1 Kings 21

Ahab kêjaŋgo Nabotnê kôm wainŋa su

Ŋac Jesrelŋa teŋ ŋaê Nabot nê kôm wainŋa teŋ gêc Jesrel kêsi kiŋ Samariaŋa Ahab nê andu. Ma Ahab kasôm gêdêŋ Nabot gebe “Ôkêŋ nêm kôm wainŋa tonaŋ êndêŋ aê. Aê gabe jakôc êtu kôm gêŋ gagaŋa teŋ gebe gêc kêdabiŋ ŋoc andu. Aê oc jakêŋ kôm wainŋa ŋajamanô êlêlêc teŋ êndêŋ aôm êjô me embe taêm ênam teŋ, go jakêŋ mone êjô.” Mago Nabot kêsôm gêdêŋ Ahab gebe “Aê katêc Apômtau, tec oc jakêŋ tamoci nêŋ kômlênsêm êndêŋ aôm atom.” Ahab têtac ŋandaŋ ma tolaŋôsigeŋ kêsô nê andu jagêc nê mê ma kêkac nê laŋôanô ôkwi ma gebe êniŋ gêŋ atom kêtu biŋ, taŋ ŋac Jesrelŋa Nabot kêsôm gêdêŋ eŋ gebe “Aê oc jakêŋ tamocinêŋ kômlênsêm êndêŋ aôm atom” naŋŋa.

Mago nê awê Jesebel gêdêŋ eŋ jakêsôm gebe “Aôm têmtac ŋandaŋ e godec gêŋ kêtu asageŋŋa.” Eŋ gêjô awê tau awa gebe “Aê gajam biŋgalôm gawiŋ ŋac Jesrelŋa Nabot ma kasôm gebe ‘Ôkêŋ nêm kôm wainŋa janam ôli ŋa mone me embe ôlic ŋajam oc jajô ŋa kôm wainŋa teŋ.’ Ma eŋ gêjô aêŋoc biŋ gebe ‘Aê gabe jakêŋ ŋoc kôm wainŋa êndêŋ aôm atom.’” Go nê awê Jesebel kêsôm gêdêŋ eŋ gebe “Aôm Israelnêŋ kiŋ me masi. Ôndi ôniŋ gêŋ ma têmtac ŋajam êsa. Aê gabe jakêŋ Nabotnê kôm wainŋa êndêŋ aôm.”

Amboac tonaŋ eŋ keto papia gêjam Ahab awa ma kepeŋ Ahabnê ŋatalô kêpi ma kêsakiŋ papia dansaŋ gêdêŋ gejobwaga to gôliŋwaga, taŋ sêŋgôŋ Nabotnê malac naŋ. Ma eŋ keto biŋ amboac tonec gêc papia tau gebe “Akêŋ noc anam dabuŋ moŋa teŋ ma atoc Nabotnê sa êŋgôŋ lau samob ŋamata. 10 Ma akêŋ kalomtêna luagêc sêŋgôŋ sêkanôŋ eŋ ma êsêagêc sêŋgôliŋ biŋ êpi Nabot gebe ‘Aôm kôpuc boa Anôtô to kiŋ.’ Go akôc eŋ asa awê ana ma atuc eŋ ŋa poc êndu.” 11 Gejobwaga to gôliŋwaga sêgôm Jesebelnê biŋ ŋanô kêsa kêtôm biŋ gêc papia, taŋ eŋ kêsakiŋ gêdêŋ êsêac naŋ. 12 Êsêac sêmasaŋ noc sênam dabuŋ moŋa teŋ ma sêkêŋ Nabot gêŋgôŋ lau samob ŋamata. 13 Ma kalomtêna luagêc sêsô jasêŋgôŋ sêkanôŋ eŋ. Ma êsêagêc sêgôliŋ biŋ kêpi Nabot sêmoa lau samob laŋôŋnêmŋa ma sêsôm gebe “Nabot kêpuc boa Anôtô to kiŋ.” Amboac tonaŋ sê eŋ aŋga malac sêsa jatêtuc eŋ ŋa poc êndu. 14 Go êsêac sêsakiŋ biŋ gêdêŋ Jesebel gebe “Têtuc Nabot ŋa poc êndu ma gêmac êndu su.”

15 Jesebel gêŋô biŋ tau gebe têtuc Nabot ŋa poc êndu ma gêmac êndu su, go sebeŋ kêsôm gêdêŋ Ahab gebe “Ôndi sa, ôkôc ŋac Jesrelŋa Nabot nê kôm wainŋa, taŋ eŋ gedec aôm ônam ôli naŋ, gebe Nabot gêmoa mata jaliŋa kêtiam atom, eŋ gêmac êndu sugac.” 16 Ahab gêŋô Nabot gêmac êndu ŋawae, tec sebeŋ gêdi sa jakêsêp gêdêŋ Nabotnê kôm wainŋa gebe êkôc êtu ênê gêŋ.

17 Go Apômtaunê biŋ gêdêŋ ŋac Tisbetŋa Elia amboac tonec gebe 18 “Ôndi naôsêp ôndac kiŋ Israelŋa Ahab, taŋ gêŋgôŋ Samaria naŋ. Ma ôlic acgom, eŋ jagêmoa Nabotnê kôm wainŋa. Eŋ gêja gebe êkôc kôm tau su êtu ênê gêŋ. 19 Ma aôm oc ôsôm êndêŋ eŋ gebe ‘Apômtau kêsôm amboac tonec gebe Aôm gôjac ŋamalac êndu ma kôjaŋgo launêŋ gêŋ su kêtu aômnêm me.’ Ma aôm oc ôsôm êndêŋ eŋ gebe ‘Apômtau kêsôm amboac tonec gebe Aŋga gamêŋ, naŋ kêam têdamôê Nabotnê dec naŋ, oc têndamôê aôm taômnêm dec amboac tonaŋgeŋ.’”

20 Ahab kêsôm gêdêŋ Elia gebe “Ŋoc o aôm, kôtap aê sa me.” Elia gêjô ênê biŋ gebe “Aê katap aôm sa. Aôm kôkêŋ taôm gêdêŋ gêŋ, taŋ gêjac Apômtaunê mataanô sec samucgeŋ naŋ. 21 Ôlic acgom, aê oc jakêŋ gêŋwapac êpi aôm. Aê gabe janseŋ aômnêm gôlôac ŋac samucgeŋ ma oc jandim nêm lau wakuc to laŋgwa êŋgic tomalageŋ aŋga Israel. 22 Ma aê oc janseŋ aômnêm gôlôac êtôm gagôm gêdêŋ Nebat latu Jerobeam ma Ahija latu Basa nêŋ gôlôac naŋ, gebe aôm gôgôm aê têtac ŋandaŋ kêsa ma kôlêtôm lau Israel e sêgôm sec.’ 23 Ma Apômtau kêsôm biŋ kêpi Jesebel gebe ‘Kêam oc sêniŋ eŋ aŋga gamêŋ Jesrel ŋalêlôm.’ 24 Ahabnê teŋ embe êmac andu aŋga malac ŋalêlôm, naŋ kêam oc sêniŋ, ma teŋ embe êmac êndu aŋga awêŋa, naŋ moc umboŋ ŋalabuŋa oc sêniŋ.”

25 Ŋac sec teŋ kêtôm Ahab gêmoa atom. Nê awê Jesebel kêkêli eŋ e kêkêŋ tau-êŋgôm gêŋ, taŋ Apômtau gêlic sec naŋ, 26 Eŋ gêgôm gêŋ alôb-alôb gebe kadaguc anôtôi gwam kêtôm lau Amor, taŋ Apômtau geseŋ êsêac su aŋga Israel laŋônêmŋa naŋ.

27 Gêdêŋ taŋ Ahab gêŋô biŋ tonaŋ naŋ, eŋ kêkac nê ŋakwê gêŋgic ma kêsô talu ŋagoneŋ ma gêbu tau ŋanôgeŋ, gêjam dabuŋ mo ma gêc bêc totalugeŋ ma gêmoa tonê ŋalêlôm ŋatutucgeŋ. 28 Ma Apômtaunê biŋ gêdêŋ ŋac Tisbetŋa Elia gebe 29 “Aôm gôlic Ahab kêpôŋ tau tulu-tulu gêmoa aê laŋônêmŋa nec me masi. Kêtu eŋ gêbu tau gêmoa aê laŋôcnêm ŋa aê jakêŋ gêŋwapac êndêŋ ŋasawa eŋ êmoa mata jaliŋa naŋ atom. Jakêŋ gêŋwapac êndêŋ eŋ latui nêŋ têm.”

Copyright information for `JAE