1 Corinthians 14

Biŋ ŋagêdô kêpi moasiŋ Ŋalauŋa

Amacnêm lêŋ epeŋ têmtac êwiŋ ŋanôŋa ma atu kêka-kêka moasiŋ Ŋalauŋa ma taêm êka moasiŋ aoc Anôtônê biŋ lasêŋa êtu ŋamatageŋ, gebe ŋac, taŋ kêsôm biŋ aweŋ ŋataIôŋa naŋ, kêsôm biŋ gêdêŋ ŋamalac atom, kêsôm gêdêŋ Anôtô taugeŋ. Lau teŋ sêŋô biŋ tonaŋ atom, Ŋalau kêkac eŋ tec kêsôm biŋ, taŋ gêc lêlômgeŋ naŋ. Mago ŋac, taŋ geoc Anôtônê biŋ lasê naŋ, kêsôm biŋ gêdêŋ ŋamalac ma gêboa êsêac sa to gêlêŋ biŋ êsêac ma gêjam malô nêŋ ŋalêlôm. Ŋac taŋ kêsôm biŋ aweŋ ŋatalôŋa naŋ, gêboa tau sa, mago ŋac, taŋ geoc Anôtônê biŋ lasê naŋ, gêboa gôlôac dabuŋ sa amboac tonaŋ. Aê gabe amac samob asôm biŋ aweŋ ŋatalôŋa, mago aê têtac gêwiŋ kêlêlêc gebe aoc Anôtônê biŋ lasê. Ŋac taŋ geoc Anôtônê biŋ lasê naŋ, kêmoasiŋ gôlôac kêlêlêc ŋac, taŋ kêsôm biŋ aweŋ ŋatalôŋa naŋ su. Tageŋ ŋac teŋ embe êwa ênê biŋ tau sa e êmboa gôlôac dabuŋ sa, oc êtôm amboac tonaŋgeŋ.

O lasitêwaac, aê embe jandêŋ amac wacjasôm biŋ aweŋ ŋatalôŋa, oc janam amac sa amboac ondoc. Aê embe jasôm biŋ, taŋ gêc lêlômgeŋ naŋ, lasê ma jawa kauc ŋam sa me jaoc Anôtônê biŋ lasê ma jandôŋ mêtê êndêŋ amac atom, oc janam amac sa atom. Gêŋ taŋ takôc kêtu tanam wê êsêpŋa amboac gasuc me kaliŋgwaŋ naŋ, embe sêju me sênac ŋalêŋ tageŋ ŋapaŋ, oc tajala ŋaawa, taŋ êsêac sebe sêju me sênac naŋ amboac ondoc. Ma dauc embe êtaŋ meloc-meloc, go asa êmansaŋ tau atu ênac siŋŋa. Amacnêm biŋ amboac tonaŋ. Amac embe asôm biŋ ênêc awê atom, asôm biŋ aweŋ ŋataIôŋageŋ, oc sêjala biŋ, taŋ asôm naŋ amboac ondoc. Amac oc asôm nêm biŋ êsêp sawa. 10 Lau nomŋa nêŋ aweŋ tokaiŋ-tokaiŋ, mago aweŋ samob toŋam. 11 Aê embe jajala ŋac teŋ awa ŋam atom, go ŋac, taŋ kêsôm tau awa naŋ, êlic aê amboac ŋac jaba, ma aê oc jalic eŋ amboac ŋac jaba amboac tonaŋ. 12 Amac amboac tonaŋ. Amac atu kêka-kêka moasiŋ Ŋalauŋa, tec ansom moasiŋ, taŋ emboa gôlôac dabuŋ sa naŋ, e ênam amac aucgeŋ.

13 Amboac tonaŋ ŋac, taŋ kêsôm biŋ aweŋ ŋatalôŋa naŋ, eteŋ mec êndêŋ Anôtô gebe êkêŋ moasiŋ êwa biŋ saŋa êndêŋ eŋ êwiŋ. 14 Aê embe jateŋ mec jasôm biŋ aweŋ ŋatalôŋa, go ŋoc ŋalau eteŋ mec, mago ŋoc kauc oc êjala ŋam atom. 15 Biŋ tau amboac ondoc. Aê gabe ŋoc ŋalau embe eteŋ mec, naŋ ŋoc kauc eteŋ êwiŋ. Ŋoc ŋalau embe ênam wê, naŋ ŋoc kauc ênam êwiŋ. 16 Nêm ŋalaugeŋ embe ênam daŋge Anôtô, go lau ŋagêdô, taŋ sêmoa naŋ, sênac mata nêm mec ma sêsôm gebe “Biŋŋanô” sêwiŋ naŋ amboac ondoc. Êsêac sêjam kauc biŋ, taŋ koteŋ naŋ. 17 Aôm oc gôjam daŋge Anôtô ŋajamgeŋ, tageŋ nêm mec gêboa lau ŋagêdô sa gêwiŋ atom.

18 Aê gajam daŋge Anôtô kêtu kasôm biŋ aweŋ ŋatalôŋa kêlêlêc amac samob suŋa. 19 Mago aŋga gôlôac dabuŋ ŋalêlôm embe jasôm biŋ tokauc ŋalô lemeŋ teŋgeŋ gebe jandôŋ lau ŋagêdôŋa, oc ŋajam êlêlêc jasôm biŋ aweŋ ŋatalôŋa ŋalô 10,000 su.

20 O lasitêwaac, taêm ênam biŋ atôm ŋapalê sauŋ taêŋ gêjam nec atom. Taêm ênam biŋ atôm lau kapôêŋ taêŋ gêjam. Mago lêŋ secŋa tec atôm ŋapalê dedecmaŋ. 21 Apômtau kêsôm biŋ teto gêc gebe

“Aê jasôm biŋ êndêŋ lau tônê janam lau jaba aweŋ
to janam lau, naŋ sêsôm biŋ jaba laŋôŋ.
Mago êsêac oc sêkêŋ taŋeŋ aê atom.”
22 Amboac tonaŋ biŋ aweŋ ŋatalôŋa kêtu lau- sêkêŋ-gêwiŋwaga nêŋ ŋabelo atom, kêtu lau-sêkêŋ- gêwiŋ-atomwaga nêŋ ŋabelo. Ma daoc Anôtônê biŋ lasêŋa kêtu lau-sêkêŋ-gêwiŋ-atomwaga nêŋ ŋabelo atom, kêtu lau-sêkêŋ-gêwiŋwaga nêŋ ŋabelo. 23 Gôlôac dabuŋ embe samob sêkac tauŋ sa ma samob sêsôm biŋ aweŋ ŋatalôŋa, go lau ŋagêdô me lau samuc, taŋ nasêwiŋ naŋ, oc sêsôm biŋ amboac ondoc. Oc sêsôm gebe meloc kêtê amac. 24 Mago samob embe seoc Anôtônê biŋ lasê ma ŋac samuc teŋ me ŋac jaba teŋ embe naêwiŋ, oc samob nêŋ biŋ epeŋ to êmêtôc eŋ 25 e biŋ, taŋ kêsiŋ tau gêc nê ŋalêlôm naŋ, êtu awê, go êu tau laŋôanô êndêŋ nom etoc Anôtô sa ma êsôm lasê ênêc awêgeŋ gebe “Anôtô gêmoa gêwiŋ amac biŋŋanôgoc.”

Daŋgôm nêŋ gê ŋ samob ŋapep sawa

26 O lasitêwaac, biŋ tonaŋ ŋam amboac ondoc. Amac embe akac taôm sa, go ŋac teŋ êpuc wê teŋ sa, teŋ êndôŋ mêtê, teŋ êsôm biŋ, taŋ gêc lêlômgeŋ naŋ, lasê, teŋ êsôm biŋ aweŋ ŋatalôŋa ma teŋ êwa biŋ tau sa. Gêŋ samob tonaŋ ŋai aŋgôm êtu amboa gôlôac dabuŋ saŋa. 27 Lau embe sêsôm biŋ aweŋ ŋatalôŋa, go ŋac luagêc me têlêac sêsôm biŋ ma êtôm. Êsêac sêsôm biŋ sêndênaŋ tauŋgeŋ ma ŋac teŋ êwa biŋ tau sa. 28 Ŋac êwa biŋ saŋa teŋ embe êmoa atom, go ŋac êsôm biŋ aweŋ ŋatalôŋa ênam tau tôŋ êndêŋ gôlôac dabuŋ, êsôm biŋ ênêc eŋ tau to Anôtôŋageŋ. 29 Ŋac luagêc me têlêac seoc Anôtônê biŋ lasê ma lau ŋagêdô sênsaê biŋ tau. 30 Anôtô embe eoc biŋ, taŋ gêc lêlômgeŋ naŋ, teŋ lasê êndêŋ ŋac teŋ, taŋ gêŋgôŋ gôlôac ŋalêlôm naŋ, go ŋac, taŋ kêsôm biŋ gêmoa naŋ, êôc nê biŋ tôŋ acgom. 31 Amac samob atôm gebe aoc Anôtônê biŋ lasê asôm ajô taôm-ajô taômgeŋ e andôŋ lau to alêŋ biŋ lau samob. 32 Lau seoc biŋ lasêŋa nêŋ ŋalau taŋeŋ wamu êndêŋ êsêac, taŋ seoc biŋ lasê naŋ, 33 gebe Anôtô kêtu gêŋ wauc-waucgeŋ ŋaAnôtô atom, kêtu biŋmalô ŋaAnôtô.

Mêtê taŋ sêgôm aŋga Anôtônê launêŋ gôlôac samob naŋ, sêŋgôm aŋga amacnêm amboac tonaŋ gebe
34 Gôlôac embe sêkac sa, go lauo sênam tauŋ tôŋ. Alôc gebe sêsôm biŋ nec atom. Êsêac sêkôniŋ tauŋ êtôm Anôtônê biŋsu kêsôm. 35 Lauo embe taêŋ ênam gebe sêjala biŋ ŋagêdô êtu tôŋ, go têtu kênac nêŋ ŋaci aŋga tauŋ nêŋ êndumaŋ. Gôlôac embe sêkac sa ma awê teŋ embe êsôm biŋ, oc êtu biŋ majeŋŋa. 36 Taôm asôm acgom, Anôtônê biŋ kêsa aŋga amac taômgeŋ nêm me gêsuŋ tau gêdêŋ amac taômgeŋ gêwac me.

37 Ŋac teŋ embe êlic tau gebe ŋac eoc Anôtônê biŋ lasêŋa me êwê kaiŋ moasiŋ Ŋalauŋa teŋ, naŋ êjala gebe biŋ, taŋ aê kato gêdêŋ amac naŋ, Apômtaunê jatu. 38 Eŋ embe êjala biŋ tonaŋ atom, oc amac ajala eŋ atom amboac tonaŋ. 39 O lasitêwaac, amboac tonaŋ atu kêka-kêka gebe aoc Anôtônê biŋ lasê ma akô lau, taŋ sêsôm biŋ aweŋ ŋatalôŋa naŋ, auc atom. 40 Aŋgôm gêŋ samob naêndêŋgeŋ ma êtôm ŋagôliŋgeŋ.

Copyright information for `JAE