Micah 6

Maika 6:1-8

Yawetä Isrel ämawebe manken yepmaŋkuk

Yawetä man yäyak ŋo juku peŋpäŋ nadäwut! Näkä in manken tepmaŋtat ŋowä mebärijin yäŋahäŋpäŋ näwerirä pom imaka, nadäwut! Oi pom, in ba kome täŋo meham kehäromi tärek-täreki nämo it täkaŋ in juku peŋpäŋ Yawetä Isrel ämawebe manken yepmaŋpäŋ man piä täŋpayäŋ täyak ŋo nadäwut.

a  Yawe näkä ŋode täwet yabätat; Ämawebenaye, näkä goret jide täŋ tamiŋkut? Ba bäräpi jide u pewa ahäŋ tamiŋkuk? Unita kowata näwerut! b  Näkägän Isip kome, komi piäken nanik in wädäŋ tädotpäŋ tämagut yäpmäŋ äbut. Kädet täwoŋäreŋpäŋ yäŋ-täkŋat yäpmäŋ äbäkta Moses kenta Aronkät Miriam upäŋ iwoyäŋpäŋ yepmaŋkut. c  O ämawebenaye, Moap nanik täŋo intäjukun äma wäpi Balak unitä waki täŋ tamikta nadäk tawaŋ peŋkuko unita juku piwut. Ude täŋ tamikta nadäk tawaŋ peŋirän Beo täŋo nanaki Balam unitä Balak iwetkuko unita imaka, nadäwut. Ba bämop äma ätu topmäk-topmäk täŋo gäpe Gilgal yotpärare yäpmäŋ kuna yäŋpäŋ Sitim kome peŋpeŋ kuŋtäŋgän ume taŋi kubäken ahäŋirä kudän näkä pewa ahäŋkuŋo unita juku piwut. Imaka udewanita juku pinayäŋ täŋo uyaku injin täŋkentäŋ tamikta jide täŋ tamiŋkuro u api nadäŋpäŋ yäpmäŋ kuŋatneŋ.

Kudän Yawetä gäripi nadäk täyak unita man

Yawe Anutu kunum gänaŋ nanik u iniŋ oretta äbäŋpäŋä imatäken upäŋ täga yäpmäŋkaŋ äbet?
Bulimakau nanaki säkgämäninik upäŋ yäpmäŋ päbä ironta ude täga ijiŋ imet?
Ba sipsip ämani tausen mäyapinik iŋamiken yäpmäŋ äbäŋira gäripi nadäwek ba nämo?
Ba olip gakŋi käbot tausen mäyapinik udepäŋ yäpmäŋ äbäŋira Yawetä unita gäripi nadäwek ba nämo?
Ba nanakna intäjukun nanik mominata kowata utpäŋ iniŋ kirewero uwä iŋamiken tägawek?
d  Ude nämo! Yawetä kädet täga nintä täkta uku bian niwetpäŋ niwoŋäreŋkuk. Unita kädet ugänpäŋ täkta nadäk täyak. Kädet u ŋode;
Ämata kudän siwoŋi täŋ yämiŋkaŋ orakorak kädet iwatpäŋ nininta nadäna äpani täŋpäpäŋ Anutunin gämoriken kuŋatpäŋ ukät bänep kubägän itne.
Copyright information for `IOU