Exodus 24

Sêmoatiŋ poac kêtu tôŋ

Ma Apômtau kêsôm gêdêŋ Mose gebe “Amagêc Aron ma Nadab agêc Abihu ma Israelnêŋ laumata 70 api andêŋ aê amêŋ ma ateŋ mec akô jaêcgeŋ. Mose taugeŋ êtu gasuc aê. Lau ŋagêdô têtu gasuc atom ma lau sêpi sêwiŋ eŋ sêmêŋ atom.”

Go Mose gêdêŋ lau gêja ma kêkêŋ Apômtaunê biŋsu to ŋagôliŋ samob ŋawae gêdêŋ êsêac. Ma lau samob sêlôc sa aweŋ tageŋ gebe “Biŋ samob, taŋ Apômtau kêsôm naŋ, aêac abe aŋgôm ŋanô êsa.” Ma Mose keto Apômtaunê biŋ samob sa. Ma gêdêŋ bêbêc kanucgeŋ eŋ gêdi sa ma gêboa altar teŋ sa kêkô lôc ŋalabu ma gêjac alê poc 12 sa kêtôm lau Israel nêŋ gôlôacmôkê 12. Go eŋ kêjatu lau Israel nêŋ lau wakuc ŋagêdô gebe sêkêŋ daja ma sêmbuc bulimakao kapoac wakuc ma sêkêŋ têtu dawama êndêŋ Apômtau. Ŋadec ŋamakeŋ Mose kêkêŋ kêsêp laclu teŋ. Ŋadec ŋamakeŋ eŋ kêpalip kêpi altar. Go kêkôc poac ŋabuku ma kêsam lasê gêdêŋ lau sêŋô. Ma êsêac sêsôm gebe”Biŋ samob, taŋ Apômtau kêjatu naŋ, aêac abe aŋgôm ŋanô êsa ma taŋeŋ wamu biŋ tau.” Go Mose kêkôc dec, taŋ kêpoac laclu naŋ, jakêpalip kêpi lau ma kêsôm gebe “Alic acgom, poac, taŋ Apômtau kêmoatiŋ gêdêŋ amac kêdaguc biŋ samob tonaŋ ŋai naŋ, ŋadec tau tonec.”

Go Mose agêc Aron ma Nadab agêc Abihu to Israelnêŋ laumata 70 sêpi lôc sêja, 10 ma êsêac sêlic Israelnêŋ Anôtô. Ma gamêŋ, taŋ eŋ kêkô naŋ, amboac masac pocawa ma ŋakêŋkêŋgosu kêtôm undambê tau. 11 Ma Apômtau lêma gêjac lau Israel nêŋ kasêga tonaŋ atom. Êsêac sêlic Anôtô ma seŋ to sênôm gêŋ.

Mose gêmoa lôc Sinai

12 Ma Apômtau kêsôm gêdêŋ Mose gebe “Ôpi lôc ôndêŋ aê mêŋôôŋ ômoa tonec acgom. Aê gabe jakêŋ poc tapa tau êndêŋ aôm. Aê kato biŋsu to jatu kêsêp gebe lau sêjala.” 13 Amboac tonaŋ Mose gêdi tonê sakiŋwaga Josua ma sêpi Anôtônê lôc sêja. 14 Ma Mose kêsôm gêdêŋ laumata gebe “Amoa tonec e aêagêc amu amêŋ êtiam. Aron agêc Hur sêmoa sêwiŋ amac. Ŋac teŋ nê biŋ teŋ embe êlênsôŋ, go êndêŋ êsêagêc êna.”

15 Go Mose kêpi lôc gêja ma tao kêkôm lôc tau auc. 16 Apômtaunê ŋawasi kêsêp lôc gêmêŋ, ma tao kêkôm lôc tau auc kêtôm bêc 6. Gêdêŋ bêc kêtu 7ŋa Apômtau awa gêjac Mose kêsa aŋga tao ŋalêlôm. 17 Gêdêŋ tonaŋ lau Israel sêlic Apômtaunê ŋawasi kêtôm ja ŋawaô gêlaŋ-gêlaŋ aŋga lôc ŋatêpôê. Ma Mose kêsô tao ŋalêlôm jakêpi lôc. Ma eŋ gêmoa lôc kêtôm geleŋŋa 40 ma gêbêcauc 40.

18 25:1 — 31:17 Ŋasêbu tonec gêwa Lômbec ŋadôŋ to ŋakôm ma ŋagêŋlêlôm samob sa. Gêwa sakiŋ dabuŋ ŋawaba ma dabuŋwaganêŋ ŋakwê to gêlôŋ sa. Ŋagôliŋ sênam mec dabuŋwagaŋa kêsêp ŋasawa tonaŋ amboac tonaŋgeŋ. Biŋ tonaŋ kêjatu da to takis tokaiŋ-tokaiŋ. Gêŋ samob tonaŋ ŋai gebe ênam lau Israel sa gebe sêkwê nêŋ Lômbec to sênac Lôm tau ŋagêŋlêlôm sa ma sêlic nêŋ om êtôm ŋagôliŋgeŋ.

Copyright information for `JAE