1 Timothy 3

Gôlôac dabuŋ nêŋ laumata nêŋ ŋagôliŋ

Biŋ tonec biŋ ŋanô gebe ŋac teŋ embe taê êka gebe êtu gôlôac dabuŋ ŋagejobwaga, naŋ nê ŋalêlôm êkac eŋ êtu kôm ŋajam teŋŋa. Gejobwaga tonaŋ talic eŋ ŋac mansaŋ samucgeŋ, ênam awê tageŋ ma êmoa tokauc ŋawageŋ. Eŋ êsa nê lêŋ tokauc ma katôgeŋ. Eŋ êŋgôm ja lau samob ma eŋ êtôm gebe êndôŋ lauŋa. Ênôm gêŋ anaboa atom to lêma ênac siŋ ŋawaô atom. Eŋ ŋac malô to ŋac wama. Eŋ têtac gamiŋ atom. Eŋ ênam gôliŋ tau nê gôlôac ŋapep e nê ŋapalêo to ŋac tetoc eŋ sa totaŋeŋ wamugeŋ. Ŋac teŋ embe ênam gôliŋ tau nê gôlôac êtôm atom, oc ejop Anôtônê gôlôac amboac ondocgeŋ. Akêŋ ŋac, taŋ kêtu ŋac buŋa dambêgeŋ naŋ, êtu gejobwaga atom, gebe eŋ oc etoc tau sa e mêtôc, taŋ kêtap Sadaŋ sa naŋ, êpi eŋ amboac tonaŋ. Akêŋ ŋac, taŋ lau sêmoa jaêc gôlôacŋa sêsôm eŋ wae ŋajam naŋgeŋ, gebe sêmbu eŋ atom to Sadaŋnê lip ênac eŋ atom.

Sakiŋwaga gôlôac dabuŋŋa nêŋ ŋagôliŋ

Sakiŋwaga gôlôac dabuŋŋa amboac tonaŋ. Êsêac lau wapac, imbeleŋ pap atom, sênôm wain anaboa atom ma sêwê launêŋ gêŋ auc atom. Biŋŋanô taŋ êsêac sêkêŋ gêwiŋ naŋ, sêkam tôŋ ŋa nêŋ ŋalêlôm ŋawa. 10 Ansaê lau tonaŋ êmuŋ acgom. Embe alic êsêac têtôm, go sênam sakiŋ gôlôac. 11 Êsêacnêŋ lauo amboac tonaŋgeŋ. Êsêac lauo wapac, sêŋga biŋ atom, sêmoa tokauc ŋawageŋ ma sêŋgôm nêŋ gêŋ samob ŋaŋêŋgeŋ. 12 Sakiŋwaga gôlôac dabuŋŋa sênam awê tageŋ- tageŋ ma sênam gôliŋ nêŋ ŋapalêo to ŋac ma nêŋ gôlôac ŋapep. 13 Êsêac taŋ sêjam sakiŋ nêŋ gôlôac ŋapep naŋ, oc nêŋ sakiŋ etoc êsêac sa ma sêkêŋ êwiŋ Kilisi Jesu totêntac êpa sugeŋ.

Anôtônê mêtê ŋabiŋ ŋalêlômŋa

14 Biŋ tonaŋ kato gêdêŋ aôm ma taêc kêka gebe jandêŋ aôm jawac sebeŋ. 15 Mago gêŋ teŋ embe ênam aê tôŋ, go papia tonec êwa biŋ sa êndêŋ aôm e ôjala lêŋ ômoa Anôtônê anduŋa ŋam. Anôtônê andu tau Anôtô mata jali nê gôlôac, taŋ kêtu biŋŋanô ŋaalê to ŋaseŋeŋ. 16 Biŋŋanôgoc, Anôtônê mêtê, taŋ kêsiŋ tau kêsêp lêlômgeŋ naŋ kapôêŋanô.

Eŋ geoc tau lasê kêtu ŋamalac.
Ŋalau Dabuŋ gêwa eŋ sa gebe eŋ ŋac gêdêŋ.
Aŋela sêlic eŋ.
Sêjam ênê mêtê gêdêŋ lau samuc.
Lau nomŋa sêkêŋ gêwiŋ eŋ.
Anôtô kêsip eŋ sa toŋawasigeŋ.
Copyright information for `JAE