2 Corinthians 13

Paulu gêlêŋ biŋ lau kêtu ŋamu ma gêjac mata nê papia

Galoc gabe jandêŋ amac jawac êtu dim têlêacŋa. “Ŋac luagêc me têlêac sêwa biŋ teŋ sa acgom, go ŋanô êsa.” Gêdêŋ taŋ gamoa gawiŋ amac kêtu dim luagêcŋa naŋ, kasôm biŋ gêdêŋ lau, taŋ gêmuŋgeŋ sêgôm sec to gêdêŋ lau ŋagêdô samob gebe Embe jawac êtiam, oc taêc walô amac atom. Galoc gamoa jaêc amac, tec jasôm biŋ tonaŋgeŋ êtiam. Amac abe Kilisi êwa tau sa ŋanôgeŋ gebe aê gajam eŋ awa. Eŋ gêmoa gêwiŋ amac amboac ŋac palê-palê atom, gêmoa gêwiŋ amac toŋaclaigeŋ. Biŋŋanô, eŋ ŋac palê-palê, tec sêjac eŋ kêpi kakesotau. Mago Anôtônê ŋaclai kêkêŋ eŋ gêmoa mata jali. Eŋ gêbiŋ aêac tôŋ awê kaiŋ ênê palê-palê, mago Anôtônê ŋaclai êkêŋ aêac amoa mateŋ jali awiŋ eŋ gebe anam amac sa.

Ansaê taôm acgom. Amac akêŋ gêwiŋ ŋanô me masi. Taêm ênam taômmaŋ. Amac ajala gebe Kilisi Jesu gêmoa gêwiŋ amac me masi. Embe ajala atom, go atap saê ŋanô sa atom. Aê taêc kêka gebe amac ajala aêac gebe atap saê ŋanô sagac. Aêac ateŋ Anôtô gebe amac aŋgôm sec teŋ atom. Aêac ateŋ biŋ tonaŋ kêtu awaka tauŋ sa êndêŋ amac alic gebe aêac lau ŋaŋêŋ nec atom, ateŋ gebe amac aŋgôm gêŋ ŋajamgeŋ. Embe alic aêac amboac lau, taŋ têtap saê ŋanô sa atom naŋ, oc êtôm, mago oc êlênsôŋ aêac atom. Aêac tec atôm gebe akôniŋ biŋŋanô tôŋ atom, aêac atoc biŋŋanô sageŋ. Embe aêac lau palê-palê ma amac lau ŋajaŋa, oc aêac alic totêntac ŋajamgeŋ. Aêac ateŋ ma mec kêtu biŋ tau tonecŋa gebe Anôtô êkêŋ amac atu lau ŋajaŋa samucgeŋ. 10 Aê gamoa jaêc ma kato biŋ tonec kêtu ŋam tonecŋa gebe êndêŋ taŋ jaô lasê amac naŋ, jansaic biŋ amac atom. Apômtau kêkêŋ ŋaclai tau gêdêŋ aê, mago kêkêŋ kêtu enseŋ amac suŋa atom, kêkêŋ kêtu êmboa amac saŋageŋ.

11 O lasitêwaac, aŋgôŋ ŋajamôŋ. Anac dabiŋ taôm ŋapep. Alêŋ biŋ taôm. Nêm ŋalêlôm êpi tageŋ ma amoa tobiŋmalôgeŋ. Ma Anôtô, taŋ kêtu têntac gêwiŋ to biŋmalô ŋamôkê naŋ, wacêwiŋ amac.

12 Aê moalêc taôm to akôc taôm sa êtôm Anôtônê lau nêŋ mêtê. Anôtônê lau samob aweŋ gêjac amac.

13 Apômtau Jesu Kilisi nê moasiŋ to Anôtônê têtac gêwiŋ ma Ŋalau Dabuŋ êmbiŋ amac tôŋ êwiŋ amac samob.

Copyright information for `JAE