Amos 2

Moab

Apômtau kêsôm biŋ tonec gebe

“Aê jawi Moabnê keso têlêac me aclêŋa ŋagêjô siŋ atom,
gebe eŋ kêpac kiŋ Edomŋa nê ŋatêkwa kêtu ŋop.
Amboac tonaŋ aê jakêŋ ja êniŋ Moab
ma êndaŋgac andu kiŋŋa aŋga Kerijot
ma Moab ênaŋa êsêp siŋ ŋakicsêa ŋalêlôm
êndêŋ taŋ wambaŋ to dauc êtaŋ êmoa naŋ.
Aê oc jasap gôliŋwaga tulu aŋga êsêac ŋaluŋ
to janac ênê kasêga samob êndu sêwiŋ eŋ.”
Apômtaunê biŋ tau tonec.

Juda

Apômtau kêsôm biŋ tonec gebe

“Aê gabe jawi Judanêŋ keso têlêac me aclêŋa ŋagêjô siŋ atom,
gebe êsêac têtiŋ Apômtaunê biŋsu su
to sejop ênê ŋagôliŋ atom.
Ma êsêacnêŋ dansaŋ, taŋ kêtu tameŋinêŋ lêŋ ŋagôliŋ naŋ,
gêwê êsêac seo amboac tonaŋgeŋ.
Amboac tonaŋ aê jakêŋ ja êniŋ Juda
ma êndaŋgac Jerusalem ŋaandu kiŋŋa.”

Anôtô kêmêtôc lau Israel

Apômtau kêsôm biŋ tonec gebe

“Aê jawi Israelnêŋ keso têlêac me aclêŋa ŋagêjô siŋ atom,
gebe êsêac sêkêŋ ŋac gêdêŋ gêdêŋ lau sêjam ôli kêtu têtap silber saŋa,
ma ŋac ŋalêlôm sawa kêtu têtap atapa saŋa.
Êsêac sêka lau ŋalêlôm sawa môkêŋapac tôŋ kêsêp kekop ŋalêlôm
ma sêkô lau-ŋalêlôm-ŋawapacwaga nêŋ lêŋ auc.
Ŋac teŋ agêc tama sêsô dêdêŋ mockaiŋo tageŋ
e sêgôm ŋoc ŋaê dabuŋ kêtu sec.
Êsêac sêsa tauŋ sic sêc altar samob ŋagala
ma ŋakwê, taŋ sêjaŋgo su aŋga launêŋ naŋ, kêtu nêŋ mê
ma sênôm wain, taŋ lau sêkêŋ kêtu nêŋ biŋ ŋagêjôŋa naŋ,
aŋga nêŋ Anôtônê andu.

“Ma aê, tec gamuŋ amac ma gaseŋ lau Amor,
taŋ waso-waso têtôm kaseda
ma ŋajaŋa têtôm kamem naŋ.
Aê gaseŋ nêŋ ŋanô, taŋ geŋkaleŋ lôlôc naŋ,
to nêŋ ŋawakac, taŋ gêc nom ŋalêlôm naŋ.
10 Aê kakôc amac sa aŋga gamêŋ Aiguptuŋa api amêŋ
to gawê amac amoa gamêŋ sawa kêtôm jala 40,
gebe awê kaiŋ lau Amor nêŋ gamêŋ,
11 Ma aê, tec gajac nêm latômi ŋagêdô sa têtu propete
ma nêm ŋacseŋomi ŋagêdô têtu lau sêjam dabuŋ tauŋŋa.
O lau Israel, biŋ amboac tonaŋ biŋŋanô me masi.”
Apômtaunê biŋ tau tonec.
12 “Mago amac akêŋ wain gêdêŋ lau sêjam dabuŋ tauŋŋa tau sênôm
to ajac jao propete ma asôm gebe ‘Aoc biŋ lasê atom.’

13 “Alic acgom, aê jaŋgôm nêm gamêŋ kôjô-kôjôgeŋ
êtôm waŋ, taŋ gêlac gwêc sec naŋ.
14 Ŋac, taŋ ŋagaô naŋ, embe êc su, oc ênam eŋ sa atom.
Ma ŋac ŋajaŋa nê ŋaclai ŋanô masi.
Ma ŋac ŋaclai ênam tau sa êtôm atom.
15 Ŋac talamŋa oc êkô ŋajaŋa atom.
Ŋac, taŋ ŋagaô naŋ, ênam tau sa atom.
Ma ŋac, taŋ gêŋgôŋ hos ŋaô naŋ, ênam katu sa atom.
16 Ma lau siŋsêlêc, taŋ sêmoa totêntac kêpa sugeŋ naŋ,
oc sêc toôliŋ ŋaôma êndêŋ bêc tonaŋ.”
Apômtaunê biŋ tau tonec.
Copyright information for `JAE