1 Timothy 4

Biŋ kêpi kêdôŋwaga dansaŋ

Ŋalau Dabuŋ gêwa sa kwanaŋgeŋ e gêc awêgeŋ gebe êndêŋ têm ŋamuŋa lau ŋagêdô oc sêkac tauŋ su aŋga sêkêŋ gêwiŋ ŋanôŋa nasêsap ŋalau dansaŋŋa tôŋ to sêkôc ŋalau sec nêŋ mêtê sa. Ŋalau sec tonaŋ sêjam ŋamalac dansaŋ laŋôŋ, taŋ sêsau lau. Êsêacnêŋ ŋalêlôm kêtôm ja kêpac gêŋ kêtu matê. Êsêac tonaŋ sêjac jao gebe ŋacwaga sênam awê atom ma lauo sênam ŋac atom. Ma êsêac sêkac ŋamalac gebe sêŋgamiŋ tauŋ êndêŋ gêŋ taniŋŋa ŋagêdô. Mago Anôtô kêkêŋ gêŋ taniŋŋa tonaŋ gebe aêac lau takêŋ gêwiŋ to tajala biŋŋanôŋa takôc sa todaŋgegeŋ. Gêŋ totau-totau samob, taŋ Anôtô kêkêŋ naŋ, tau ŋajam. Amboac tonaŋ takôc gêŋ tonaŋ ŋai samob sa todaŋgegeŋ ma dambu teŋ atom, gebe Anôtônê biŋ to mec gêgôm gêŋ tau kêtu dabuŋgac.

Kilisi Jesu nê sakiŋwaga ŋajam

Aôm embe ôwa biŋ tonaŋ sa êndêŋ lasitêwai, oc ôtu Kilisi Jesu nê sakiŋwaga ŋajam, gebe takêŋ gêwiŋ ŋabiŋ to mêtê ŋajam, taŋ kôdaguc naŋ, kêtu nêm mo gêlôm aômŋa. Mago miŋ alôb-alôb to lauo ŋanô nêŋ biŋ ole naŋ ômasuc. Ôsa Anôtônê lêŋ ônsaê-ônsaê e êtu tôŋ aôm. Embe tansaê gebe tatu mêtê ôliŋgeŋ, oc ênam aêac sa ŋanô atom. Mago embe tasa Anôtônê lêŋ, oc ênam aêac sa êtu gêŋ samobŋa. Anôtô gêjac mata gebe ênam aêac sa êndêŋ têm tamoa mateŋ jali aŋga nomŋa to êndêŋ têm daŋgôŋ mateŋ jali aŋga ônêŋa amboac tonaŋgeŋ. Biŋ tonaŋ ŋanô to gêdêŋ kêtôm gebe ŋamalac samob sêkôc saŋa. 10 Kêtu mêtê tonaŋŋa aêac tajam koleŋ tosiŋgeŋ gebe aêac takêŋ mateŋ Anôtô mata jali, taŋ kêtu ŋamalac samob nêŋ kêsiwaga, mago kêtu aêac lau- takêŋ-gêwiŋwaga nêŋ kêtu ŋamata.

11 Ôjatu biŋ tonaŋ ma ôndôŋ lau gebe sêmansaŋ. 12 Lau teŋ laŋôŋ elo aôm êtu aôm ŋac matacŋa atom. Aômnêm biŋ to nêm lêŋ ma têmtac gêwiŋ to kôkêŋ gêwiŋ ŋanô ma nêm ŋalêlôm ŋawa êtu ŋadôŋdôŋ êndêŋ lau-sêkêŋ-gêwiŋwaga. 13 Ôsam mêtê lasê to ôIêŋ biŋ gôlôac ma ôndôŋ lau tau ômoa e tauc jawac acgom. 14 Ôim Anôtônê moasiŋ, taŋ gêc ŋalêlôm naŋ, su atom. Moasiŋ tau gelom aôm gêdêŋ taŋ seoc Anôtônê biŋ lasê gêdêŋ aôm ma gôlôac dabuŋ nêŋ laumata sêu lemeŋ gêsac aôm naŋ. 15 Biŋ tonaŋ taêm ênam ma biŋ tonaŋ ênam gôliŋ nêm lêŋ, gebe lau samob sêlic aômnêm kôm esewec. 16 Ojop taôm to mêtê, taŋ kôdôŋ gômoa naŋ ŋapep. Ôsap tôŋgeŋ. Ôŋgôm tonaŋ, ec ênam aôm taôm to êsêac, taŋ sêŋô aômnêm biŋ naŋ sa.

Copyright information for `JAE