Acts 16

Timote gêwiŋ Paulu agêc Sila

Go sêô lasê Derbe ma Lustra. Ma têtap ŋacseŋom teŋ sa aŋga tonaŋ, nê ŋaê Timote. Ŋac tau têna Judao teŋ, naŋ kêkêŋ gêwiŋ, ma tama ŋac Helenŋa. Lasitêwai Lustra to Ikoniumŋa sêwa eŋ ŋam sa e Paulu gebe êkôc Timote êwiŋ eŋ. Tec kêkôc eŋ jakêsa eŋ gebe Juda gamêŋ tonaŋŋa samob sêjala tama gebe eŋ ŋac Helenŋa teŋ. Sêjac laoc malacgeŋ sêja ma têdôŋ biŋ, taŋ aposolo to laumata sêsôm kêtu tôŋ aŋga Jerusalem naŋ, gêdêŋ êsêac gebe sejop. Amboac tonaŋ gôlôac dabuŋ sêkêŋ gêwiŋ ŋajaŋa kêsa, ma lau jasêwiŋ-jasêwiŋ kêtôm bêcgeŋ.

Paulu gêc me kêpi ŋac Makedoniaŋa

Ŋalau Dabuŋ kêkô êsêac auc gebe sênam mêtê aŋga Asia atom, tec sêsa Prugia to Galata ŋagamêŋ sêja. Têdabiŋ Musia ma sêsa Bituniaŋageŋ, mago Jesunê Ŋalau gêlôc gêdêŋ êsêac atom. Amboac tonaŋ jatêdaguc Musia ŋagamêŋ ŋamadiŋ ma sêsêp gwêc dêdêŋ Troasŋa sêja. Ma gêdêŋ gêbêc Paulu gêc mê gebe ŋac Makedoniaŋa teŋ kêkô ma keteŋ eŋ gebe “Olom Makedonia mêŋônam aêac sa.” 10 Paulu mata gêlac acgom, go aêac asaic tauŋgeŋ abe ana Makedonia sebeŋ, taêŋ gêjam gebe Anôtônê kalem gêdêŋ aêac gebe asôm ŋawae ŋajam lasê êndêŋ êsêac aŋga tônêŋa.

Ludia gêjam tau ôkwi

11 Amboac tonaŋ êsuŋ su aŋga Troas ma gacgeŋ apeŋ Samotrakiageŋ e ŋageleŋ ma asô Neapoli. 12 Aŋga tonaŋ jaasa Romnêŋ malac wakuc Pilipi, taŋ kêtu Makedonia ŋamalacsêga naŋ, ma aŋgôŋ malac tonaŋ bêc ŋagêdô. 13 Go gêdêŋ sabat aêac asa malac ŋamagê aja e aô lasê bu teŋ, gebe aêac taêŋ gêjam gebe teteŋ mec ŋamala oc gêc tonaŋ. Aêac aŋgôŋ sic ma asôm biŋ gêdêŋ lauo, taŋ sêkac tau ŋ sa naŋ. 14 Ma awê teŋ, nê ŋaê Ludia, gêmoa; naŋ gêjam sakiŋ Anôtô. Eŋ aŋga malac Tuatira ma kêtulu obo asôsamuc. Eŋ gêŋô biŋ tau ma Apômtau kêlaiŋ ênê ŋalêlôm e kêkêŋ taŋa biŋ, taŋ Paulu kêsôm naŋ. 15 Asagu eŋ to nê lau su, go keteŋ aêac ma kêsôm gebe “Embe alic aê kakêŋ gêwiŋ Apômtau ŋanôgeŋ, naŋ asô mêŋaŋgôŋ ŋoc andu,” ma kêkac aêacgeŋ.

Sêkêŋ Paulu agêc Sila sêsêp kapoacwalô

16 Ŋabêc teŋ aêac abe ana mec ŋamala tonaŋ. Asêlêŋ amoa e adac sakiŋwagao teŋ toŋalau geoc biŋ lasêŋa. Awê tonaŋ geoc biŋ lasê gêdêŋ lau ma sêkêŋ ŋaawa taêsam gêdêŋ ênê ŋatui. 17 Awê tau kêdaguc aêac to Paulu ma gêmôêc gebe “Lau tonec têtu Lôlôc Ŋatau Anôtô nê sakiŋwaga, tec sêwa lêŋ Anôtô ênam ŋamalac kêsiŋa sa êndêŋ amac.” 18 Awê tau kêsôm biŋ tonaŋ e tobêc-tobêc, tec Paulu têtac ŋandaŋ kêkac tau ôkwi ma kêsôm gêdêŋ ŋalau gebe “Aê jajatu aôm gajam Jesu Kilisi laŋô gebe ôwi awê tonaŋ siŋ ôsa ôna.” Ma gaôgeŋ ŋalau tau gêwi eŋ siŋ kêsa gêja. 19 Awê tau nê ŋataui sêlic nêŋ awa ŋamôkê gêc gêja, tec sêkôc Paulu agêc Sila tôŋ ma sê êsêagêc sêsa malacluŋ dêdêŋ kasêga sêja. 20 Go sêwê êsêagêc dêdêŋ gôliŋwaga sêja ma sêsôm gebe “Juda luagêc tonec mêŋsêli aêacnêŋ malac sa. 21 Agêc têdôŋ mêtê teŋ amboac aêac lau Rom tatôm gebe takôc sa ma daŋgôm ŋa naŋ atom.” 22 Lau malacŋa sêbu êsêagêc sêwiŋ, tec gôliŋwaga sêkac êsêagêcnêŋ ŋakwê su ma sêjatu gebe si êsêagêc ŋa sêm. 23 Si êsêagêc ŋanô su acgom, go sêbaliŋ agêc sêsêp kapoacwalô sêja ma sêjac biŋsu ŋagejobwaga gebe ejop êsêagêc ŋapep. 24 Sêjac biŋsu ŋac tau amboac tonaŋ, tec kêbaliŋ êsêagêc sêsô andu kapoacwalôŋa ŋabalêm ŋaluŋŋa sêja ma kêkapiŋ êsêagêc eŋkaiŋ tôŋ ŋa ka.

25 Sêc e gêbêcauc gêja lu acgom, go Paulu agêc Sila teteŋ mec to sêjam nêŋ wê gêdêŋ Anôtô, ma lau kapoacwalôŋa sêŋô êsêagêc aweŋ sêwiŋ. 26 Sêgôm sêmoa e gaôgeŋ ôjô gêjam kapôêŋ, tec andu kapoacwalôŋa ŋaalê wiwic e katam samob gêlêc tau su sep tageŋ ma lau samob nêŋ kapoacwalô kêsu. 27 Ŋagejobwaga mata gêlac e gêlic kapoacwalô ŋakatam samob gêŋa, tec kêtaiŋ nê siŋ sa gebe êmbuc tau, gêjam kauc gebe lau kapoacwalôŋa oc sêc sêja. 28 Go Paulu gêmôêc awa kapôêŋ gebe “Ôjaiŋ taôm atom, aêac samob tec aŋgôŋ.” 29 Tec ŋac tau keteŋ gebe sêkôc ja sêmêŋ ma kêlêti kêsô gamêŋ ŋalêlôm gêja e jakêtênêp tau êndu-êndu gêu tau gêc Paulu agêc Sild eŋkaiŋŋa 30 ma gêwê êsêagêc sêsa awê sêja ma kêsôm gebe “O apômtauagêc, aê jaŋgôm asageŋ gebe Anôtô ênam aê kêsi.” 31 Tec êsêagêc sêsôm gebe “Ôkêŋ êwiŋ Apômtau Jesu, go Anôtô ênam aôm to nêm gôlôac kêsi.” 32 Go agêc sêwa Apômtaunê mêtê sa gêdêŋ eŋ to nê lau samob, taŋ sêŋgôŋ ênê andu naŋ. 33 Gêdêŋ gêbêcauc ŋasawa tonaŋgeŋ ŋac tau kêkôc êsêagêc sa jakêkwasiŋ êsêagêcnêŋ sêm ŋamala ma gaôgeŋ êsêagêc sêsagu eŋ to nê lau samob. 34 Go kêkôc êsêagêc sêsô nê andu jakêkêŋ mo êsêagêc seŋ, ma tonê gôlôac samob têntac ŋajam samucgeŋ gebe sêkêŋ gêwiŋ Anôtôgac.

35 Geleŋŋa lasê, go gôliŋwaga sêsakiŋ nêŋ sakiŋwaga sêja sêsôm gebe “Ôwi ŋac luagêc tonaŋ siŋ.” 36 Tec gejobwaga kêdôŋ biŋ tau gêdêŋ Paulu gebe “Gôliŋwaga sêsakiŋ lau sêmêŋ gebe jawi amagêc siŋ. Amboac tonaŋ aêc tobiŋmalôgeŋ ana.” 37 Tec Paulu kêsôm gêdêŋ êsêac gebe “Aêagêc ŋac Romŋa, mago sêmasaŋ aêagêcma biŋ atom. ma si aêagêc akô malacluŋ to sêbaliŋ aêagêc asêp kapoacwalô. Ma galoc sebe sêkêŋ aêagêc kelecgeŋ ana me. Masigoc, amboac tonaŋ atom. Êsêac tauŋ sêmêŋ ma sêwê aêagêc asa ana.” 38 Sakiŋwaga tedôŋ biŋ tonaŋ gêdêŋ gôliŋwaga. Ac sêŋô ŋawae gebe êsêagêc ŋac Romŋa ma têtakê ŋanô. 39 Tec sêja sê biŋmalo êsêagêc, go sêwê êsêagêc sêsa sêja ma teteŋ êsêagêc gebe sêwi êsêacnêŋ malac siŋ. 40 Agêc sêsa aŋga andu kapoacwalôŋa ma gêdêŋ Ludia jasêlic lasitêwai ma sê biŋmalô êsêac sa su. go sêc sêja.

Copyright information for `JAE