Exodus 11

Ŋamêc samob sêmac êndu ŋapuc

Go Apômtau kêsôm gêdêŋ Mose gebe “Aê gabe jakêŋ gêŋwapac tageŋgeŋ êwiŋ êkôniŋ Parao to Aiguptu. Tonec êmbacnê, go êwi amac siŋ. Embe êwi amac siŋ, go êjanda amac aêc gacgeŋ ana. Galoc ôsôm êndêŋ nêm lau gebe ŋacwaga samob teteŋ nêŋ lau sacgêdô gêdêŋ tauŋŋa to lauo samob teteŋ nêŋ lauo sacgêdô gêdêŋ tauŋŋa gebe sêkêŋ gêlôŋ silber to gold êndêŋ êsêac.” Ma Apômtau gêgôm lau Aiguptu sêlic lau Israel ŋajam. Ma Mose tau amboac tonaŋ. Paraonê sakiŋwaga to lau tau sêlic eŋ amboac ŋac towae kapôêŋ aŋga gamêŋ Aiguptuŋa.

Ma Mose kêsôm gebe “Apômtaunê biŋ tau tonec gebe Êndêŋ êmbêc êna lugeŋ, go aê jasêlêŋ janac laoc gamêŋ Aiguptuŋa. Ma gamêŋ Aiguptuŋa ŋagêŋ ŋamêc samob sêmac êndu. Janac m aŋga Paraonê ŋacsêga, taŋ oc êŋgôŋ Paraonê lêpôŋ kiŋŋa naŋ, e êndêŋ sakiŋwagao, taŋ kêlêsa polom popoc naŋ, nê ŋacsêga. Ma bôc ŋamêc samob sêmac êndu amboac tonaŋgeŋ. Lau oc têtaŋ taŋiboa kapôêŋanô amboac têtaŋ gêmuŋŋa atom ma oc têtaŋ êtiam amboac tonec atomanô. Mago lau Israel amboac teŋ. Kêam teŋ oc êkêŋ Iêsu ŋamalac to bôc atom, gebe ajala Apômtau gêwa lau Aiguptu to lau Israel kêkôc. Go nêm sakiŋwaga samob tonaŋ sêsêp sêndêŋ aê sêmêŋ ma sewec êndêŋ aê ma sêsôm gebe ‘Ôkôc taôm sa ma nêm lau samob sêndaŋguc aôm.’ Su, go jawi gamêŋ siŋ.” Ma Mose kêsa aŋga Paraonê totêtac ŋandaŋ kapôêŋgeŋ gêja. Go Apômtau kêsôm gêdêŋ Mose gebe “Parao oc êkêŋ taŋa aômnêm biŋ atom e aêŋoc gêŋtalô êtu taêsam aŋga gamêŋ Aiguptu acgom.”

10 Mose agêc Aron sêgôm gêŋtalô samob tonaŋ ŋai sêkô Parao laŋônêmŋa. Ma Apômtau gêgôm Paraonê ŋalêlôm ŋadani kêsa ma gêwi lau Israel siŋ aŋga nê gamêŋ atom.

Copyright information for `JAE