Exodus 14

Lau Israel selom Gwêckoc

Go Apômtau kêsôm gêdêŋ Mose gebe “Ôsôm êndêŋ lau Israel gebe sêkac tauŋ ôkwi sêmu sêna Pihahirot nasê bec aŋga gamêŋ, taŋ gêc Migdol to gwêc ŋasawa êkanôŋ Balsepo naŋ. Aê bec êkanôŋ malac tonaŋ aŋgôŋ gwêctaligeŋ. Parao oc taê ênam gebe lau Israel sêlêsa sêmoa ma gamêŋ sawa oc kêlênsôŋ êsêac. Go aê jaŋgôm Paraonê ŋalêlôm ŋadani êsa e êjanda êsêac. Go jaku Parao to nê siŋwaga samob tulu e ŋoc ŋawasi êsa. Ma lau Aiguptu oc sêjala gebe aê Apômtau.” Ma êsêac sêgôm amboac tonaŋ.

Gêdêŋ taŋ sêjac miŋ gêdêŋ kiŋ Aiguptuŋa gebe lau Israel sêc sêja naŋ, Parao to nê siŋwaga nêŋ ŋalêlôm gêjam tau ôkwi ma taêŋ gêjam biŋ teŋ kêpi Israel. Ma êsêac sêsôm gebe “Aêac dagôm asageŋ tonec, tec dawi Israel siŋ e sêjam sakiŋ aêac kêtiam atom.” Amboac tonaŋ Parao kêjatu gebe sêmansaŋ kareta siŋŋa ma kejoŋ nê siŋwaga sa sêwiŋ eŋ. Eŋ kêkôc kareta siŋŋa 600, taŋ tau kêjaliŋ sa naŋ, to kareta ŋagêdô samob, taŋ kêtap sa aŋga Aiguptu naŋ, ma kêkêŋ siŋwaganêŋ laumata sêpi kareta tonaŋ kêtômgeŋ. Ma Apômtau gêgôm kiŋ Aiguptuŋa Parao nê ŋalêlôm ŋadani kêsa e kêjanda lau Israel, taŋ sêsa aŋga Aiguptu sêja toôliŋ kêpigeŋ. Lau Aiguptu sêjanda êsêac ma Aiguptunêŋ hos to kareta ma lau, taŋ sêŋgôŋ hos ŋaô naŋ, to siŋwaga samob jasêôc lêlêc lau Israel, taŋ sê nêŋ bec sêŋgôŋ gwêctaligeŋ aŋga Pihahirot kêkanôŋ Balsepo.

10 Gêdêŋ taŋ Parao kêdabiŋ êsêac naŋ, lau Israel sêôc mateŋanô sa ma sêlic lau Aiguptu sêsêlêŋ sepeŋ êsêacgeŋ, ma êsêac têtêc tauŋ ŋanô. Ma lau Israel têtaŋ gêdêŋ Apômtau. 11 Ma êsêac sêsôm gêdêŋ Mose gebe “Amboac ondoc, sêô masi aŋga gamêŋ Aiguptuŋa, tec gôwê aêac asa amêŋ gebe amac êndu aŋga gamêŋ sawa nec me. Aôm gôgôm aêac amboac ondoc, tec gôwê aêac awi Aiguptu siŋ nec. 12 Aêac amoa Aiguptugeŋ, tec asôm biŋ tonec gêdêŋ aôm gebe ‘Ondec aêac, aêac abe anam sakiŋ lau Aiguptu.’ Anam sakiŋ Aiguptu tec ŋajam kêlêlêc amac êndu aŋga gamêŋ sawaŋa su. Aêac asôm biŋ tonaŋ atom me.” 13 Ma Mose kêsôm gêdêŋ lau gebe “Atêc taôm atom, akô ŋajaŋa, go alic Apômtau ênam amac kêsi ŋakôm, taŋ gebe ênam êndêŋ ocsalô tonec êtu amacŋa naŋ. Lau Aiguptu, taŋ ocsalô tonec alic êsêac naŋ, oc alic êsêac êtiam atom. 14 Apômtau oc ênac siŋ êjô amac su ma amac taôm amoa gamêŋ êmacgeŋ.”

15 Go Apômtau kêsôm gêdêŋ Mose gebe “Aôm gômôêc aê kêtu asageŋŋa. Ôsôm êndêŋ lau Israel gebe sêndi sêsêlêŋ. 16 Ôc nêm tôc sa to ômêtôc lêmam êsa gwêc ma ôwa êkôc gebe lau Israel sêsêp ma sêsêlêŋ gamêŋ keleŋgeŋ. 17 Ma aê jaŋgôm lau Aiguptu nêŋ ŋalêlôm ŋadani êsa e sêsêp sêndaŋguc êsêac, go jaŋgôm ŋoc ŋawasi êsa jaku Parao to nê siŋwaga samob ma nê kareta to lau, taŋ sêŋgôŋ hos ŋaô naŋ tulu. 18 Aê embe jaŋgôm ŋoc ŋawasi êsa jaku Parao to nê kareta ma nê lau, taŋ sêŋgôŋ hos ŋaô naŋ, tulu su, go lau Aiguptu sêjala gebe aê Apômtau.”

19 Go Anôtônê aŋela, taŋ kêsêlêŋ gêmuŋ lau Israel nêŋ toŋ naŋ, gêwi mala siŋ jakêdaguc êsêac. Ma tao majaŋ gêwi nêmŋa siŋ jakêkô êsêac dêmôêŋmuŋa, 20 ma geŋ lau Aiguptu nêŋ toŋ to Israelnêŋ toŋ gêŋgic. Ma tao majaŋ tau kêkêŋ gêsuŋbôm ma toŋ luagêc têtap tauŋ sa atom gêdêŋ gêbêcauc samuc tonaŋ.

21 Go Mose kêmêtôc lêma kêsa gwêc ma Apômtau kêkêŋ mu gêbuc aŋga gamêŋ oc kêpiŋa gêdêŋ gêbêc samuc tonaŋ ma gêgôm gwêc ŋakeleŋ kêsa. Eŋ gêwa gwêc kêkôc, 22 ma lau Israel sêsêp gwêc ŋalêlôm jasêsêlêŋ sêmoa gamêŋ ŋakeleŋ. Ma gwêc tau gêlêc sa kêtôm tuŋbôm kêkô makeŋ-makeŋ. 23 Lau Aiguptu sêjanda êsêac ma Paraonê hos samob to nê kareta siŋŋa ma nê lau, taŋ sêŋgôŋ hos ŋaô naŋ, têdaguc êsêac sêsêp gwêc ŋalêlôm sêja. 24 Gêu bôŋ kêsa ma Apômtau, taŋ gêmoa tao majaŋ to tao ja ŋalêlôm naŋ, kêtuc kêniŋ kêsêp lau Aiguptu nêŋ toŋ ma kêlênsôŋ êsêac. 25 Eŋ gêbôc nêŋ kareta auc e kareta kêsêlêŋ ŋawapac sec. Tec lau Aiguptu sêsôm gebe “Taêc lau Israel sumaŋ, gebe Apômtau tau gêjac siŋ gêdêŋ aêac gêjô êsêac.”

26 Go Apômtau kêsôm gêdêŋ Mose gebe “Ômêtôc lêmam êsa gwêc gebe gwêc êjô tau mala ma ênsalê lau Aiguptu to nêŋ kareta siŋŋa ma nêŋ lau sêŋgôŋ hos ŋaôŋa auc.” 27 Amboac tonaŋ Mose kêmêtôc lêma kêsa gwêc, tec gêdêŋ geleŋ mata gwêc gêjô tau mala kêtiam. Lau Aiguptu, taŋ sêc su naŋ, sêlêti sêsêp gwêc ŋalêlôm ma Apômtau kêkêŋ gwêc kêsalê lau Aiguptu auc. 28 Gwêc gêjô tau mala ma kêmakop Paraonê kareta to lau sêŋgôŋ hos ŋaôŋa ma nê toŋ samob, taŋ têdaguc lau Israel sêsêp gwêc sêja naŋ. Êsêacnêŋ teŋ gêmoa kêtiam atom. 29 Mago lau Israel sêsêp gwêc jasêsêlêŋ sêmoa gamêŋ ŋakeleŋ. Gwêc tau gêlêc sa kêtôm tuŋbôm kêkô makeŋ- makeŋ.

30 Gêdêŋ bêc tonaŋ Apômtau gêjam lau Israel kêsi aŋga lau Aiguptu lemeŋ ŋalêŋ tonaŋ. Ma lau Israel sêlic lau Aiguptu nêŋ ŋacmatê sêc ambêô. 31 Ma lau Israel sêlic kôm kapôêŋ, taŋ Apômtau gêjam gêdêŋ taŋ geseŋ lau Aiguptu su naŋ, e têtêc Apômtau. Ma êsêac sêkêŋ gêwiŋ Apômtau to nê sakiŋwaga Mose.

Copyright information for `JAE