Amos 4

“Amac bulimakao Basanŋa,*
taŋ amoa lôc Samariaŋa naŋ,
aŋô biŋ tonec.
Amac akôniŋ lau ŋalêlôm sawa toŋ to alêsa lau-sêpô- lênawaga popoc,
ma asôm gêdêŋ ŋaci gebe
‘Akôc gêŋ amêŋ, gebe anômôŋ.’
Apômtau kêtôc lêma ma gebe nê biŋ ŋanô êsa êtu eŋ ŋac dabuŋŋa gebe
Alic acgom, bêc oc mêŋêsa, go sêŋgauc amac asa amêŋ ŋa lêŋgêc
to sênac nêm lauo ŋamuŋa ŋa êŋpaŋ.
Ma amac oc akêŋ taôm tageŋ-tageŋ asa tuŋbôm ŋakêlêtêc ŋasawa ana
ma sêmbaliŋ amac siŋ ana Hermon.”
Apômtaunê biŋ tau tonec.

“Amêŋ Betel ma aŋgôm gêŋ alôb-alôb.
Amêŋ Gilgal ma aŋgôm gêŋ alôb-alôb êlêlêc su.
Akêŋ nêm daja êtôm bêbêcgeŋ samob
ma akêŋ nêm gêŋ teŋ ŋanô teŋ ŋanô êtôm bêc êtu têlêacŋa samob.
Akêŋ polom togoleŋ êtu da daŋge
to anam nêm da awalauŋ ŋawae êsa ênêc awêgeŋ.
O lau Israel, biŋ tonaŋ amac têmtac gêwiŋ gebe aŋgôm.”
Apômtau Anôtô nê biŋ tau tonec.

“Kêtôm nêm malac samob, aê kakêŋ amac lumluŋ gêŋac gêŋ teŋ atom
to kakêŋ amac aôc tôbôm moŋa kêtôm nêm gamêŋgeŋ.
Mago amac ajam taôm ôkwi amu adêŋ aê amêŋ atom.”
Apômtaunê biŋ tau tonec.

“Aê kagamiŋ kom gêdêŋ amac amboac tonaŋgeŋ e ajôŋ têlêac su,
go ajoŋ kôm ŋanô sa.
Aê kakêŋ kom gêjac malac teŋ,
ma kagamiŋ kom gêdêŋ malac teŋ.
Kôm teŋ kêtap kom sa,
ma kôm, taŋ kêtap kom sa atom naŋ, ŋagêŋ kêmêliŋ.
Amboac tonaŋ tec malac luagêc me têlêac sêsêlêŋ sêja malac teŋ
sebe sênôm bu, tageŋ sênôm e gêôc êsêac tôŋ atom.
Mago amac ajam taôm ôkwi amu adêŋ aê amêŋ atom.”
Apômtaunê biŋ tau tonec.

“Aê kakêŋ gwa gêjac amacnêm mo to kakêŋ kôm ŋanô kêmêliŋ.
Aê gaseŋ nêm kôm moŋa to kôm wainŋa su.
Wagô geŋ amacnêm jambô to katêkwi.
Mago amac ajam taôm ôkwi amu adêŋ aê amêŋ atom.”
Apômtaunê biŋ tau tonec.

10 “Aê kasakiŋ kole gêdêŋ amac kêtôm gagôm gêdêŋ Aiguptu.
Aê gajac nêm lau wakuc êndu ŋa siŋ.
Aê kajanda nêm hos sêc sêja.
Ma nêm gamêŋ becŋa ŋasu sec e gêjam gamêŋ-gamêŋ aucgeŋ.
Mago amac ajam taôm ôkwi amu adêŋ aê amêŋ atom.”
Apômtaunê biŋ tau tonec.

11 “Aê gaseŋ amac su katôm gaseŋ Sodom to Gomora su.
Ma amac atôm jakalic, taŋ sêwê sic aŋga ja naŋ.
Mago amac ajam taôm ôkwi amu adêŋ aê amêŋ atom.”
Apômtaunê biŋ tau tonec.

“Kêtu tonaŋŋa aê gabe jaŋgôm biŋ tonaŋ ŋanô êsa êpi
12 amac, o Israel.
O Israel, aê gabe jaŋgôm biŋ tonaŋ ŋanô êsa, tec ômansaŋ taôm,
gebe ôndac nêm Anôtô.”
13 Ôlic acgom, ŋac taŋ gêboa lôc sa to kêkêŋ mu naŋ,
ŋac taŋ geoc nê biŋ, taŋ taê gêjam naŋ, lasê gêdêŋ ŋamalac naŋ,
ŋac taŋ kêkêŋ gamêŋ kelendeŋ to ŋakesec
ma kêsêlêŋ gêmoa nom ŋabau ŋaô naŋ,
nê ŋaê gebe Apômtau, lausiŋ undambêŋa nêŋ Anôtô.
Propete gêjam dôŋ Israelnêŋ lauo kêpi bulimakao
Basanŋa, taŋ seŋ gêŋgeŋ ma sêjam kom teŋ atom.
Copyright information for `JAE