1 Corinthians 8

Biŋ kêpi gêŋ taniŋŋa, taŋ sêkêŋ kêtu da gêdêŋ gwam

Biŋ kêpi da gwamŋa amboac tonec. Aêac tajala gebe aêac samob tatap kauc sêŋac. Mago kauc tonaŋ kêkêli ŋamalac e tetoc tauŋ sa, ma têntac gêwiŋ ŋanô tau tec gêboa gôlôac sa. Ŋac taŋ taê gêjam gebe kêjala gêŋgac, mago eŋ kêjala gêŋ tau e jagêdêŋ ŋamadiŋ atom tageŋ. Ŋac teŋ embe têtac êwiŋ Anôtô, naŋ Anôtô oc êjala eŋ.

Biŋ kêpi taniŋ gêŋ, taŋ sêkêŋ kêtu da gêdêŋ gwamŋa naŋ, amboac tonec. Aêac tajala gebe “gwam mata jali teŋ gêmoa nom atom,” tajala gebe “Anôtô ŋanô tageŋ tec gêmoa.” Êsêac oc sêsam ŋaclai undambê to nomŋa ŋagêdô gebe anôtôi kêtôm “anôtôi” to “apômtaui” taêsam sêmoa. Mago Anôtô tageŋ tec kêtu aêacnêŋ Tameŋi. Eŋ kêkêŋ gêŋ samob ma aêac tamoa tapeŋ eŋgeŋ. Ma Apômtau tageŋ gêmoa, Jesu Kilisi. Anôtô kêkêŋ gêŋ samob ŋa eŋgeŋ, ma aêac tamoa ŋa eŋgeŋ.

Mago samob têtap kauc tonaŋ sa atom. Lau ŋagêdô, taŋ gêmuŋgeŋ sêsa lêŋ gwamŋa naŋ, sêsap gwam ŋalêŋ tôŋ e mêŋgêdêŋ galoc. Êsêac seŋ gwada da gwamŋa ŋanô teŋ e gêgôm nêŋ ŋalêlôm palê-palê ŋatêmui kêsa. Gêŋ taniŋŋa oc êwaka aêac sa êndêŋ Anôtô atom. Embe taniŋ gêŋ atom, oc tasô gêŋ ŋanô teŋ atom. Ma embe taniŋ gêŋ, oc tatap ŋanô teŋ sa êlêlêc su atom amboac tonaŋgeŋ. Tageŋ alic taôm gebe gêŋ, taŋ amac asaê gebe atôm gebe oc aŋgôm naŋ, êlênsôŋ lau palê-palê atom. 10 Ŋac ŋalêlôm palê-palê teŋ embe êlic aôm, taŋ nêm kauc kêsa kêpi biŋ tonaŋ naŋ, ôniŋ gêŋ ôŋgôŋ lôm gwamŋa, oc êôc awasuŋ tôŋ êndêŋ gêŋ gwamŋa tau me. Masigoc. 11 Aômnêm kauc oc êjaiŋ ŋac palê-palê tonaŋ e ênaŋa. Mago ŋac tau tonaŋ kêtu aôm lasim ma Kilisi gêmac êndu kêtu eŋŋa. 12 Embe aŋgôm sec êndêŋ lasitêwai amboac tonaŋ e êlênsôŋ nêŋ ŋalêlôm palê-palê, go aŋgôm sec êndêŋ Kilisi tau. 13 Kêtu tonaŋŋa gêŋ taniŋŋa embe êtim lasic, go janiŋ gwada teŋ êtiam atomanô gebe jatim lasic e êtu sec nec atom.

Copyright information for `JAE