2 Kings 25

Sedekia gêjam gôliŋ gamêŋ jala 9 ma ajôŋ 10 ma bêc 10, go kiŋ Babilonŋa gêwiŋ nê siŋwaga samob gêmêŋ gebe sênac siŋ êndêŋ Jerusalem ma sêgi malac tau auc. Êsêac sê nêŋ becobo kêkô malac ŋamagê ma sêboa nom sa ma sêgi malac tau auc. Ma êsêac sêgi malac auc e gêdêŋ Sedekia nê gôliŋ ŋajala kêtu 11. Gêdêŋ jala tonaŋ ŋaajôŋ 4 ŋabêc 9 tôbôm gêjam sêga ma launêŋ gêŋ taniŋŋa masianô samucgeŋ. Gêdêŋ bêc tonaŋ ŋacjo têtuc tuŋbôm popoc. Lau Kaldea sêgi malac auc, mago kiŋ Judaŋa to nê siŋwaga samob sêc sêja gêdêŋ gêbêc. Êsêac sêsa sacgêdô, taŋ gêc tuŋbôm luagêc ŋasawa kêsi kiŋnê kôm sauŋ naŋ, ma sepeŋ gaboaŋ Arabageŋ sêja. Mago Kaldeanêŋ siŋwaga sêjanda kiŋ ma sê êsêac tôŋ aŋga gaboaŋ Jerikoŋa ma ênê siŋwaga samob sêc êliŋ- êliŋ. Go êsêac sêkôc Sedekia tôŋ ma sêkêŋ eŋ gêdêŋ kiŋ Babilonŋa aŋga malac Ribla ma eŋ kêmêtôc Sedekia. Êsêac sêjac ênê latui êndu aŋga eŋ tau laŋônêmŋa, go sêkip Sedekia mataanô sa to sêsô eŋ tôŋ ŋa kapoacwalô ma sêkôc eŋ gêja Babilon.

Seseŋ lôm dabuŋ su

Gêdêŋ taŋ kiŋ Nebukadnesar nê gôliŋ ŋajala kêtu 19 ŋaajôŋ 5 ma ŋabêc 7 naŋ kiŋ Babilonŋa nê sakiŋwaga teŋ Nebusaradan taŋ kêtu siŋwaga sejop kiŋŋa nêŋ kasêga naŋ, kêsô Jerusalem gêja. Eŋ kêkêŋ ja geŋ lôm dabuŋ to kiŋnê andu ma andu Jerusalemŋa samob su. 10 Ma Kaldeanêŋ siŋwaga, taŋ sêwiŋ siŋwaga sejop kiŋŋa nêŋ kasêga naŋ, seseŋ Jerusalem ŋatuŋbôm su samucgeŋ. 11 Go kasêga Nebusaradan kêkôc lau ŋapopoc, taŋ gacgeŋ sêmoa malac naŋ samob, lau lemeŋ mêtê ŋagêdô, taŋ gacgeŋ sêmoa naŋ ma êsêac, taŋ sêsuŋ tauŋ gêmuŋ gêdêŋ êsêac lau Babilon su naŋ, sêja Babilon. 12 Mago eŋ gêwi lau ŋalêlôm sawa ŋagêdô siŋ gacgeŋ sêmoa, gebe sejop kôm wainŋa to sênam kôm moŋa.

13 Ma lau Kaldea sêjac Apômtaunê andu ŋaalê kopa ma laclu kapôêŋ buŋa, taŋ sêmasaŋ ŋa kopageŋ naŋ, popoc ma sêkôc kopa samob sêja Babilon. 14 Ma êsêac sêjaŋgo ku to siac ma bôjaŋ to laclu ma waba kopaŋa samob, taŋ gêjac sakiŋ lôm dabuŋŋa ŋawae naŋ su. 15 Ma kasêga kêkôc gêŋmalu ŋabulakôp to suc ma ŋagêŋlêlôm samob, taŋ sêmasaŋ ŋa gold to silber naŋ, su amboac tonaŋ. 16 Alê luagêc ma bukom to sac, taŋ Salomo kêmasaŋ kêtu lôm dabuŋŋa naŋ, ŋakopa ŋawapac sec, tec sêjam dôŋ kêtôm atom. 17 Alê tau baliŋ kêtôm saka 5 ma sêmasaŋ alê ŋatêpôê ŋa kopa baliŋ amboac saka samuc tageŋ. Ma sêsac kopa kêtu o to walô ma kaŋanô ŋakatu gêjam ŋamôkê tau auc ma alê kêtu luagêcŋa kêtôm tonaŋ.

Sêkôc lau Juda sêja Babilon

18 Go siŋwaganêŋ kasêga Nebusaradan kêkôc ŋac dabuŋsêga Seraia agêc dabuŋwaga, taŋ kêsô eŋ ŋalabu naŋ, Sepania ma gejobwaga sacgêdôŋa têlêac tôŋ. 19 Aŋga malac eŋ kêkôc gejobsêga, taŋ gêjam gôliŋ siŋwaga naŋ, to lau lemeŋ teŋ taŋ ôliŋ andaŋ kiŋ ma gacgeŋ sêmoa malac naŋ, tôŋ ma siŋsêlêc laŋgwa nê kêlêpêwaga, taŋ gejob siŋwaganêŋ ŋaêmôkê naŋ, to lau towae 60 gamêŋ ŋagêdôŋa, taŋ eŋ kêtap sa aŋga Jerusalem tau. 20 Kasêga Nebusaradan kêkôc êsêac gêdêŋ kiŋ Babilonŋa, taŋ gêmoa malac Ribla. 21 Ma aŋga malac Ribla, taŋ gêc gamêŋ Hamat naŋ, kiŋ Babilonŋa kêjatu lau gebe sênac êsêac êndu. Amboac tonaŋ êsêac sêwê lau sêwi nêŋ gamêŋ siŋ jasêŋgôŋ gamêŋ Babilon.

Gôliŋwaga Judaŋa Gedalia

22 Kiŋ Babilonŋa Nebukadnesar kêkêŋ Ahikam latu ma Sapan dêbu Gedalia kêtu lau ŋagêdô, taŋ Nebukadnesar gêwi siŋ gacgeŋ sêmoa gamêŋ Judaŋa naŋ, nêŋ gôliŋwaga. 23 Gêdêŋ taŋ lau Juda nêŋ laumata to nêŋ siŋwaga samob sêŋô gebe kiŋ Babilonŋa kêkêŋ Gedalia kêtu gôliŋwaga naŋ, êsêac dêdêŋ Gedalia sêja Mispa. Lau tau tonaŋ nêŋ ŋaê tonec gebe Netania latu Ismael agêc Karea latu Johanan ma Tanhumet latu Seraia aŋga malac Netopat, agêc Jasania aŋga Maka. 24 Ma Gedalia kêtôc lêma gêdêŋ êsêac to nêŋ lau ma kêsôm gebe “Atêc taôm êtu lau Babilon nêŋ laumataŋa atom. Aŋgôŋ gamêŋ tonec ma anam sakiŋ kiŋ Babilonŋa, go amoa ŋajam.” 25 Mago gêdêŋ jala tonaŋgeŋ ŋaajôŋ 7 Netania latu ma Elisama dêbu Ismael aŋga kiŋnê gôlôac ŋam gêmêŋ Mispa gêwiŋ lau 10 ma sêjac Gedalia to lau Juda ma lau Kaldea, taŋ sêmoa sêwiŋ eŋ naŋ, êndu aŋga Mispa. 26 Go lau samob, lau tolêlôm to lau ŋalêlôm sawa kêtômgeŋ, sêwiŋ siŋwaganêŋ laumata sêwi gamêŋ siŋ ma sêsêp Aiguptu sêja gebe êsêac têtêc Kaldeawaga.

Sêwi Jehoiakin siŋ aŋga kapoacwalô

27 Gêdêŋ taŋ kiŋ Judaŋa Jehoiakin nê jala gêŋgôŋ kapoacwalôŋa kêtu 37 ŋaajôŋ kêtu 12 ma ŋabêc 27 naŋ, Ewilmerodok kêkôc nê gôliŋ kiŋŋa sa, tec eŋ kêmoasiŋ kiŋ Judaŋa Jehoiakin ma kêgaboac eŋ su aŋga kapoacwalô. 28 Eŋ kêmoasiŋ eŋ ma gêmac-gêmac biŋ gêdêŋ eŋ ma kêkêŋ eŋ gêŋgôŋ lêpôŋ teŋ ŋaô ma ketoc eŋ sa kêlêlêc kiŋ ŋagêdô, taŋ sêmoa Babilon sêwiŋ eŋ naŋ su. 29 Jehoiakin kêkwalec ŋakwê kapoacwalôŋa su ma geŋ gêŋ gêŋgôŋ kiŋnê tebo kêtôm têm samob e gêmac êndu. 30 Gêdêŋ têm samob, taŋ eŋ gêmoa mata jaliŋa naŋ, eŋ kêtap nê gêŋ, taŋ kêpô lêna naŋ sa kêtôm bêcgeŋ aŋga kiŋnê.

Copyright information for `JAE