2 Kings 19

Kiŋ kêtu kênac Jesaia kêtu biŋ tonaŋŋa

Gêdêŋ taŋ kiŋ Hesekia gêŋô biŋ tau naŋ, eŋ kêkac nê ŋakwê gêŋgic to kêsô talu ma gêdêŋ Apômtaunê andu gêja. Ma eŋ kêsakiŋ Eliakim, taŋ gejob kiŋnê andu naŋ, agêc kêlêpêwaga Sebna ma dabuŋwagasêga, taŋ sêsô talu amboac tonaŋgeŋ naŋ, dêdêŋ Amos latu propete Jesaia sêja. Êsêac sêsôm gêdêŋ eŋ gebe “Hesekia kêsôm amboac tonec gebe ‘Bêc tonec kêtu bêc gêŋwapac ma ŋagêjô to majeŋŋa. Aêac tatôm awê, taŋ ŋapalê kêtuŋ eŋ naŋ, mago nê ôliwalô masi gebe êkôcŋa. Oc moae Apômtau, aômnêm Anôtô, gêŋô Rabsake, taŋ nê ŋatau kiŋ Asuriaŋa kêsakiŋ gebe êsu Anôtô mata jaliŋa susu naŋ, nê biŋ ma êkêŋ ŋagêjô êtu biŋ, taŋ Apômtau, aômnêm Anôtô, gêŋô naŋ. Amboac tonaŋ oteŋ mec êndêŋ Anôtô êtu aêacnêŋ lau ŋapopoc, taŋ gacgeŋ sêmoa naŋŋa.’” Gêdêŋ taŋ kiŋ Hesekia nê sakiŋwaga sêô lasê dêdêŋ Jesaia naŋ eŋ kêsôm amboac tonec gêdêŋ êsêac gebe “Asôm êndêŋ nêm ŋatau gebe Apômtau tau kêsôm amboac tonec gebe ‘Ôtêc taôm êtu biŋ alôb-alôb, taŋ kiŋ Asuriaŋa nê sakiŋwaga sêsôm kêpi aê ma aôm gôŋô naŋ atom. Ôlic acgom, aê gabe jakêŋ ŋalau teŋ êsêp ênê ŋalêlôm e êŋô biŋ jaô-jaô ma êc êmu taunê gamêŋ êna aŋga tonaŋ ma aê jakêŋ sênac eŋ êndu ŋa siŋ.’”

Rabsake gêmu gêja ma gêŋô gebe kiŋ Asuriaŋa gêwi Lakis siŋ ma gêjac siŋ gêdêŋ malac Libna gêmoa. Gêdêŋ taŋ kiŋ gêŋô ŋawae gebe kiŋ Aitiopiaŋa Tirhaka gêdi gebe ênac siŋ êndêŋ eŋ naŋ, eŋ kêsakiŋ laujaeŋ gêdêŋ kiŋ Judaŋa Hesekia ma kêsôm gebe 10 “Asôm êndêŋ kiŋ Judaŋa Hesekia gebe Anôtô, taŋ aôm taêm kêka eŋ naŋ, kêsôm gêdêŋ aôm gebe Jerusalem oc êsêp kiŋ Asuriŋa lêma atom. Nêm Anôtô ênsau aôm atom. 11 Aôm gôŋô gêŋ, taŋ kiŋ Asuriaŋa sêgôm naŋ ŋawae. Êsêac seseŋ gamêŋ samob su sêjaŋa. Ma aôm taômgeŋ gobe ônam samuc me. 12 Aê tamoci seseŋ malac Gosen to Haran ma Resep to lau Beteden, taŋ sêmoa Telasar naŋ. Ma êsêacnêŋ anôtôi têtôm gebe sênam êsêac kêsi atom. 13 Ma kiŋ aŋga Hamat to Arpad ma Separwaim to Hena ma Iwa sêmoa ondoc.”

14 Kiŋ Hesekia kêkôc papia tau sa aŋga laujaeŋ lemeŋ ma kêsam. Go Hesekia kêpi Apômtaunê andu gêja ma kêlaiŋ papia tau gêc Apômtau laŋônêm, 15 ma keteŋ mec gêdêŋ Apômtau ma kêsôm gebe “O Apômtau, lau Israel nêŋ Anôtô, taŋ gôŋgôŋ lêpôŋ kêkô kerub ŋaô naŋ. Aôm taômgeŋ kôtu nom ŋagamêŋ kiŋŋa samob ŋaAnôtô. Aôm kôkêŋ undambê to nom. 16 O Apômtau, ôkêŋ taŋam ma ôŋô. O Apômtau, matam êlac ma ôlic. Ôŋô biŋ, taŋ Senakerib kêsôm gebe êsu aôm Anôtô matam jali susu naŋ. 17 O Apômtau, kiŋ Asuriaŋa sêjac lau-m taêsam êndu ma seseŋ seseŋ nêŋ gamêŋ biŋŋanôgoc, 18 ma sêbaliŋ nêŋ anôtôi kêsa ja gebe nêŋ anôtôi anôtôi ŋanô atom, ŋamalac lemeŋ ŋakômgeŋ, ŋamalac sêmasaŋ ŋa ka to poc. Tec seseŋ samob su sêjaŋa. 19 O Apômtau aêacma Anôtô, ônam aêac kêsi aŋga eŋ lêma gebe lau nomŋa samob sêjala gebe aôm Apômtau taômgeŋ kôtu Anôtô.”

Jesaianê biŋ gêdêŋ kiŋ

20 Go Amos latu Jesaia kêsakiŋ biŋ teŋ gêdêŋ kiŋ Hesekia ma kêsôm gebe “Apômtau, lau Israel nêŋ Anôtô, kêsôm amboac tonec gebe Aê gaŋô nêm mec, taŋ koteŋ gêdêŋ aê kêtu kiŋ Asuria Senakeribŋa naŋ. 21 Ma biŋ tonec Apômtau kêsôm kêkanôŋ eŋ gebe ‘Sion latuo, awêtakiŋ tau, gêbu aôm ma kêsu aôm susu, Jerusalem latuo kêdaiŋ gêsu kêtu aômŋa. 22 Aôm kôsu asa susu ma kôsôm biŋ alôb-alôb kêpi asa. Aôm kôsaic biŋ asa ma matampaŋa gêjac asa. Gêŋ samob tonaŋ ŋai gôgôm gêdêŋ Israelnêŋ ŋac dabuŋ aê. 23 Aôm kôsakiŋ nêm laujaeŋ gebe ôsu Apômtau susu ma kôsôm gebe “Aê kapi lôc baliŋ gaja toŋoc kareta siŋŋa taêsam, kapi Lebanon ŋatêpôê gaja gêwiŋ. Aê kasap Lebanon ŋakaseda baliŋanô to ŋakêmêsic ŋajamanô. Aê kabêlêm saleŋ ŋagamêŋ jaêcsêga to ŋadani. 24 Aê kakwê sê buŋa ma ganôm bu gamêŋ jabaŋa ma octapa kêka bu Aiguptuŋa samob e kêpa.”

25 “‘Aôm gôŋô gebe gêdêŋ andaŋgeŋ kamasaŋ gêŋ samob tonaŋ su atom me. Ma galoc aê gagôm ŋanô kêsa ma kakêŋ aôm gebe onseŋ malac totuŋbôm popoc. 26 Lau taŋ sêmoa tonaŋ naŋ, nêŋ ôliŋwalô masi. Êsêac têtêc tauŋ ma katuŋ gêjaŋa. Êsêac têtôm gêgwaŋ, taŋ kêkô kôm naŋ, ma waôŋ, taŋ kêpi kêkô salôm naŋ. Oc kêpac gêŋ tau ma kêmêliŋ ma kêtu kapôêŋ atom.

27 “‘Aôm embe ôndi sa me ôŋgôŋ sic, embe ôsa ôna me ôsô ômôêŋ me embe têmtac êmbuli auc êndêŋ aê naŋ kajalagac. Aôm têmtac kêbuli auc gêdêŋ aê ma kotoc taôm sa ŋawae mêŋkêsô aê taŋocsuŋ, tec gabe jakêŋ kawaŋgoŋ êsêp lusumsuŋ to ŋoc gôliŋ ŋamôkê êsêp awamsuŋ ma jawê aôm ômu ôsa intêna, taŋ kôsa gômôêŋ naŋ ôna.’

29 “Ma gêŋ tonec êtu ŋabelo êndêŋ aôm Hesekia gebe Jala tonec to jala teŋ aôm oc ôniŋ gêŋ, taŋ tau êpi, mago êndêŋ jala êtu têlêacŋa amac oc asê gêŋ ma ajoŋ ŋanô sa, amac asê wain ma aniŋ ŋanô tau. 30 Lau Juda ŋapopoc, taŋ gacgeŋ sêmoa naŋ, oc sêkêŋ nêŋ ŋawakac êsêp nom êtiam ma ŋanô amboac gêŋ kômŋa teŋ, 31 gebe lau ŋapopoc sêsa aŋga Jerusalem sêna ma lau toŋ teŋ, taŋ gacgeŋ sêmoa mateŋ jali naŋ, sêsêp aŋga lôc Sion sêna. Apômtaunê ŋalêlôm oc êkac eŋ gebe êŋgôm gêŋ tonaŋ.

32 “Biŋ tonec Apômtau kêsôm kêkanôŋ kiŋ Asuriaŋa gebe ‘Siŋwaga oc sêsa malac kapôêŋ tonec ma sêpô sôb tageŋ êsô malac tau atom. Siŋwaga tolautuc oc sêndambiŋ malac ma êsêac sêmboa nom sa êŋgi malac tau auc atom. 33 Intêna taŋ eŋ kêsa gêmêŋ naŋ, eŋ oc êsa êmu êna amboac tonaŋgeŋ ma êsô malac ŋalêlôm êna atom’ Apômtau kêsôm biŋ tonaŋ. 34 Gebe aê oc janac siŋ janam malac tonec sa êtu aê taucŋoc waec ma êtu ŋoc sakiŋwaga Dawidŋa.”

35 Gêdêŋ gêbêc tonaŋgeŋ Apômtaunê aŋela gêja malac, siŋwaga Asuriaŋa sêŋgôŋ naŋ, ma gêjac siŋwaga 185,000 endu. Ma gêdêŋ oc kêpi êsêac samob tomatêgeŋ sêc. 36 Go kiŋ Asuriaŋa Senakerib gêc gêja nê gamêŋ jagêŋgôŋ malac Niniwe. Ma gêdêŋ taŋ eŋ gêjam sakiŋ gêmoa nê anôtô Nisrok nê andu naŋ, ênê latuagêc Adramelek agêc Sareser sêjac eŋ êndu ŋa siŋ ma sêc sêja gamêŋ Ararat. Ma ênê latu teŋ ŋaê Esarhadon kêtu kiŋ gêjô eŋ su.

37 

20:1 —21:26 Judanêŋ kiŋ Hiskia kêtap gêmac kapôêŋ sa, mago ôli ŋajam kêsa kêtiam ŋamiŋ kêsêp môkêlatu 20. Môkêlatu 21 gêjac miŋ biŋ, taŋ kêsa gêdêŋ taŋ Judanêŋ kiŋ Manase agêc Amon sêjam gôliŋ gamêŋ tau naŋ.

Copyright information for `JAE