Daniel 9

Daniel keteŋ mec kêtu nê lauŋa

Ahasweros latu Darius, taŋ nê ŋam kêsêp lau Medeŋa naŋ, kêtu kiŋ gamêŋ Kaldeaŋa. Gêdêŋ ênê gôliŋ ŋajala ŋamataŋa aê Daniel kasam buku dabuŋ ma gajam lêsu jala ŋanamba, taŋ ênaŋa e sêkwê Jerusalem, taŋ kêtu gasaŋ su naŋ, sa êtiam êtôm Apômtau kêsôm lasê gêdêŋ propete Jeremia, jala tau ŋanamba 70. Go aê kakac laŋôcanô ôkwi gêdêŋ Apômtau Anôtô ma kateŋ mec gêdêŋ eŋ ma gajam dabuŋ ma kasô talu ma gaŋgôŋ wao ŋaô. Aê kateŋ mec gêdêŋ Apômtau, ŋoc Anôtô ma kasôm tauc ŋoc to ŋoc lau nêŋ sec lasê.

Aê kasôm gebe “O Apômtau, Anôtô kapôêŋ to ŋaclai secgoc, aôm gojob poac to têmtac gêwiŋ êsêac, taŋ têntac êwiŋ aôm to sêŋgôm aômnêm biŋsu ŋanô êsa naŋ.

“Aêac agôm sec to geo ma keso to ali tauŋ sa ma akac tauŋ su aŋga nêm biŋsu to ŋagôliŋ. Aêac akêŋ taŋeŋ nêm sakiŋwaga propete, taŋ sêjam aôm laŋôm ma sêsôm biŋ gêdêŋ aêacma kiŋ to laumata ma tameŋi to lau gamêŋ samobŋa naŋ atom. O Apômtau, aôm biŋgêdêŋ ŋatau, mago ocsalô tonec aêac amoa tomajeŋgeŋ aêac lau Juda to lau Jerusalemŋa ma lau Israel samob, taŋ gosoc êsêac sêja kêtu nêŋ sec, taŋ sêgôm gêdêŋ aôm jasêmoa ŋagala me sêmoa jaêc aŋga gamêŋ samob naŋŋa aêac samob amoa tomajeŋgeŋ. O Apômtau, aêac to ma kiŋ ma gôliŋwaga to tameŋi amoa tomajeŋgeŋ gebe aêac agôm sec gêdêŋ aômgoc. Apômtau, aêacma Anôtô, kêtu taê walô ma kêsuc biŋ ôkwiŋa ŋatau, mago aêac ali tauŋ sa gêdêŋ eŋ. 10 Aêac taŋeŋ wamu gêdêŋ Apômtau, aêacma Anôtô, nê awa atom ma adaguc ênê biŋsu, taŋ eŋ kêkêŋ gêdêŋ aêac ŋa ênê sakiŋwaga propete naŋ atom. 11 Israel samob sêgêli aômnêm biŋsu ma sêkac tauŋ su ma sedec gebe taŋeŋ wamu aôm awam. Ma biŋ sêpuc boaŋa to têtôc lemeŋŋa, taŋ teto gêc Anôtônê sakiŋwaga Mose nê biŋsu naŋ, sêsêwa siŋ kêpi aêac kêtu aêac agôm sec gêdêŋ aômŋa. 12 Aôm gôgôm nêm biŋ, taŋ kôsôm gêdêŋ aêac to ma gôliŋwaga, taŋ sêjam gôliŋ aêac naŋ, ŋanô kêsa to kôkêŋ gêŋwapac kapôêŋ teŋ gebe aŋga umboŋ ŋalabu samucgeŋ gêŋ teŋ kêsa kêtôm, taŋ kêsa aŋga Jerusalem naŋ atom. 13 Gêŋwapac taŋ teto gêc Mosenê biŋsu naŋ, samob kêtap aêac sa, mago aêac ajam malô Apômtau, aêacma Anôtô, atom gebe akac tauŋ su aŋga gêŋ sec to akêŋ taŋeŋ êndêŋ aômnêm biŋŋanô atom. 14 Amboac tonaŋ Apômtau kômasaŋ gêŋ wapac tau ma kôkêŋ kêpi aêac gebe Apômtau, aêacma Anôtô, eŋ ŋacgêdêŋ kêtu nê kôm samobŋa, taŋ eŋ gêgôm naŋ, mago aêac taŋeŋ wamu eŋ awa atom.

15 “O Apômtau, aêacma Anôtô, aôm kôkôc aômnêm lau su aŋga Aiguptu ŋa lêmam ŋajaŋa ma gôgôm aômnêm ŋaê ŋawae kêsa e gêdêŋ ocsalô tonec aêac agôm sec to gêŋ alôb-alôb gêdêŋ aôm. 16 O Apômtau, aêac ateŋ aôm êtu nêm koleŋgêdêŋ samobŋa gebe ôkêŋ nêm têmtac ŋandaŋ to ŋalêlôm sec ênam jaê nêm malac Jerusalem to nêm lôm dabuŋ. Gebe aêacma sec to aêacma tameŋi nêŋ geoŋa gêgôm lau, taŋ sêgi aêac auc naŋ, sêsu Jerusalem to nêm lau susu. 17 O aêacma Anôtô, amboac tonaŋ ôkêŋ taŋam nêm sakiŋwaga aê ŋoc mec to ŋoc taŋi. O Apômtau, ôkêŋ laŋômanô êpô nêm lôm dabuŋ, taŋ kêtu gasaŋ naŋ, êtu aôm taômŋa. 18 O ŋoc Anôtô, ôkêŋ taŋam to ôŋô aêac, ôsa laŋômanô sa ma ôlic aêac to malac, taŋ sêsam aômnêm ŋaê kêpi naŋ, gebe atu gêŋ gêbac. Aêac akêŋ ma mec gêdêŋ aôm kêtu ma biŋgêdêŋŋa atom, akêŋ kêtu nêm taêm labu kapôêŋŋageŋ. 19 O Anôtô, ôŋô aêac. O Apômtau, ôsuc ma biŋ ôkwi. O Apômtau, ôkêŋ taŋam to ônam aêac sa. O ŋoc Anôtô, ônam gamêŋ tôŋ atom êtu aôm nêm ŋaêŋa gebe êsêac sêsam aômnêm ŋaê kêpi nêm malac to nêm lau.”

Gabriel gêwa biŋ tau ŋam sa

20 Aê kasôm biŋ to kateŋ mec amboac tonaŋ ma gaoc tauc ŋoc to ŋoc lau Israel nêŋ sec lasê ma kataŋ gêdêŋ Apômtau, ŋoc Anôtô kêtu ênê lôm dabuŋŋa. 21 Aê kateŋ mec tau gamoa, tec Gabriel, taŋ galic eŋ gêdêŋ taŋ galic ŋakatu ŋamataŋa naŋ, gêlôb ŋagaôgeŋ gêdêŋ aê gêmêŋ gêdêŋ noc da kêtulaŋa. 22 Eŋ gêmêŋ ma kêsôm gêdêŋ aê gebe “O Daniel, aê mêŋgaô lasê gebe jawa aôm sa e aôm ôjala. 23 Gêdêŋ taŋ gôjac m nêm mec naŋ, biŋ teŋ kêsa ma aê gamêŋ gabe jasôm biŋ tau lasê êndêŋ aôm gebe Anôtô têtac gêwiŋ aôm ŋanôgeŋ. Amboac tonaŋ ôsala biŋ tau ma nêm kauc êsa êtu gêŋ, taŋ gôlic naŋ.

24 “Anôtô kêkêŋ noc jala 70 êtu dim 7 êtu aômnêm lau to aômnêm malac dabuŋŋa, go biŋ alôb-alôb êmbacnê to sec ênac pep ma Anôtô êsuc nê tôp, taŋ gêc amac naŋ, ôkwi to êkêŋ biŋgêdêŋ ênêc endeŋ tôŋgeŋŋa êndêŋ amac. Go eŋ êŋgôm ŋakatu, taŋ geoc lasê naŋ, to propetenêŋ biŋ ŋanô êsa ma êniŋ oso gamêŋ dabuŋanô tau. 25 Amboac tonaŋ ôjala ma nêm kauc êsa gebe ŋasawa, taŋ noc ŋajatu êsa gebe sêkwê Jerusalem sa êtiamŋa ma noc kasêga, taŋ sêniŋ oso naŋ, mêŋêô lasêŋa êtôm jala 7 êtu dim 7. Sêkwê Jerusalem sa ma sênam intêna to busawa ma êkô tobiŋ wapacgeŋ êtôm jala 62 êtu dim 7. 26 Jala 62 êtu dim 7 tonaŋ êmbacnê, go senseŋ ŋac, taŋ seŋ oso eŋ naŋ, su toŋagôliŋmêgeŋ. Ma gôliŋwaga to ŋaclai teŋ to nê lau oc sêmêŋ ma senseŋ malac to lôm dabuŋ su ênaŋa. Go têm ŋamuŋa mêŋêô lasê amboac bu ŋatênageŋ ma enseŋ siŋ to gêŋwapac ŋanô, taŋ Anôtô kêjatu naŋ. Ma gôliŋwaga tonaŋ oc êmoatiŋ poac ŋajaŋa teŋ êwiŋ lau taêsam êtôm jala 7. Ma embe ŋasawa tonaŋ ŋamakeŋ êmbacnê oc ênac jao daja to da ŋagêdô. Ma gêŋ alôb-alôb, taŋ enseŋ gêŋ ŋawaô naŋ, êkô gamêŋ dabuŋ ma êmoa tonaŋ e ŋac, taŋ ketoc gêŋ tau kêkô tônê naŋ, êndac ŋagêjô, taŋ Anôtô kêmasaŋ kwanaŋgeŋ kêtu eŋŋa su naŋ.”

27 10:1 — 12:13 Daniel katu kaiŋ teŋ kêsa ma gêlic ŋakatu, taŋ kêbênôc ŋakatu gêmuŋŋa ŋamiŋ naŋ, ma gêjac têku miŋ ŋagêdô.

Copyright information for `JAE