a5:1-2Mt 24:42-43; 2Pi 3:10; Lap 3:3
b5:3Mt 24:39; Lk 21:34-35
c5:5-7Lom 13:11-12
d5:8Ais 59:17; Ep 6:14-15,17
e5:10Lom 14:7-9; 1Tes 4:13-14
f5:142Tes 3:6-11
g5:15Lom 12:17-18; 1Pi 3:8-12
h5:16Pl 4:4
i5:18Ep 5:20
j5:19Ep 4:30
k5:21-221Jo 4:1-3
l5:232Tes 3:3
m5:25Kol 4:2-4; 2Tes 3:1

1 Thessalonians 5

Nanima Lee Tatawa, Mini Kimbu Piyene Yakale Atamakale Leane Oko

Amene imalini yame, pake mialane akali mindi bala oko angi epolopeya nembo natene, nanimato limu paleyama-kola, bala utulu epoto, pake mialane. Wuane piyaini pua teke, nanimato Akali Andane oko bala oko angi epolopeya nembo natene atoloma-kola, bala dee lapone epolopeya oko yakama tane wayumane nemboto ateyai okoni. Tene okonena, nanimato yakama languato, Akali Andane oko bala ee ana okona epolopeya, oto okona epolopeya lo, yakamana pepa mindi nanimato peyo epe loto, okonena yakama langulane tene mindi napaleya. a 

Wanda mindi bala andopane tongo taka pituto, ana kambua kuai lo pitiyane tekeko, matili masia peleya-kola, tandaka pene oko balanga kapoyale epalane. Wuane piyane pua teke, wandakali minditupa-mane loto, andipa nanima yanda napene, epene kuai lo ateyama lalaini tekeko, okone angi teke kenda-pene andane mindi wandakali utupanenga epalane. Epeya-kola, kenda-pene okone wandakali utupane yakamanga epolane lo asia peyo wanjialu palaka polane asini mindi nayalane. b 

Pake mialane akali mindi undupi pango epeya-kola, wandakali-mane andoto, moko lalaini tekeko, amene imalini yame, yakama undupi-lene okona ata napeyai. Jia. Yakama pitaka otonga waa lene okona wandakali ateyai. Tene okonena Akali Andane oko bala dee lapone epola-angi, yakamato moko nalape-pene.

Limu paliyaini wandakali tupamane utulu limu paliyaini. Bia ipa kambua noto, sapake lo kewa atalaini wandakali tupamane utulu teke bia ipa tai noto, sapake lo kewa atalaini. Undupi-lene okona atalaini wandakali utupane-mane wuane piyaini tekeko, nanima undupi-lene okona ata napeyama. Jia. Undupi-lene okona atalaini wandakali tupamane utulu limu paliyaini pua, nanima limu pali napimakale. Jia. Kitisene wandakali nanimato lee tatawa mini kimbu piyene yakale atamakale. c 

Wuane puato, nanima otonga waa lene okona wandakali gulo atoto, Satane towa yanda puyale makande pitawa atamakale. Nanimato Gote lo bilipi lene mana okola, wandakali yangone tupa towa epelewa yamapane yo atene mana okola, mana okonelapo nanimana sia umbi gulo awua atamakale. Akali minditupa-mane yanda puyale tangi tai mindi anda piyaini pua, Goteto nanima moyolo-peya lo maliyo atene mana okone nanimana tangi tai anda pitawa atamakale. Wuane pua atoto, nanima mini kimbu piyene yakale atamakale. d 

Anu peakale nambato wuane pimakale leyope. Goteto nanima balana yataka ene oko mialapale loto, nanima makimi lata nayaepia. Jia. Nanimana Akali Andane Jisasa Kataisato nanima molo-peke leakale nembo toto, Goteto nanima makimi lata yaepia. 10 Balato wuane peane okonena, nanima saka atemandopi, omemandopi, Jisasato nanima bala towa atu atalapale nembo toto, nanima molo-peke loyale omeaipia. e 

Yakamato Mindi Akali Mo Tai Laya Aka Pua Atalapape Leane Oko

11 Jisasato wuane peane okonena, yakamato pii epene tupa mindi akali lamai-lamai pua atoto, mindi akali mo tai laya aka pua atalaini pua teke atalapape. 12 Amene imalini yame, akali minditupa-mane yakama moyo ando ateakale loto, Akali Andane okomane akali utupane ate leane. Akali utupane-mane Gotena piape puato, yakamato wua piyapape lo mana langua atalaini. 13 Akali utupane-mane Gotena piape pua ateyai nembo toto, yakamato akali utupane towa epelewa yamapane yoto, akali utupanena gene tupa laiyu lalapape. Yakamato wuane puato, pii yanda napene, yamapane mindiki palu atalapape.

14 Amene imalini yame, nanimato yakama mo tai laya wato, yakama wua pua atalapape leyama. Wandakali minditupa-mane piape napene, kepawa mee atolai-kola, yakamato utupane mana lamawuato, piape pua atalapape lalapape. Yukuwa atalaini wandakali tupamane yuku olaini lo, yakamato wandakali utupane mo tai layawa atalapape. Tai nalene wandakali atolai tupa moyoto, yakamato kii mawua piape pimai-yapape. Yakamato wandakali yangone mindi towa kepa naene, wandakali pitaka towa tambo lo atalapape. f 

15 Wandakali mindimane yakamanga mana koo mindi mineando, yakamato paini yano peyo balanga mana koo mindi mina na-piyapape. Yakamato wuane napene, ole dindi lo Kitisene wandakali tupapi, wandakali waka tupapi, utupane pitaka towa mana epene tupa minu atalapape. g  16 Wuane pua atoto, ole dindi lo yakama epelewa atalapape. h 

17 Ole dindi lo pote lalapape. 18 Yakama kuai lo ateaindopi, kenda-pene awua ateaindopi, yakamato Gote ando wayu pele lalapape. Yakamato Jisasa Kataisa lo bilipi loto, mana epene utupane wato minalapape. Gote tane yakamato wuane piyapale nembo teya-kola, yakamato wuane piyapape leyo. i  19 Yakamato piape epene mindi piyapale loto, Oli Sipitisa okomane yakama mina ika lola-kola, yakamato balana piape okone jia na-lalapape. j 

20 Akali mindimane Gotena pii layene oko yakama langula-kola, yakamato pii okone koo ya loto, masia mai na-piyapape. 21 Yakamato pii manapi, utupane pitaka yapa lo tale puato, pii koopi, mana koopi, utupane pitaka masia mawua atoto, pii epenepi, mana epenepi, utupane duli lo minatawa atalapape. k 

23 Nanimana yamapane mo epene paliya alane Gote okomane yakamana tandinipi, nembo-tenepi, umbainipi, utupane pitaka mo epene wete gulaya yakale loto, nanimato pote leyama. Goteto wuane pula-kola, nanimana Akali Andane Jisasa Kataisa bala dee lapone epola-angi, Gotena wenonga yakamanga koo tene mindi yaa napene atalapale loto, nanimato pote leyama. l 

24 Yakama ee lo meane Gote okomane mangene mindi pukale lalu, enene piyane. Tene okonena, balato minditaka pukale leane tupa katulo pulupeya. 25 Amene imalini yame, Goteto nanimapi moyakalenga, yakamato Gote lo pote lalapape. m  26 Yakamato Kitisene mana tupa wato minuto, Kitisene yangone tupa pitaka towa epelewa sikane lalapape.

27 Nambato Akali Andane okona gene oko loto, yakama pii langeyo nayu loto, Kitisene wandakali pitaka-mane pii pepanga peleyo utupa ale yakalenga, yakamato pepa oko dii loto, lamai-yapape leyo. 28 Nanimana Akali Andane Jisasa Kataisato yakama ondowa moyo ateakale lo pote leyo.

Copyright information for `IPI