Ecclesiastes 12

Puc êndêŋ lau wakuc

Amboac tonaŋ taêm ênam Anôtô, taŋ kêkêŋ aôm naŋ, êndêŋ nêm bec ŋapalêgeŋŋa gebe bêc sec to jala mêŋêô lasê, taŋ aôm oc ôsôm gebe “Bêc tonaŋ kêmoasiŋ aê atom.” Êndêŋ tonaŋ oc to ŋawê ma ajôŋ to utitalata ênam kanuc ma ŋamajaŋ êkô êndaŋguc kom ênac. Êndêŋ ŋasawa tonaŋ gejobwaga anduŋa oc têtênêp (lemeŋ) to lau ŋajaŋa têtu goloŋ (eŋkaiŋ). Lauo taŋ sêlêsa polom naŋ (luŋluŋ), sêwi kôm siŋ gebe têtu luagêcgeŋ. Ma êsêac, taŋ têtu kêniŋ sêsa katam sauŋ naŋ (mateŋanô) têtu kanuc. Katam taŋ kêsa intêna naŋ (taŋeŋsuŋ), oc ŋajaŋa êsa gebe ôŋô malacluŋ ŋakicsêa atom. Sêlêsa polom ŋakicsêa ma musik êtaŋŋa oc ôŋô sauŋanôgeŋ. Tageŋ moc êtaŋ êndêŋ bêbêc oc êŋu aôm sa. Ŋamalac oc têtêc gebe sêsêlêŋ gamêŋ ŋabau ma sêsa nêŋ intêna tonêŋ ŋalêlôm ŋatutucgeŋ (ôliŋ walô gêjaŋa). Wa ŋaola ênac lêtêŋ (môdê êsa) ma wagô êka gwec-gwecgeŋ (têntac walô ŋawapac êsa) ma ŋamalac êŋgôm mocsac gêŋ teŋ êtiam atom.

Gebe eŋ oc êna nê andu teŋgeŋŋa (sêô) ma lau-têtaŋ- taŋiboawaga sêsêlêŋ sêmoa intêna.
Kapoacwalô silber oc êŋgic ma laclu gold oc embeŋ ma popoc. Bulakôp oc popoc ma waba tatê buŋa oc ênaŋa. Kekop taŋ ŋam kêsêp nom naŋ (ôliŋ), oc êmu êna nom êtiam ma awajaô êmu êndêŋ Anôtô, taŋ kêkêŋ naŋ, êna êtiam. Ŋacmêtê Tau kêsôm gebe “Gêŋ samob gêŋ ŋaôma, gêŋ ŋaôma samuc geŋ.”

Copyright information for `JAE