Amos 3

Kôm taŋ gêjac propete ŋawae naŋ

O lau Israel, aŋô biŋ tonec, taŋ Apômtau kêsôm kepeŋ amac gôlôac samob, taŋ kakôc sa aŋga gamêŋ Aiguptuŋa api amêŋ naŋ.

“Aê kajaliŋ amac taômgeŋ sa aŋga gôlôac nomŋa samob nêŋ.
Kêtu tonaŋŋa aê gabe jamêtôc amac êtu nêm keso samobŋa.

“Ŋac luagêc, taŋ sêjac noc tauŋ atom naŋ,
sêsêlêŋ sêwiŋ tauŋ me.
Lewe, taŋ kêtap gwada sa atom naŋ,
oc êu awa ŋaôma aŋga saleŋ me.
Lewe ŋalatu, taŋ gêjac gêŋ atom naŋ,
oc êkêkwaŋ aŋga nê gêsuŋ me.
Embe sêwa lakô atom, oc lip ênac moc me.
Gwada teŋ embe êsêp lakô atom,
oc lipkaiŋ êmandi sa me.
Dauc embe êtaŋ aŋga malac,
oc lau têtakê atom me.
Gêŋwapac embe êtap malac teŋ sa,
naŋ Apômtau gêgôm atom me.
Biŋŋanô, Apômtau Anôtô êŋgôm gêŋ teŋ atom,
eŋ eoc nê biŋ ŋalêlômŋa lasê
êndêŋ propete, taŋ têtu ênê sakiŋwaga naŋ, êmuŋ acgom.
Lewe embe êtaŋ asa oc êtêc tau atom.
Apômtau Anôtô embe êsôm biŋ, asa oc eoc biŋ lasê atom.”

Samaria ênaŋa ŋapuc

Asôm lasê êndêŋ lau, taŋ sêŋgôŋ andu kiŋŋa aŋga Asuria
to êsêac, taŋ sêŋgôŋ andu kiŋŋa aŋga gamêŋ Aiguptuŋa,
gebe “Akac taôm sa aŋga lôc Samariaŋa,
go alic lau sênac seso tauŋ aŋga gamêŋ tau
to sêkôniŋ tauŋ sêmoa gamêŋ tau.”
10 Apômtau kêsôm gebe “Êsêac sêjam kauc lêŋ sêŋgôm gêŋ naêndêŋŋa.
Êsêac sêboa ŋaclai sêkôniŋ lauŋa to sêjaŋgo gêŋŋa sa aŋga nêŋ andu kiŋŋa.”
11 Kêtu tonaŋŋa Apômtau Anôtô kêsôm biŋ tonec gebe
“Ŋacjo sêŋgi gamêŋ auc ma senseŋ nêm tuŋbôm su
ma sêjaŋgo waba su aŋga nêm andu kiŋŋa.”
12 Apômtau kêsôm biŋ tonec gebe “Aê oc janam lau Israel, taŋ sêŋgôŋ nêŋ bec ŋalêlôm to sêc nêŋ mê ŋawasi ŋaô aŋga Samaria naŋ, kêsi êtôm ŋacgejob gêjam dombalabu ŋapopoc me taŋalauŋ kêsi aŋga lewe awasuŋ.”

13 Apômtau Anôtô, lausiŋ undambêŋa nêŋ Anôtô, kêsôm gebe
“Aŋô biŋ tonec ma awa Jakobnê gôlôacnêŋ keso sa.
14 Êndêŋ bêc, taŋ jamêtôc Israel êtu nêŋ sêgêli biŋŋa naŋ,
aê oc jamêtôc Betel ŋaaltar ma jatuc altar tau ŋajabo tulu
e embeŋ êsêp nom.
15 Aê jatuc andu komôŋa to andu ockêsaŋa popoc.
Ma andu, taŋ sêkwê toŋagêlôŋ kaiŋ teŋ naŋ, ênaŋa
ma andu taêsam maleŋmê.”
Apômtaunê biŋ tau tonec.
Copyright information for `JAE