1 Samuel 13

Saul gêjac siŋ gêdêŋ lau Pilisti

Saulnê jala kêtu ... * ma eŋ kêtu kiŋ, ma eŋ gêjam gôliŋ Israel jala .... * Eŋ kêjaliŋ ŋacwaga 3,000 sa aŋga Israel. 2,000 sêmoa sêwiŋ eŋ sêŋgôŋ malac Mikmas to gamêŋ lôc Betelŋa. Ma 1,000 sêmoa sêwiŋ Jonatan sêŋgôŋ malac Gibea Benjaminŋa. Lau siŋ ŋagêdô samob Saul gêwi siŋ sêmu sêja nêŋ malac.

Go Jonatan gêjac lau Pilisti nêŋ gejobwaga, taŋ gêŋgôŋ Gibea naŋ êndu. Lau Pilisti sêŋô biŋ tonaŋ ŋawae. Go Saul kêjatu lau sêjac dauc kêtaŋ kêtôm gamêŋgeŋ ma kêjatu gebe “Lau Hebrai sêkêŋ taŋeŋmaŋ.” Lau Israel samob sêŋô Saul gêjac Pilisti nêŋ gejobwaga êndu ŋawae ma sêŋô gebe nêŋ waeŋ kêtu sec aŋga lau Pilisti nêŋ. Ma Saul kêkalem lau samob gebe sêndaŋguc eŋ sêna malac Gilgal.

Lau Pilisti sêkac tauŋ sa sebe sênac siŋ êndêŋ Israel. Êsêacnêŋ kareta siŋŋa 3,000 to lau sêŋgôŋ hos ŋaôŋa 6,000 ma lau siŋ ŋagêdô taêsam ŋanô lasê kêtôm gaŋac gwêcŋa. Êsêac sêpi jasê nêŋ becobo aŋga malac Mikmas, taŋ gec Bet Awen ŋamakeŋ oc kêpiŋa naŋ. Gêdêŋ taŋ lau Israel sêlic gebe lau Pilisti oc sêôc êsêac popoc gebe sêkapiŋ êsêac sa ŋanôgeŋ naŋ, êsêac sêsiŋ tauŋ ôkwi semoa poclabu to nom gêsuŋ ma poc kapôêŋ-kapôêŋ ŋasawa to sê tuc ma sê buŋa. Ma ŋagêdô selom bu Jordan jasêmoa Gad to Gilead ŋagamêŋ. Saul gacgeŋ gêmoa malac Gilgal ma lau samob, taŋ têdaguc eŋ naŋ, têtêc tauŋ ŋasec.

Saul kêsaê bêc 7, kêtôm taŋ Samuel kêsam gêdêŋ eŋ gebe naêndac eŋ naŋ, mago Samuel jagêô lasê Gilgal atom. Amboac tonaŋ lau sêwi Saul siŋ-siŋ sêja. Tec Saul kêsôm gebe “Akôc daja to dawama andêŋ aê amêŋ.” Ma eŋ tau kakêŋ daja tonaŋ. 10 Saul kêkêŋ da tau gêbacnê su, go Samuel mêŋgêô lasê. Saul kêpuc eŋ tôŋ-tôŋ gebe ê moalêc eŋ. 11 Mago Samuel kêsôm gebe “Aôm gôgôm asageŋ.” Ma Saul gêjô eŋ awa gebe “Aê galic lau sêwi aê siŋ ma aôm gômôêŋ kêtôm gôjac noc naŋ atom ma lau Pilisti sêkac tauŋ sa aŋga Mikmas, 12 tec taêc gêjam gebe lau Pilisti oc sêsêp Gilgal mêŋsênac aê êmuŋ noc jamansaŋ biŋ êndêŋ Apômtau êtu êlic aê ŋajamŋa. Amboac tonaŋ ŋoc ŋalêlôm kêkac aê ma kakêŋ daja tau.” 13 Go Samuel kêsôm gêdêŋ Saul gebe “Aôm gôgôm gêŋ meloc, gôgôm Apômtau, aômnêm Anôtô, nê biŋsu, taŋ kêjatu aôm naŋ, ŋanô kêsa atom. Embe ôŋgôm ŋanô êsa oc Apômtau ênac dabiŋ aôm gebe ôtu Israelnêŋ kiŋ endeŋ tôŋgeŋ. 14 Mago galoc nêm gôliŋ kiŋŋa oc ênêc endeŋ tôŋgeŋ atom. Apômtau kêjaliŋ nê ŋac teŋ sa kêtôm ênê ŋalêlôm ma kêkêŋ eŋ kêtu ênê launêŋ gôliŋwaga gebe aôm gôgôm biŋ, taŋ Anôtô kêjatu aôm naŋ, ŋanô kêsa atom.” 15 Ma Samuel gêdi aŋga Gilgal jakêpi malac Gibea Benjaminŋa.

Saul kêsa lau, taŋ sêmoa sêwiŋ eŋ naŋ sa. Lau tau amboac 600 geŋ.
16 Saul agêc latu Jonatan ma lau, taŋ sêmoa sêwiŋ eŋ naŋ, jasêŋgôŋ malac Gibea Benjaminŋa ma lau Pilisti sêŋgôŋ nêŋ becobo aŋga malac Mikmas. 17 Aŋga tonaŋ lau Pilisti sêsakiŋ siŋwaga gebe sêjaŋgo launêŋ gêŋ. Êsêac sêwa tauŋ kêkôc gêja mata têlêac. Mata teŋ gêja malac Opra, taŋ gêc gamêŋ Sualŋa. Mata teŋ gêja malac Bet Horon 18 ma teŋ kepeŋ gamêŋ ŋabau, taŋ sêkô ma sêlic gaboaŋ Seboim to gamêŋ sawa naŋ.

19 Aŋga gamêŋ Israel samucgeŋ ŋackêpac-kiwaga teŋ gêmoa atom gebe lau Pilisti sêsôm gebe”O moae lau Ebolai sêmansaŋ siŋ to kêm ki”. 20 Tec lau Israel samob dêdêŋ lau Pilisti sêja gebe sêuc êsêacnêŋ sakweŋ ki to kinom ma ki to bôjaŋ jalô. 21 Lau Pilisti embe sêuc sakweŋ ki me kinom, go lau Israel sênam ôli ŋa mone têlêac, ma embe sêuc ki me bôjaŋ jalô, go sênam ôli ŋa mone tageŋ. 22 Amboac tonaŋ gêdêŋ siŋ kêsa lau samob, taŋ sêmoa sêwiŋ Saul agêc Jonatan naŋ, nêŋ teŋ kêkôc siŋ me kêm ki atom, Saul agêc Jonatan tauŋgeŋ tec sêkôc. 23 Lau Pilisti sêsakiŋ siŋwaga toŋ teŋ gebe sejop intêna ŋamaŋgi Mikmasŋa.
Aŋga Hebolai aweŋ namba jalaŋa gêc awê atom.


Copyright information for `JAE