Joel 2

Joel 2:12-19

Bänepjin äyäŋurut

12  a  Yawetä ŋode yäyak; Yäke, in ŋodetä nak jop itkaŋ konäm butewaki täŋpäŋ bänepjin yäpmäŋ äyäŋutinik täŋpeŋ näkken äneŋi äbut. 13  b  Momijinta nadäwä wakiinik bureni täŋpäwä tekjin jop nämo weŋgaräneŋ. Nämo, bänepjinpäŋ weŋ äreyäwut! Ude täŋpäŋ Yawe Anutujinken äneŋi kut. Nadäkaŋ? Yawe uwä orakorak, butewaki mähemi. Kokwawak bäräŋeŋ nämo nadäk täyak. U iniken ämawebeniyeta nadäŋ yämikinik täk täyak. Täŋkaŋ bäräpi yämikta bitnäk täyak. 14 Unita uken äneŋi kut. Uken kuŋirä kokwawak nadäŋ tamik täyak u peŋpäŋ butewaki nadäŋ tamiŋpäŋ iron taŋi käwep api tamek. Ude täŋ tamayäŋ täyak uwä ketem ba wain ume kaŋ-ahäŋpäŋ Yawe Anutujinta iron ude täga api peŋ imineŋ.

15 Unita momijinta yäŋpäŋ käbeyä kudupi täŋpäŋ nak jop itta Saion pom terak womat piäwut. 16 Täŋpäŋ ämawebe yäŋpäbä kubäkengän yepmaŋpäŋ Anutu gwäjiŋ äpmoŋ imikta yäŋahäŋpäŋ yäwerut. Ämawebe ekäni ba iroŋiroŋi, ba nanak paki nonoŋken irani u kudup käbeyäken ahäŋpäŋ itneŋ. Ba yanäpi kodaki imaka, eŋini peŋpeŋ äbä bok irut. 17 Äbä irirä bämop äma, Yawe iŋamiken watä epän täk täkaŋ u kudupi yot täŋo yäma ba bukä u bämopiken konäm butewaki täŋpäŋ yäŋapik man ŋode yäneŋ;

O Yawe, gäk äma äbotkaye ninta butewaki nadäŋ nimi.
Nibä kätäŋiri äma komeni komenitä nibäwä jiraŋ ude täŋpäpäŋ yäŋärok niwetpäŋ nibäŋ mägayäŋpäŋ ŋode nämo niwetneŋ; Anutujin de?
18 Ude tänayäŋ täŋo uwä Yawetä komenita nadäwätäk täŋpäŋ ämawebeniyeta butewaki api nadäŋ yämek. 19 Butewaki nadäŋ yämiŋpäŋ ŋode api yäwerek; Eruk, ketem, wain ume ba olip gakŋi bumta tama naŋ tokŋek api täneŋ yäk. Näk tabä kätäŋira äma komeni komeni u bämopiken kuŋarirä äneŋi nämoinik api taniŋ wärätneŋ.

Joel 2:28-32

Yawe täŋo kadäni pähap

28  c  Anututä ŋode yäyak; Kämiwä Munapikna ämawebe kuduptagänta kireŋ yämiŋira kudän mebäri mebäri api pewä ahäneŋ yäk.

Äpetjiye nanakjiyetä näkŋo mena jinom yäpmäŋpäŋ api yäŋahäk täneŋ.
Ba äma tägawanitä näkŋo kudän däpmonken api yabäk täneŋ.
Ba äma gubaŋijiyetä däpmonken kudän kudupi api käneŋ.
29 Bureni, kadäni uken näkŋaken Munapik äma täŋo piä watä ämawebe terak imaka, api piŋ yäbaret yäk.
30 Täŋkaŋ kepma u nämo ahäŋirän intäjukun kaŋpäŋ nadäkta näk kudän kudupi mebäri mebäri kunum gänaŋ ba kome terak api pewa ahäneŋ yäk.
Nägät, kädäp mebet, ba gupe pähap api ahäneŋ yäk.
31 Yawe täŋo kadäni umuri pähap u nämo ahäŋirän edaptä bipmäŋ urani api täŋpek. Ba komepaktä nägätgämän ude api peŋyäŋewek.
32  d  Täŋpäkaŋ kadäni uken ämawebe Yawetä täŋkentäŋ yämikta gera yänayäŋ täŋo u kudup api yämagurek.
Bureni, Yawetä ŋode yäŋkuko udegän api ahäwek; Jerusalem ämawebe ätu uwä säkgämän itta iwoyäŋkuro unita nämo api paotneŋ.
Copyright information for `IOU