Exodus 16

Anôtô kêkêŋ mana

Êsêac dêdi aŋga Elim ma Israelnêŋ gôlôac samob sêô lasê gamêŋ sawa Sin, taŋ gêc Elim to Sinai ŋasawa. Êsêac sêwi Aiguptu siŋ ma sêmoa gamêŋ sawa e têtap ajôŋ kêtu luagêcŋa ŋabêc 15 sa, ma sêô lasê gamêŋ tonaŋ. Ma Israelnêŋ gôlôac samob sêli aweŋ sa gêdêŋ Mose agêc Aron aŋga gamêŋ sawa ma sêsôm gêdêŋ êsêagêc gebe “Aêac abe Apômtau lêma enseŋ aêac su aŋga gamêŋ Aiguptuŋamaŋ. Gêdêŋ tonaŋ aêacma ku togwada kêkô to aŋgôŋ moasu ŋaô. Amagêc awê aêac asa gamêŋ sawa amêŋ gebe mo êjô aêac samob êndu.”

Go Apômtau kêsôm gêdêŋ Mose gebe “Ôlic acgom, aê gabe jakêŋ polom êndêŋ amac aŋga undambê amboac kom. Ma lau sêsa sêna to sejoŋ polom êtôm bêcgeŋŋa êndêŋ bêc samob, gebe jansaê êsêac gebe sêmoa ŋoc biŋsu ŋalabu me masi. Êndêŋ bêc êtu 6ŋa embe sêmansaŋ polom, taŋ sejoŋ sa naŋ, oc polom bêc tageŋŋa tau êtu taêsam êtôm bêc luagêcŋa.” Go Mose agêc Aron sêsôm gêdêŋ lau Israel samob gebe “Êndêŋ êtula amac oc ajala gebe Apômtau gêwê amac asa aŋga gamêŋ Aiguptuŋa amêŋ. Ma êndêŋ eleŋ bêbêc amac oc alic Apômtaunê ŋawasi, gebe eŋ gêŋô amac ali awem sa gêdêŋ eŋ tau, gebe aêagêc asa, tec ali awem sa gêdêŋ aêagêc.” Ma Mose kêsôm gebe “Êndêŋ êtula Apômtau êkêŋ gwada êndêŋ amac aniŋ, ma êndêŋ eleŋ bêbêc êkêŋ amac aŋgôŋ moasu ŋaô. Gebe Apômtau tau gêŋô amac ali awem sa gêdêŋ eŋ. Aêagêc asa. Amac ali awem sa gêdêŋ aêagêc atom, ali awem sa gêdêŋ Apômtau.”

Go Mose kêsôm gêdêŋ Aron gebe “Ôsôm êndêŋ lau Israel nêŋ gôlôac samob gebe ‘Amêŋ atu gasuc andêŋ Apômtau amêŋ, gebe eŋ gêŋô amac ali awem sa sugac.’” 10 Ma gêdêŋ taŋ Aron kêsôm biŋ gêdêŋ lau Israel nêŋ gôlôac naŋ, êsêac sêkac tauŋ ôkwi gêdêŋ gamêŋ sawa ma sêlic Apômtaunê ŋawasi geoc tau lasê ŋa tao teŋ. 11 Ma Apômtau kêsôm gêdêŋ Mose gebe 12 “Aê gaŋô lau Israel sêli aweŋ sa. Ôsôm êndêŋ êsêac gebe ‘Êndêŋ êtula amac oc aniŋ gwada ma êndêŋ eleŋ bêbêc aŋgôŋ moasu ŋaô. Gocgo ajala gebe Apômtau, amacnêm Anôtô, aê.’”

13 Gêdêŋ kêtula kêmbico mêŋsêsa e sêjam gamêŋ, taŋ bec kêkô naŋ, auc. Ma gêdêŋ bêbêcgeŋ maniŋ gêjam gamêŋ tau auc. 14 Maniŋ gê su acgom, go gêŋ ŋasec-ŋasec to kuku kêtôm mêcgauc gêc nom. 15 Lau Israel sêlic gêŋ tau ma sêsôm gêdêŋ tauŋ gebe “Tonec asageŋ.” Gebe êsêac sêjam kauc gêŋ tau. Ma Mose kêsôm gêdêŋ êsêac gebe “Polom, taŋ Apômtau kêkêŋ gêdêŋ amac gebe aniŋ naŋ, tonec. 16 Ma Apômtau tau kêjatu biŋ amboac tonec gebe ‘Amac samob êndêŋ-êndêŋgeŋ ajoŋ gêŋ sa êtôm amac aniŋŋa. Ajoŋ lita luagêc sa êtôm ŋacanôgeŋ. Amboac tonaŋ asa lau, taŋ sêŋgôŋ amacnêm bec sêwiŋ amac naŋ sa, go ajoŋ sa êtôm namba tau tonaŋgeŋ.’” 17 Ma lau Israel sêgôm kêtôm tonaŋ. Lau ŋagêdô sejoŋ ec kapôêŋ, ŋagêdô sejoŋ ec ŋagec. 18 Mago gêdêŋ taŋ sêjam dôŋ gêŋ tau ŋa dôŋ laclu naŋ, ŋac taŋ kejoŋ ec kapôêŋ naŋ, kêkôc kêlêlêc laclu teŋ su atom, ma ŋac, taŋ kejoŋ ec ŋagec naŋ, kêpô lêna atom. Êsêac samob sejoŋ sa kêtôm êsêac sêniŋŋa solopgeŋ. 19 Ma Mose kêsôm gêdêŋ êsêac gebe “Ŋac teŋ êkêŋ ŋagêdô ênêc e eleŋŋa atom.” 20 Mago êsêac sêkêŋ taŋeŋ eŋ atom. Lau ŋagêdô tetoc ŋapopoc gêc e geleŋŋa, tec gêŋ tau kêtu sec ma têmoa gêjam auc ma ŋasu kêsa. Ma Mose têtac ŋandaŋ kêsa gêdêŋ êsêac. 21 Kêtôm bêbêcgeŋ samob êsêac sejoŋ gêŋ tau sa e kêtôm êsêac gebe sêniŋŋageŋ. Mago gêdêŋ taŋ oc ŋandaŋ kêsa naŋ, gêŋ tau gêwê.

22 Gêdêŋ ŋabêc kêtu 6ŋa êsêac sejoŋ polom kêtôm bêc luagêcŋa. Êsêac sejoŋ laclu luagêc-luagêc kêtôm ŋacanôgeŋ. Ma gôlôacnêŋ laumata dêdêŋ Mose jasêjac ŋamiŋ gêdêŋ eŋ. 23 Ma eŋ kêsôm gêdêŋ êsêac gebe “Biŋ tonec Apômtau kêjatu gebe ‘Eleŋŋa bêc talêwaŋ tauŋŋa teŋ. Bêc tau kêtu Apômtaunê sabat dabuŋ. Gêŋ taŋ amac abe apac naŋ, apacmaŋ. Ma gêŋ, taŋ amac abe ano naŋ, anomaŋ. Ma gêŋ ŋagêdô, taŋ gacgeŋ gêc naŋ, ênêc e eleŋŋa acgom.’” 24 Amboac tonaŋ êsêac dedeŋ gêŋ ŋagêdô gêc e geleŋŋa, kêtôm Mose kêjatu êsêac. Ma gêŋ tau kêtu sec atom ma têmoa kêsêp atom. 25 Mose kêsôm gebe “Ocsalô aniŋ gêŋ tau gebe ocsalô kêtu Apômtaunê sabat. Ocsalô amac oc atap gêŋ teŋ sa aŋga kôm atom. 26 Ajoŋ gêŋ tau sa êtôm bêc 6, mago êndêŋ bêc êtu 7ŋa, taŋ êtu sabat naŋ, oc atap gêŋ teŋ sa atom.” 27 Gêdêŋ bêc kêtu 7ŋa lau ŋagêdô sêsa sêja sebe sejoŋ gêŋ tau, mago têtap gêŋ teŋ sa atom. 28 Ma Apômtau kêsôm gêdêŋ Mose gebe “Amac adec ŋoc jatu to biŋsu ma asô ŋalabu atom e êndêŋ ondocgeŋ. 29 Ôlic acgom, aê Apômtau kakêŋ sabat gêdêŋ amac. Kêtu tonaŋŋa kakêŋ polom kêtôm bêc luagêc gêdêŋ bêc kêtu 6ŋa. Êndêŋ bêc êtu 7ŋa amacnêm lau samob sêŋgôŋ nêŋ maleŋgeŋ. Ŋac teŋ êwi nê mala siŋ atom.” 30 Amboac tonaŋ lau sêlêwaŋ tauŋ gêdêŋ bêc kêtu 7ŋa.

31 Ma lau Israel sêsam gêŋ tau gebe Mana. Gêŋ tau sêpsêp kêtôm mêcgauc ma ŋasaê kêtôm polom tolêp. 32 Ma Mose kêsôm gebe “Apômtau kêjatu biŋ tonec gebe ‘Akôc gêŋ tau laclu teŋ ma amansaŋ ênêc gebe nêm gôlôac ŋamuŋa sêlic polom, taŋ kakêŋ gêdêŋ amac aeŋ aŋga gamêŋ sawa gêdêŋ taŋ gawê amac asa aŋga gamêŋ Aiguptuŋa amêŋ naŋ.’” 33 Ma Mose kêsôm gêdêŋ Aron gebe “Ôkôc ku teŋ ma ôkêŋ mana laclu teŋ êsêp ma otoc ku tau êkô Apômtau laŋônêmŋa gebe ênêc e nêm gôlôac ŋamuŋa sêlic amboac tonaŋgeŋ.” 34 Amboac tonaŋ Aron ketoc ku tau kêkô katapa poacŋa ŋanêmŋa gebe ênêc kêtôm taŋ Apômtau kêjatu gêdêŋ Mose naŋ. 35 Ma lau Israel seŋ mana tau kêtôm jala 40 e sêô lasê gamêŋ, taŋ ŋamalac sêŋgôŋ naŋ. Êsêac seŋ mana e sêô lasê gamêŋ Kanaan ŋamadiŋ. 36 (Dôŋ sêjam dôŋ gêŋ ŋakeleŋŋa gêdêŋ têm tonaŋ kêkôc kêtôm 20 lita.)

Copyright information for `JAE