Acts 22

“O lasitêwaac to tamocac, biŋ taŋ galoc gabe jawa tauc sa êndêŋ amac naŋ, aŋô acgom.” Lau tau sêŋô eŋ awa gêjac êsêac ŋa aweŋ Ebolaigeŋ, tec biŋ gêmac samob. Ma Paulu kêsôm gebe “Aê tinoc Judao kêkôc aê aŋga Tarsus Kilikiaŋa ma katu kapôêŋ aŋga malac tonec, kasô Gamalielnê lôm ma kêdôŋ tameŋinêŋ biŋsu gêdêŋ aê e tomalageŋ. Aê gajam sakiŋ Anôtô gajac ŋawae katôm tec amac samob agômagôm amoa nec. Aê kêjanda lau, taŋ sêsap mêtê wakuc tonec tôŋ naŋ, e gaseŋ êsêac su sêjaŋa ma gêsô êsêac tôŋ to kakêŋ êsêac lauo to ŋac sêsêp kapoacwalô sêja. Ŋac dabuŋsêga to laumata samob embe sêwa aêŋoc miŋ sa, oc êtôm tec tauc kasôm nec. Aê kakôc papia aŋga êsêacnêŋ gêjac lasitêwai Damaskusŋa ŋawae, tec gaja gebe jakôc êsêac, taŋ sêmoa tonaŋ naŋ tôŋ, ma- jakêŋ êsêac sêna Jerusalem gebe têtap nêŋ ŋagêjô sa.

Paulu gêjac tau nê miŋ Apômtau Jesu gêjam eŋ ôkwiŋa

“Aê kasêlêŋ gamoa e kêdabiŋ Damaskus. Ma gêdêŋ oc kêkô ŋaluŋgeŋ, go ŋawê kapôêŋ teŋ gaôgeŋ aŋga undambê mêŋkêpô aê e gêjam aucgeŋ. Aê gau tauc jagaêc nom, go gaŋô awa teŋ gêdêŋ aê gebe ‘Saulu, Saulu, asageŋ kôjanda aê.’ Ma aê gajô biŋ tonaŋ gebe ‘Apômtau, aôm asa.’ Go eŋ kêsôm gêdêŋ aê gebe ‘Aê Jesu Nasaretŋa, tec kôjanda aê.’ Lau taŋ sêwiŋ aê naŋ, sêlic ŋawêgeŋ, mago sêŋô ŋac, taŋ kêsôm biŋ gêdêŋ aê naŋ, awa atom. 10 Go aê kasôm gebe ‘Apômtau, aê jaŋgôm asageŋ.’ Ma Apômtau kêsôm gêdêŋ aê gebe ‘Ôndi sa ma ôna Damaskus acgom, go sêwa biŋ samob, taŋ Anôtô gebe ôŋgômŋa naŋ, sa êndêŋ aôm aŋga tônê.’ 11 Ŋawê toŋawasi tônê kêpô aê e matocanô kêtu pec ma ŋoc lau sêkam aêgeŋ gaja Damaskus.

12 “Ma ŋac mansaŋ teŋ, nê ŋaê Anania, kêmasaŋ biŋsu ŋapep e Judawaga gamêŋ tônêŋa samob tetoc eŋ sa. 13 Ŋac tau gêdêŋ aê gêmêŋ mêŋkêkô aê laŋôcnêmŋa ma kêsôm gebe ‘Lasicenec Saulu, matam êlêc.’ Ma gêdêŋ tonaŋgeŋ matoc gêlac e galic eŋ kêkô. 14 Ma ŋac tau kêsôm gebe ‘Tameŋinêŋ Anôtô kêjaliŋ aôm sa gebe ôjala ênê biŋ ma ôlic ŋac gêdêŋ tau to ôŋô eŋ awa, 15 gebe ôwa eŋ sa êndêŋ ŋamalac samob ŋa biŋ, taŋ gôlic to gôŋô naŋ. 16 Ma galoc gobe amboac ondoc. Ôndi sa, mêŋawam ênac ênê ŋaê ma ôliŋ saŋgu êkwasiŋ nêm sec su.’

Jesu kêsakiŋ Paulu gêdêŋ lau samuc gêja

17 “Gamoa acgom, go gamu gamêŋ Jerusalem kêtiam mêŋkateŋ mec gamoa lôm dabuŋ e katuc kaiŋ teŋ kêsa 18 ma galic Jesu kêkô ma kêsôm biŋ gêdêŋ aê gebe ‘Ôwi Jerusalem siŋ sebeŋ ma ônsaic taômgeŋ ôna, gebe êsêac oc sêkôc biŋ, taŋ aôm gobe ôwa saŋa naŋ, sa atom.’ 19 Ma aê kasôm gebe ‘Apômtau, êsêac tauŋ sêjalagac gebe aê tec kakôc lau, taŋ sêkêŋ gêwi ŋ aôm naŋ, tôŋ ma kalêsu êsêac ŋanô-ŋanô kêtôm Judanêŋ lômgeŋ. 20 Ma gêdêŋ taŋ sêkêc ŋac-gêwa-aôm-sawaga Stepan nê dec siŋ naŋ, tauc kakô gawiŋ e galic ŋajam ma gajob lau-sêjac-eŋ-ênduwaga nêŋ ŋakwê.’ 21 Ma ŋac tau kêsôm gêdêŋ aê gebe ‘Ôêc ôna, aê jasakiŋ aôm ôndêŋ lau samuc, taŋ sêŋgôŋ gamêŋbômgeŋ naŋ ôna.’”

Paulu agêc kapitaisêga nêŋ biŋ

22 Lau sêŋô Paulunê biŋ e mêŋgêdêŋ tonaŋ, go sêli aweŋ sa ma sêmôêc gebe “Anseŋ ŋac tonec su aŋga nom, gebe eŋ kêtôm gebe êmoa mata jali atom.” 23 Êsêac sêŋala e sêôc gamêŋ auc laŋgwageŋ sêkô ma têdaiŋ nêŋ ŋakwê baliŋ to sêpalip kekop kêpi jakêkô. 24 Tec kapitaisêga kêjatu gebe sêwê Paulu sêna siŋwaganêŋ gamêŋ ma kêsôm gebe si eŋ ma têtu Iêsu biŋ, taŋ lau sêmôêc kêpi eŋ naŋ ŋam. 25 Êsêac sêsô eŋ ŋa ômbiŋkap tôŋ ma Paulu kêsôm gêdêŋ kapitai, taŋ kêkô ŋagala naŋ, gebe “Embe ŋac Romŋa teŋ, ma amêtôc eŋ atom, oc êtôm gebe ai eŋ ŋaômageŋ me masi.” 26 Kapitai gêŋô biŋ tonaŋ, tec gêdêŋ kapitaisêga jakêsôm gêdêŋ eŋ gebe “Aôm gobe ôŋgôm amboac ondoc, ŋac tônê eŋ Romgoc.” 27 Tec kapitaisêga mêŋkêtu kênac Paulu gebe “Ôsôm êndêŋ aê acgom, aôm ŋac Romŋa biŋŋanô me masi.” Ma Paulu gêlôc gebe “Aec, biŋŋanô.” 28 Go kapitai gêjô eŋ awa gebe “Aê gabe jatu ŋac Romŋa naŋ gajam ôli ŋa awa kapôêŋ.” Ma Paulu kêsôm gebe “Aê tonec ŋac Romŋa aŋga tamocnê.” 29 Amboac tonaŋ lau, taŋ sebe têtu lêsu eŋ naŋ, gacgeŋ sêkac tauŋ su. Ma kapitaisêga tau, taŋ kêjala gebe Paulu ŋac Romŋa naŋ, kêtêc tau kêtu kêsôm sêsô ŋac tau tôŋŋa.

Paulu kêkô lau dabuŋsêga to laumata laŋôŋnêm

30 Ŋageleŋ kapitaisêga gebe êŋô biŋ, taŋ Judawaga sêgôliŋ kêpi Paulu naŋ, ŋam ŋapep. Tec kêsôm sêgaboac eŋ su ma kêkac lau dabuŋsêga to laumata samob sa, go kêsôm sêwê Paulu sêsêp sêja jakêkô êsêac laŋôŋnêm.

Copyright information for `JAE