Acts 21

Paulu gêja Jerusalem

Aêac akêŋ êsêac siŋ ma alac e jaasô Kos. Go ŋabêbêc jaasô Rodo ma aŋga tonaŋ alac e jaasô Patara. Aêac atap waŋ teŋ sa gebe êlac êna Poinike, tec api ma alac aja. Alac e aê Kupro sa mêŋakêŋ gêc gasêŋa gêja ma apeŋ Suria e jaasô Turu, gebe sênam waba aŋga waŋ êsêp bau. Aêac atap ŋacseŋomi sa ma aŋgôŋ awiŋ êsêac bêc 7. Lau tonaŋ Ŋalau Dabuŋ kêkac êsêac e sêsôm gêdêŋ Paulu gebe êpi Jerusalem êna atom. Aêac amoa e ma bêc gêbacnê, go adi gebe asêlêŋ. Ma lau malacŋa samob to nêŋ lauo ma nêŋ ŋapalêo to ŋac sejoŋ aêac aŋga malac asa sêcluŋ aja. Go aŋga ambêô aêac apôŋ aeŋduc to ateŋ mec. Su, go akam tauŋ ma aêac api waŋ, ma êsêac sêc sêmu sêja.

Aêac alac aŋga Turu e jaasô Tolemai ma atap lasitêwai gamêŋ tônêŋa sa, tec aweŋ gêjac tauŋ ma aŋgôŋ awiŋ êsêac bêc teŋ. Ŋageleŋ adi asêIêŋ e aô lasê Kaisarea ma asô jaeŋwaga Pilip nê andu aja ma aŋgôŋ awiŋ eŋ. Ŋac tonaŋ samwaga 7 nêŋ teŋ eŋ. Ŋac tau latuio awêtakiŋ aclê seoc biŋ lasê sêmoa. 10 Aêac aŋgôŋ bêc ŋagêdô, go propete teŋ kêsêp aŋga Judaia gêmêŋ, nê ŋaê Agaba. 11 Eŋ kêtu ŋacleŋ gêdêŋ aêac. Ŋac tau kêkôc Paulunê ômbiŋkap su mêŋgêsô tau akaiŋ to lêma tôŋ ma kêsôm gebe “Ŋalau Dabuŋ nê biŋ tau tonec gebe Judawaga oc sênsô ômbiŋkap tecenec ŋatau tôŋ amboac tonec aŋga Jerusalem ma sêkêŋ eŋ êsêp lau samuc lemeŋ.” 12 Aêac to malac ŋatau aŋô biŋ tonaŋ, tec ateŋ eŋ gebe êpi Jerusalem êna atom. 13 Mago Paulu gêjô aêac aweŋ gebe “Amboac ondoc ataŋ ma agôm aêŋoc ŋalêlôm ŋawapac kêsa. Embe sênsô aê tôŋ ma sêŋgômmaŋ. Aê gajac dabiŋ tauc gebe jamac êndu aŋga Jerusalem êtu Apômtau Jesu nê ŋaêŋa.” 14 Aêac asôm biŋ elêmê tec ajam tauŋ tôŋ ma asôm gebe “Apômtaunê biŋ êtu anô.”

15 Ŋabêc ŋagêdô gêjaŋa acgom, go aêac amasaŋ ma waba ma api Jerusalem aja. 16 Ŋacseŋomi ŋagêdô aŋga Kaisarea sêwiŋ, tec sêwê aêac atu ŋacleŋ Nason. Eŋ ŋac buŋa laŋgwa teŋ aŋga Kupro.

Paulu kêtu ŋacleŋ Jakobo

17 Aêac jaaô lasê Jerusalem su, go lasitêwai sêkôc aêac sa totêntac ŋajamgeŋ. 18 Ŋageleŋ Paulu kêkôc aêac sa adêŋ Jakobo aja, ma laumata samob sêkac sa sêmoa tonaŋ. 19 Êsêac aweŋ gêjac tauŋ su, go Paulu gêjac miŋ biŋ, taŋ Anôtô gêgôm gêdêŋ lau samuc gebe kêpuc ênê sakiŋ tôŋ naŋ tomalageŋ. 20 Lau tau sêŋô e sêlambiŋ Anôtô ma sêsôm gêdêŋ Paulu gebe “O lasitêwa, aôm gôlicgac, Judawaga taêsam ŋanô lasê sekêŋ gêwiŋ Kilisi, mago sêsap Mosenê biŋsu tôŋ sêjac ŋawae. 21 Lau tonaŋ sêŋô ŋawae gebe aôm kôdôŋ Judawaga, taŋ sêsêp lau samuc ŋasawa naŋ, gebe sêwi Mose siŋ, ma kôsôm gebe sêsa nêŋ ŋapalê atom to sêwi lêŋ mêtê laŋgwaŋa siŋ. 22 Ma galoc daŋgôm amboac ondoc. Lau samob oc sêŋô aôm gômôêŋ ŋawae su. 23 Amboac tonaŋ ôŋgôm êtôm biŋ, tec aêac abe asôm êndêŋ aôm nec. Aêacma lau aclê sêjac mata biŋ kêpi biŋ teŋ tec sêŋgôŋ. 24 Naôkôc lau tonaŋ sa, gebe lau dabuŋwaga sêŋgôm biŋ atu selecŋa êpi aôm ôwi  êsêac ma ônam ôli lau, taŋ sêkapiŋ êsêac môkêŋlauŋ naŋ, go lau samob sêjala gebe bi ŋ, taŋ têdôŋ kêpi aôm naŋ, ŋanô masi. Êsêac tauŋ ocgo sêlic aôm gebe kôsa nêm lêŋ kôsap biŋsu tôŋgeŋ. 25 Ma biŋ kêpi lau samuc, taŋ sêkêŋ gêwiŋ su naŋ, aêac asôm biŋ tonec kêtu tôŋ gebe êsêac sêŋgamiŋ tauŋ êndêŋ da gwamŋa to êndêŋ bôc ŋadec, ma êndêŋ bôc, taŋ sêgiŋ êndu ma êndêŋ mockaiŋo to mockaiŋ.” 26 Ŋabêbêc Paulu kêkôc lau tau sa, ma sêmasaŋ ênê biŋ êtu selecŋa gêwiŋ lau tau tonaŋ, go kêsô lôm dabuŋ gêja ma kêsôm bêc sêŋgôŋ selecŋa lasê ma sêmasaŋ noc sêkêŋ nêŋ da êndêŋ-êndêŋgeŋŋa.

Êsêac sêkôc Paulu tôŋ aŋga lôm dabuŋ

27 Kêdabiŋ gebe ŋabêc 7 tonaŋ êmbacnê ma Judawaga Asiaŋa sêlic eŋ gêmoa lôm dabuŋ, tec sêli lau samob nêŋ ŋalêlôm sa e sêkôc eŋ tôŋ. 28 Ma sêmôêc gebe “Aô, Israelwaga, anam aêac samaŋ. Alic ŋac tau, taŋ kêdôŋ lau aŋga gamêŋ samob gêbu lau Israel to Mosenê biŋsu ma gamêŋ tau tonec naŋ. Ma galoc gêwê Helen ŋagêdô sêsô lôm dabuŋ sêja ma gêgôm gamêŋ dabuŋ tau kêtu secgoc.” 29 Ŋasawa teŋ lau tonaŋ sêlic ŋac Epeseŋa Tropim gêmoa malacluŋ gêwiŋ Paulu, tec seboc Paulu oc gêwê eŋ kêsô lôm dêbu ŋ gêja. 30 Tec malac ŋatau samob sêii tauŋ sa ma sêjac tauŋ sa sêpi tageŋ jasêkôc Paulu tôŋ ma sê eŋ aŋga lôm dêbu ŋ kêsa gêja, ma sêlai ŋakatam auc sebeŋ. 31 Lau tau sêsôm sebe sênac Paulu êndu e siŋwaganêŋ kapitaisêga gêŋô lau Jerusalemŋa samob sêli tauŋ sa ŋawae, 32 tec kêkôc siŋwaga to nêŋ kapitai ŋagêdô sa jasêlêti dêdêŋ lau tau sêsêp sêja. Lau tonaŋ sêlic kapitaisêga to siŋwaga sêmêŋ ma sêwi Paulu siŋ sêjac eŋ kêtiam atom. 33 Go kapitaisêga kêtu gasuc gêja, kêkôc Paulu tôŋ ma kêsôm sêsô eŋ tôŋ ŋa kapoacwalô luagêc. Go kêtu kênac ênê ŋam to biŋ, taŋ eŋ gêgôm naŋ. 34 Lau samob sêmôêc kesotau-kesotau e sêôc gamêŋ auc laŋgwageŋ, tec eŋ gêŋô biŋ sapu ma kêsôm sêkôc Paulu dêdêŋ siŋwaganêŋ gamêŋ sêja. 35 Sêô lasê ŋatêcwale ma lau sebe sênac Paulu, tec siŋwaga sêôc eŋ sa lôlôcgeŋ, 36 gebe lau tau samob sêwiŋ ma sêmôêc paŋgeŋ gebe “Enaŋamaŋ.”

Paulu gêjam talaŋ tau

37 Sebe sêkêŋ Paulu êsô siŋwaganêŋ gamêŋ êna, tec kêsôm gêdêŋ kapitaisêga gebe “Oc ôlôc gebe jasôm biŋ teŋ êndêŋ aôm me masi.” Ma ŋac tau kêsôm gêdêŋ eŋ gebe “Aôm kôsôm biŋ Helen me masi. 38 O, aôm ŋac Aiguptuŋa, taŋ wali teŋgeŋ gôli kêjaŋgowaga 4,000 nêŋ ŋalêlôm sa ma kojoŋ êsêac sêsa gamêŋ sawa sêja naŋ, aôm atom me.” 39 Tec Paulu kêsôm gebe “Aê tinoc Judao, tec kêkôc aê aŋga Tarsus Kilikiaŋa ma gawê kaiŋ malac towae tônê gawiŋ, tec kateŋ aôm gebe ôlôc ma jasôm biŋ êndêŋ lau tônê.” 40 Kapitaisêga gêlôc, go Paulu kêkô têcwale ma gêjab lêma gêdêŋ lau e gamêŋ gêmac, go awa gêjac êsêac ŋa aweŋ Ebolai gebe

Copyright information for `JAE