1 Timothy 2

Biŋ tateŋ mecŋa

Amboac tonaŋ aê jalêŋ biŋ amac gebe aŋgôm gêŋ tonec êtu ŋamatageŋ acgom gebe ateŋ nêm gêŋ êndêŋ Anôtô to ateŋ mec ma taêm ênam nêm lau êsap nêm mec ŋalêlôm to anam daŋge êtu ŋamalac samobŋa. Ateŋ mec êtu kiŋ to gôliŋwaga samobŋa, gebe tamoa nêŋ ŋajam to daŋgôŋ tomalô, ma daŋgôm nêŋ gêŋ tasa Anôtônê lêŋ to tamansaŋ gêŋ samob ŋapep. Biŋ tonaŋ gêjac aêacnêŋ kêsiwaga Anôtô mataanô ŋajam ma gêlic jagêdêŋ. Ŋac tau tonaŋ gebe ênam ŋamalac samob kêsi ma gebe êkêŋ êsêac sêjala biŋŋanô tau, gebe Anôtô tageŋ tec gêmoa, ma sêliŋwaga tageŋ tec gêmoa Anôtô to ŋamalac ŋasawa. Sêliŋwaga tau ŋamalac Kilisi Jesu, taŋ kêkêŋ tau gêjac da lau pebeŋ. Biŋ tonaŋ gêwa sa gêdêŋ ŋanoc gebe Anôtô gebe ênam ŋamalac samob kêsi. Anôtô kêkêŋ aê katu ŋacjaeŋ to aposolo ma lau samuc nêŋ kêdôŋwaga gebe jasôm lêŋ takêŋ gêwiŋŋa to biŋŋanô tau lasê êndêŋ êsêac. Aê kasôm biŋŋanô, kasau atom.

Aê gabe ŋacwaga teteŋ mec êtôm gamêŋ samobgeŋ. Êsêac embe sêlam lemeŋ dabuŋ, go têntac ŋandaŋ to têntac lulu atom.

Ma biŋ tonec êpi lauo amboac tonaŋgeŋ, gebe sêmansaŋ tauŋ ŋapep ma majeŋ tauŋ êtu gêŋ secŋa ma sênam gêlôŋ tauŋ tokaucgeŋ. Êsêac sêmac poac ma sêkôc gold to kêkôm ma sêsô ŋakwê toŋaôli kapôêŋ-kapôêŋ atom. 10 Êsêac sênam gêlôŋ tauŋ ŋa kôm ŋajamgeŋ, tec êwa êsêac sa gebe têtôm lauo, taŋ têtêc Anôtô naŋ. 11 Lauo sênam tauŋ tôŋgeŋ to sêkôniŋ tauŋ, go sêŋô biŋ e êtu taŋ êsêac. 12 Aê jalôc gebe lauo têndôŋ lau to têtu ŋacwaganêŋ ŋatauo nec atom. Êsêac sêmoa sênam tauŋ tôŋgeŋ. 13 Anôtô kêkêŋ Adam kêtu ŋamata acgom, go kêkêŋ Ewa kêdaguc. 14 Ma Adam kêkêŋ gêwiŋ biŋdansaŋ atom, awê tec kêkêŋ gêwiŋ e kêgêli biŋsu. 15 Lauo embe sêsap sêkêŋ gêwiŋ to têntac gêwiŋ tôŋ ma sêsa nêŋ lêŋ sênam dabuŋ tauŋ tokaucgeŋ ma embe sêkôc ŋapalê, go Anôtô ênam êsêac kêsi.

Copyright information for `JAE