1 Timothy 1

Paulu gêjac m nê papia

Kilisi Jesu nê aposolo aê, Paulu, tec aêacnêŋ kêsiwaga Anôtô agêc Kilisi Jesu, taŋ takêŋ mateŋ eŋ tamoa naŋ, kêjatu aê, tec kato ŋoc papia tonec gêdêŋ aôm, Timote. Aôm kôtu aê latuc kêtu kôkêŋ gêwiŋŋa. Tameŋi Anôtô agêc aêacnêŋ Apômtau Kilisi Jesu nêŋ moasiŋ to taêŋ walô ma biŋmalô êndêŋ aôm êwac.

Ojop taôm êndêŋ mêtê geo

Gêdêŋ taŋ aê gaja Makedonia naŋ, kasakiŋ aôm gebe ôŋgôŋ Epese ma ôsôm êndêŋ lau ŋagêdô gebe sênam mêtê teŋ eo atom. Ôsôm êndêŋ êsêac gebe sêwi miŋ laŋgwa ŋaôma-ŋaôma to nêŋ abeŋi to dêbuŋi nêŋ ŋaê ŋadênaŋ sêpuc tauŋ ŋamŋa siŋ. Biŋ tonaŋ oc aŋgôm biŋ êlênsôŋ elêmê ma anam lau teŋ sa êtu sêkêŋ awiŋ Anô tôŋa atom. Ŋagôliŋ taŋ aôm kôkêŋ gêdêŋ êsêac naŋ, ŋamanô tau tonec gebe têmtac êwiŋ ŋanô, taŋ ŋam kêsêp ŋalêlôm ŋawa to ŋalêlôm ŋaŋêŋ ma akêŋ êwiŋ ŋakêŋkêŋ ŋajam tonêm ŋalêlôm makeŋgeŋ. Lau ŋagêdô sêwi lêŋ tonaŋ siŋ ma sêlênsôŋ tauŋ sêsôm biŋ agwa-agwa ŋaôma. Êsêac seboc têdôŋ Anôtônê biŋsu, mago sêjam kauc biŋ, taŋ sêsôm to biŋgalôm, taŋ sêjam sêmoa naŋ ŋam.

Aêac tec tajala gebe Anôtônê biŋsuanô embe tamansaŋ ŋapep, oc gêŋ ŋajam samucgeŋ. Aêac tajala tonec gêwiŋ gebe sêmasaŋ biŋsu kêtu lau gêdêŋŋa atom. Biŋsu tau mêŋkêsa kêtu lau, taŋ sêgôm gêŋ wauc-waucgeŋ to taŋeŋpêc ma dedec Anôtô to sêgôm sec, sêlic gêŋ teŋ kêtu nêŋ gêŋ dabuŋ atom, sêsôm biŋ alôb-alôb ŋawaô, sêjac teneŋi to tameŋi ma ŋamalac êndu naŋŋa. 10 Biŋsu tonaŋ mêŋkêsa kêtu lau mockaiŋo to mockaiŋŋa ma ŋacwaga, taŋ sêkwalec tauŋŋa, ma kêtu êsêac, taŋ têtulu ŋamalac têtu gêŋômaŋa to lau dansaŋ ma êsêac, taŋ têtôc lemeŋ, mago sêsau naŋŋa, ma kêtu êsêac, taŋ sêgôm gêŋ ŋagêdô samob, taŋ geseŋ mêtê ŋajam suŋa naŋ. 11 Biŋ tonaŋ gêc ŋawae ŋajam, taŋ Anôtô kêkêŋ gêdêŋ aê gebe jasôm lasêŋa. Ŋawae ŋajam tonec gêwa Anôtô, taŋ aweŋ gêôc eŋ naŋ, nê ŋawasi sa.

Paulu gêjam daŋge Anôtô kêtu taê walô eŋŋa

12 Aê gajam daŋge aêacnêŋ Apômtau Kilisi Jesu, taŋ kêpuc aê tôŋ ma gêlic aê katôm gebe janam sakiŋ eŋ naŋ, tec kêkêŋ kôm gêdêŋ aê. 13 Gêmuŋgeŋ tec aê kasôm biŋ alôb-alôb kêpi Jesu ma kêjanda eŋ to kalêsu gôlôac dabuŋ. Mago Anôtô taê walô aê, gebe kakêŋ gêwiŋ mêtê atom tageŋ ma gajam kauc gêŋ, taŋ gagôm naŋ. 14 Aêacnêŋ Apômtau kêsêwa nê moasiŋ kêpi aê ma kêkêŋ aê kakêŋ gêwiŋ to têtac gêwiŋ ŋanô, taŋ ŋawakac kêsêp Kilisi Jesu tau naŋ. 15 Biŋ tonec tec ŋanô, ŋamalac samob sêkêŋ êwiŋ acgommaŋ, gebe Kilisi Jesu gêmêŋ nom gebe ênam lau sec kêsi. Ma aê tec katu lau sec tau nêŋ ŋac ŋamata. 16 Kêtu biŋ tonaŋŋa Anôtô taê walô aê gebe Kilisi Jesu êwa nê lêŋ ê ŋamalacnêŋ biŋ tôŋŋa sa êpi aê êtu ŋamata e jatu lau, taŋ oc sêkêŋ êwi ŋ eŋ ma sêŋgôŋ mateŋ jali teŋgeŋ naŋ, nêŋ ŋadôŋdôŋ. 17 Anôtô taugeŋ kêtu têm samob ŋakiŋ. Eŋ gêmoa teŋgeŋ ma ŋamalac teŋ mataanô gêlic eŋ atom. Eŋ taugeŋ kêtu Anôtô. Lanem to ŋawasi êndêŋ eŋ êtôm têm totêmgeŋ. Biŋŋanô.

18 Latucenec Timote, aê kakêŋ ŋagôliŋ tonaŋ gêdêŋ aôm gebe ojop. Biŋ tonaŋ seoc lasê kêpi aôm gebe êpuc aôm tôŋ ma ônac siŋ ŋajam. 19 Ôkêŋ êwiŋ tonêm ŋalêlôm ŋaŋêŋgeŋ. Lau ŋagêdô sêwê biŋ tonaŋ auc ma sêkêŋ gêwiŋ atom, tec têtu lau gêbac. 20 Lau tau nêŋ ŋagêdô tonec Humenai agêc Alesandere. Aê kakêŋ êsêagêc sêsêp Sadaŋ lêma gebe êndôŋ êsêagêc e sêsôm biŋ alôb-alôb êtiam atom.

Copyright information for `JAE