäwetneŋ. Nämo, wäpka kodaki kubä ŋode api gäwetneŋ;
Anututä gäripi pähap nadäŋ gamik täyak.
Ba kubä ŋode api gäwetneŋ;
Äpi nikek.
U imata, Yawetä gabäŋpäŋ gäripi pähap api nadäŋ gamek, ba komekawä webenita ude äneŋi api yäpek.
Äma gubaŋitä webe gubaŋi, ämakät nämo pärani ukät epmäŋpäŋ bok itdeŋo udegän äma gäk täŋpäŋ gepmaŋkuko unitä gäk webenita api yäpek.
Ude täŋpäŋ äma gubaŋitä webeni kodaki kaŋpäŋ gäripi pähap nadäŋ imik täyak udegän Anutukatä gabäŋpäŋ gäripi pähap api nadäŋ gamek.

Eruk, Jerusalem yewa watäni itta äma yepmaŋkuro u kepma ba bipani meni nämo täŋpipineŋ. Äbot täŋpani in Yawetä täŋkentäŋ tamikta gera yäk täkaŋ in itpäŋ-nadäk nämo täŋpäŋ gera pen yäŋirä inta nämo api guŋ täwek.
Gera ehuranigän yäŋirä Jerusalem äneŋi täŋkehärom taŋirän ämawebe äbori äbori iŋamiken intäjukuninik ude irirän kaŋkaŋ biŋam kaŋ yäwut.

U imata, Yawetä yäŋkehäromtak man ŋode yäŋkuko uwä keri kehäromitä bureni api pewän ahäwek; Ketem piäjinken nanik iwan yabäŋ äwaräkuk täŋira wari nämo päbä api yäpneŋ. Ba äma ban nanik udegän, yabäŋ äwaräkuk täŋira wain ume injin täŋpani wari nämo päbä api yäpneŋ.
Nämo, ketem piŋkuŋo unitäŋo bureni u injin naŋpäŋ Yawe näkŋo wäpna biŋam api yäpmäŋ akuneŋ. Ba wain piä täŋpäŋ watäni it täŋkuŋo u imaka, injin wain ume täkätpäŋ näkŋo kudupi yot gänaŋ naniŋ oretta api näneŋ.

Yäpätägak äma bureni äbätak!

10 Unita ämawebe Jerusalem täŋo yewa gänaŋ itkaŋ in kudup akumaŋ gägäniken kut. Kuŋpäŋ ämawebe ämnayäŋ täkaŋ unita kädet yäpä-tägawut. Kubat-kubat yejämäŋpäŋ mobä kädet miŋin pätkaŋ u kudup yäpmäŋ kewewut. Ude täŋirä ämawebe komeni komenitä ŋode api kaŋpäŋ nadäneŋ; Yawetä ämawebeniye äneŋi yämagurayäŋ täyak yäŋ api nadäneŋ.

11  b Nadäkaŋ? Yawe uwä yäŋahäk man ŋode pewän komeni komeni kuŋat moreŋkuk; Saion ämawebe ŋode kaŋ yäwerut; Tämagutta yäwani u äbätak. Täŋkaŋ ämawebe iwan keri terak nanik yäyomägatkuko u bok yäpmäŋ äbätak! 12 Eruk ämawebe unita Kudupi Ämawebe, Yawetä iwan keriken nanik yämagurani yäŋ api yäwetneŋ. Täŋpäkaŋ Jerusalem, wäpka ŋode api gäwetneŋ; Yotpärare gäripi pähap, ba Yotpärare Yawetä äneŋi päbä irani yäŋ api gäwetneŋ.

Copyright information for `IOU