Deuteronomy 26

Sêniŋ mo lasê to sêkêŋ kôm ŋanô teŋ ŋanô-teŋ ŋanô ŋagôliŋ

“Êndêŋ taŋ ô lasê gamêŋ tau, taŋ Apômtau, aômnêm Anôtô, gebe êkêŋ êndêŋ aôm êtu nêm nomlênsêm naŋ, ma êndêŋ taŋ gamêŋ tau êtu aômnêm gamêŋ su e ôŋgôŋ ôtu wakac naŋ, ôkôc kôm ŋanô samob ŋamêc ŋagêdô, taŋ ojoŋ sa aŋga nêm gamêŋ, taŋ Apômtau, aômnêm Anôtô, êkêŋ êndêŋ aôm naŋ, ma ôkêŋ êsêp gadob teŋ. Go ôna gamêŋ, taŋ Apômtau, aômnêm Anôtô, oc êjaliŋ sa, gebe êtu ênê ŋaê ŋamala naŋ, ma ôndêŋ dabuŋwaga, taŋ sakiŋ bêc tonaŋŋa ênac eŋ ŋawae naŋ, ôna ma ôsôm êndêŋ eŋ gebe ‘Aê mêŋgaô lasê gamêŋ, taŋ Apômtau kêtôc lêma gêdêŋ aêac tameŋi gebe êkêŋ êndêŋ aêac naŋ.’ Go dabuŋwaga êkôc gadob su aŋga lêmam ma etoc ênêc Apômtau, aômnêm Anôtô, nê altar ŋanêmŋa.

“Go ôc awam sa ma ôsôm ôkô Apômtau, aômnêm Anôtô, laŋônêmŋa gebe ‘Aê tamoc eŋ ŋac Aramŋa, taŋ kêsêlêŋ gêjac laoc gamêŋgeŋ. Eŋ kêsêp Aiguptu jagêmoa gamêŋ tau amboac ŋac jaba teŋ, nê lau luagêcgeŋ. Ma aŋga tônê eŋ kêtu lau-m kapôêŋ to ŋajaŋa ma nê lau têtu taêsam. Mago lau Aiguptu sêgôm aêac kwalec to sêkôniŋ aêac tôŋ ma sejoŋ aêac ŋa koleŋ ŋawapac ŋanô. Go tamôêc gêdêŋ Apômtau, aêac tameŋinêŋ Anôtô, ma Apômtau kêkêŋ taŋa aêac aweŋ. Eŋ gêlic aêac tamoa jageo to tajam koleŋ ŋawapac ma sêkôniŋ aêac. Go Apômtau kêmêtôc lêma ŋajaŋa to gêwê aêac dawi Aiguptu siŋ. Eŋ gêgôm gêŋ kaiŋ teŋ kêtakê lau ma gêgôm gêŋtalô to gêŋsêga. Ma eŋ gêwê aêac taô lasê gamêŋ tonec ma kêkêŋ gamêŋ tau, taŋ su to lêp keseleŋ naŋ, gêdêŋ aêac. 10 Ma galoc, o Apômtau, aê kakôc nom, taŋ aôm kôkêŋ gêdêŋ aê naŋ, ŋakôm ŋanô ŋamêc gamêŋ.’ Go otoc gêŋ tau ênêc Apômtau, aômnêm Anôtô, laŋônêmŋa ma oteŋ mec êndêŋ Apômtau, aômnêm Anôtô. 11 Ma aôm to Lewinê gôlôac ma lau jaba, taŋ sêmoa sêwiŋ aôm naŋ, atu samuc gêŋ ŋajam samob, taŋ Apômtau, amacnêm Anôtô, kêkêŋ gêdêŋ amac to nêm gôlôac samob naŋ.

12 “Êtôm jala têlêac-têlêacgeŋ aôm ôkôc gêŋ 10 - 10 ŋatageŋ-tageŋ sa ma ôkêŋ êtu da. Embe ôkêŋ da tonaŋ su êndêŋ Lewinê gôlôac to lau jaba ma mosêbu to awêtuc, taŋ sêŋgôŋ nêm malac naŋ, sêniŋ e êôc êsêac tôŋ, 13 go ôsôm ôkô Apômtau, aômnêm Anôtô laŋônêmŋa gebe ‘Aê kakôc gêŋ dabuŋ samob su aŋga ŋoc andu ma kakêŋ gêdêŋ Lewinê gôlôac to lau jaba ma mosêbu to awêtuc kêtôm nêm biŋsu samob, taŋ kôjatu aê naŋ. Aê kagêli nêm biŋsu teŋ atom to kaliŋ ŋateŋ siŋ atom amboac tonaŋgeŋ. 14 Gêdêŋ taŋ gaôc wapac kêtu ŋacmatêŋa naŋ, gaeŋ gêŋ tau ŋateŋ atom. Gêdêŋ taŋ gamoa selec atom naŋ, kakôc gêŋ teŋ su atom. Ma kakêŋ gêŋ tau ŋateŋ kêtu da gêdêŋ lau ŋanô katuŋ atom amboac tonaŋgeŋ. Aê taŋoc wamu Apômtau, aêŋoc Anôtô, awa ma gagôm gêŋ samob, kêtôm taŋ aôm kôjatu aê naŋgeŋ. 15 Ôtuc kêniŋ aŋga nêm andu dabuŋ undambêŋa ma matam ê aêac ma ônam mec nêm lau Israel to nom, taŋ kôkêŋ gêdêŋ aêac naŋ, kêtôm kôtôc lêmam gêdêŋ aêac tamemai. Kôkêŋ gamêŋ, taŋ su to lêp keseleŋ naŋ.’

Apômtaunê lau dabuŋ

16 “Ocsalô tonec Apômtau, aômnêm Anôtô, kêjatu aôm gebe ôŋgôm biŋsu to ŋagôliŋ tonec ŋanô êsa, tec ojop taôm gebe ôŋgôm biŋ tau ŋanô êsa tonêm ŋalêlôm samuc ma nêm katôm samuc. 17 Ocsalô tonec aôm kôsôm kêtu tôŋ, gebe Apômtau kêtu aômnêm Anôtô ma aôm gobe ôsa ênê lêŋ to ôŋgôm ênê biŋsu to ŋagôliŋ ma jatu ŋanô êsa ma taŋam wamu eŋ awa. 18 Ma ocsalô tonec Apômtau kêsôm kêtu tôŋ, gebe amac atu lau, ênê laugac kêtôm gêjac mata gêdêŋ amac, ma aŋgôm ênê biŋsu samob ŋanô êsa. Eŋ oc etoc amac sa alêlêc lau tomôkê-tomôkê samob, taŋ eŋ kêkêŋ naŋ, su e sêlambiŋ amac to sêsôm amac waem lasê ma tetoc amac sa. Ma amac atu Apômtau, amacnêm Anôtô, nê lau dabuŋ êtôm eŋ kêsôm su.”

19  27:1 —29:29 Biŋ kêpuc boaŋa ŋagêdô kêsêp ŋasêbu tonec. Biŋsu kêpuc boa lau, taŋ taŋeŋpêc gêdêŋ Apômtaunê biŋ naŋ. Lau amboac tonaŋ têtap nêŋ ŋagêjô sa. Mago lau taŋeŋ wamuŋa têtap moasiŋ sa aŋga Apômtaunê. Môkêlatu 29 gêjac miŋ poac, taŋ Anôtô kêmoatiŋ gêdêŋ nê lau aŋga Moabnêŋ gamêŋ kêtiam naŋ.

Copyright information for `JAE