Acts 23

Paulu mata gê lau ŋanô, taŋ sêkac tauŋ sa naŋ, ma kêsôm gebe “O lasitêwaac, aê kasa ŋoc lêŋ toŋoc ŋalêlôm ŋawageŋ gamoa Anôtô laŋônêmŋa e mêŋgêdêŋ tonec.” Tec ŋac dabuŋsêga Anania kêjatu lau, taŋ sêkô jabaŋ eŋ naŋ, gebe têtap eŋ awa auc. Ma Paulu kêsôm gêdêŋ eŋ gebe “Aôm taŋ kotoc taôm sa ŋaôma-ŋaôma naŋ, Anôtô êtap aôm. Aôm gôŋgôŋ tonaŋ gobe ômêtôc aêŋoc biŋ êtôm biŋsu ma amboac ondoc tec goseŋ biŋsu ma kôsôm gebe têtap aê nec.” Go lau, taŋ sêkô jabaŋ Paulu naŋ, sêsôm gebe “Amboac ondoc aôm gôbu Anôtônê ŋac dabuŋsêga amboac tonaŋ.” Tec Paulu kêsôm gebe “Lasitêwaac, aê kajala gebe eŋ ŋac dabuŋsêga naŋ atom. Teto gêc gebe ‘Ôsôm biŋ sec êpi launêŋ gôliŋwaga atom.’”

Paulu kêjala Sadukainêŋ lau ŋagêdô ma Parisainêŋ ŋagêdô sêmoa sêwiŋ, tec gêmôêc kapôêŋ gêdêŋ êsêac, taŋ sêkac tauŋ sa naŋ, gebe “O lasitêwaac, Parisai teŋ latu aê ma aê tauc Parisai amboac tonaŋ. Êsêac sêmêtôc aê kêtu kakêŋ matoc ŋacmatê sêndi saŋa.” Kêsôm biŋ tonaŋ su ma Parisai to Sadukai sêli tauŋ sa sêmoa e sêkac tauŋ kêkôc, gebe Sadukai sêsôm gebe ŋacmatê sêndi sa atom ma aŋela to ŋalau sêmoa atom. Ma Parisai tec sêkêŋ gêwiŋ gêŋ tonaŋ ŋai samob. Lau tau sêmôêc sêôc aucgeŋ e biŋsutau ŋagêdô aŋga Parisainêŋ toŋ dêdi sa ma seseŋ tauŋ ma sêsôm gebe “Aêac atap sec teŋ sa gêc ŋac tonec nê atom, tageŋ moae ŋalau teŋ me aŋela teŋ oc kêsôm biŋ gêdêŋ eŋ nec.” 10 Sêsôm tauŋ ŋanô-ŋanô e kapitaisêga kêtêc gebe moae sêkac Paulu êkôc, tec kêjatu siŋwaga matu teŋ sêsêp mêŋsêjaŋgo Paulu su aŋga launêŋ ma sêkôc eŋ sêja nêŋ gamêŋ.

11 Ŋagêbêc tonaŋ Apômtau mêŋkêkô gêwiŋ Paulu ma kêsôm gebe “Têmtac êpa su, aôm gôwa aê sa aŋga Jerusalem su ma oc ôwa aê sa aŋga Rom amboac tonaŋgeŋ.”

Lau Juda sêkic Paulunê biŋ

12 Gamêŋ ŋawê kêsa acgom, go Juda ŋagêdô sêkac tauŋ sa ma sêjac kapoac tauŋ gebe sêniŋ to sênôm gêŋ teŋ atom e sênac Paulu êndu su acgom. 13 Ma lau, taŋ sêkic Paulunê biŋ amboac tonaŋ naŋ, sêlêlêc 40 su. 14 Lau tau tonaŋ dêdêŋ lau dabuŋsêga to laumata ma sêsôm lasê gebe “Aêac lau tonec ajac kapoac tauŋ gebe aniŋ to anôm gêŋ teŋ atom e anac Paulu êndu acgom. 15 Amboac tonaŋ amac to laumata naansau kapitaisêga gebe êkêŋ ŋac tau êsêp êndêŋ amac êmêŋ gebe atu Iêsu ênê biŋ ŋapep. Ma aêac oc naamansaŋ tauŋ kwanaŋgeŋ gebe anac eŋ êndu aŋga intêna ŋadambê teŋ. Eŋ oc êô lasê amac atom.”

16 Paulunê sib gêŋô sêkic sa laŋgwa nê biŋ ŋawae, tec gêja kêsô siŋwaganêŋ gamêŋ jakêsôm lasê gêdêŋ Paulu. 17 Tec Paulu gêmôêc kapitai teŋ ma kêsôm gêdêŋ eŋ gebe “Ôwê ŋapalê tecenec ôndêŋ kapitaisêga ôna, eŋ gebe êsôm biŋ teŋ êndêŋ eŋ.” 18 Tec kapitai kêkôc ŋapalê tau sa ma gêwê eŋ agêc dêdêŋ kapitaisêga sêja, go kêsôm gêdêŋ eŋ gebe “Ŋac kapoacwalôŋa Paulu gêmôêc aê gaja ma keteŋ gebe jakôc ŋapalê tecenec jandêŋ aôm jamêŋ, gebe ŋac tau gebe êsôm biŋ teŋ êndêŋ aôm.” 19 Go kapitaisêga kêkam ŋapalê tau lêma agêc jasêkô tauŋŋa ma kêtu Iêsu eŋ gebe “Aôm gobe ôsôm biŋ amboac ondoc êndêŋ aê.” 20 Ma ŋapalê tau kêsôm gebe “Judawaga sêmasaŋ biŋ kêtu tôŋ gebe teteŋ aôm ma bêbêc ôkêŋ Paulu êsêp êndêŋ laumata êna. Êsêac sebe sênsau sêôc aôm gebe têtu Iêsu ênê biŋ ŋapep. 21 Amboac tonaŋ ôkêŋ êwiŋ êsêacnêŋ biŋ atom, gebe lau kêlêlêc 40 su dêdib eŋ sêmoa. Êsêac sêjac kapoac tauŋ gebe sêniŋ to sênôm gêŋ teŋ atom e sênac Paulu êndu acgom. Ma galoc sêmasaŋ tauŋ sêsaê aômgeŋ gebe ôlôc.” 22 Go kapitaisêga gêjac biŋsu ŋapalê tecenaŋ gebe “Biŋ taŋ kôsôm lasê gêdêŋ aê naŋ, ônac miŋ êndêŋ lau teŋ atom.” Ma kêkêŋ eŋ gêc gêja.

Sêsakiŋ Paulu gêdêŋ gôliŋwaga Peliki gêja

23 Go kapitaisêga gêmôêc nê kapitai luagêc ma kêsôm gêdêŋ êsêagêc gebe “Amansaŋ siŋwaga 200 to lau sêŋgôŋ hosŋa 70 ma lau kêmŋa 200 gebe sêsa Kaisarea sêna êndêŋ 9 oklok êmbêc. 24 Amansaŋ hos ŋagêdô êwiŋ gebe Paulu êŋgôŋ ŋaô ma akôc eŋ toôli samucgeŋ andêŋ gôliŋwaga Peliki ana.” 25 Go keto papia teŋ gêwiŋ gebe

26 “Aê Klaudi Lusi aoc gêjac gôliŋwaga towae Peliki. 27 Ŋac tecenec tec Judawaga sêkôc eŋ tôŋ ma sebe sênac eŋ êndu. Aê gaŋô eŋ ŋac Romŋa, tec kakôc eŋ sa ma gajam eŋ kêsi. 28 Aê gabe jakip biŋ, taŋ sêgôliŋ kêpi eŋ naŋ, ŋam sa, tec kakêŋ eŋ kêsêp gêdêŋ nê laumata gêja. 29 Aê katap sa gebe biŋ, taŋ sêgôliŋ kêpi eŋ naŋ, ŋam kêsêp êsêacnêŋ biŋsu, mago êsêac tauŋ nêŋ ŋalêlôm kêpi tageŋ kêtu biŋ tonaŋŋa atom. Tageŋ aê galic biŋ teŋ kêtôm amboac tanac eŋ êndu to takêŋ eŋ êŋgôŋ kapoacwalôŋa naŋ, gêc atom. 30 Ma gaŋô biŋ teŋ ŋawae gebe dêdib eŋ sebe sênac eŋ êndu, tec kakêŋ eŋ sebeŋ gêdêŋ aôm gêwac ma ka-som gêdêŋ lau-sêgôliŋ-biŋ-kêpi-eŋwaga gebe dêndêŋ aôm sêwac ma sêwa nêŋ biŋ sa êndêŋ aôm.”

31 Siŋwaga tau sêkôc Paulu sa kêtôm kapitaisêganê biŋ ma gêdêŋ gêbêc sêkôc eŋ sêja Antipatri. 32 Ŋabêbêc sêkêŋ eŋ gêdêŋ lau, taŋ sêŋgôŋ hos ŋaô naŋ, gebe sêkôc eŋ sêna, go êsêac tauŋ sêc sêmu sêja nêŋ gamêŋ kêtiam. 33 Lau tonaŋ jasêô lasê Kaisarea, go sêkêŋ papia gêdêŋ gôliŋwaga ma sêkôc Paulu dêdêŋ eŋ sêja. 34 Gôliŋwaga kêsam papia su, go kêtu kênac Paulu gebe eŋ ŋac aŋga gamêŋ ondocŋa e gêŋô gebe eŋ aŋga Kilikia. 35 Tec kêsôm gebe “Lau taŋ sêgôliŋ biŋ kêpi aôm naŋ, sêmêŋ acgom, go jaŋô nêm biŋ.” Ma kêjatu gebe sejop Paulu êŋgôŋ Herodonê andu.

Copyright information for `JAE