Exodus 32

Gêdêŋ taŋ lau sêlic gebe Mose kêsêp aŋga lôc gêmêŋ atom e ŋêŋgeŋ naŋ, êsêac sêkac tauŋ sa sêgi Aron auc ma sêsôm gêdêŋ eŋ gebe “Ajôc, ômansaŋ ma anôtô teŋ, gebe êsêlêŋ êmuŋ aêac. Aêac ajam kauc asageŋ gêgôm Mose, ŋac tau, taŋ gêwê aêac aŋga Aiguptu amêŋ naŋ.” Ma Aron kêsôm gêdêŋ êsêac gebe “Akôc nêm lauo ma latômio to ŋac nêŋ salasa gold su ma ajoŋ andêŋ aê amêŋ.” Amboac tonaŋ lau samob sêkôc salasa gold su ma sejoŋ dêdêŋ Aron sêja. Ma eŋ kêkôc gold tau su aŋga êsêac lemeŋ ma kêpac kêsêp ku e gêwê ma gêgôm bulimakao ŋalatu ŋakatu teŋ. Go êsêac sêsôm gebe “O Israel, nêm anôtô, taŋ gêwê aôm aŋga gamêŋ Aiguptuŋa gômôêŋ naŋ, tau tonec.” Aron gêlic gêŋ tonaŋ, go gêboa altar teŋ kêkô ŋakatu tau laŋônêmŋa ma kêsôm gebe “Eleŋŋa aêac talic om tatoc Apômtau saŋa teŋ.” Ma êsêac dêdi gêdêŋ bêbêc kanucgeŋ ma sêkêŋ daja to dawama. Ma lau sêŋgôŋ sic seŋ to sênôm gêŋ ma dêdi sa sebe sêŋgôm dôa-dôa.

Go Apômtau kêsôm gêdêŋ Mose gebe “Ôsêp ôna, gebe nêm lau, taŋ gôwê aŋga Aiguptu sêmêŋ naŋ, sêgôm tauŋ têtu sec. Êsêac sêkac tauŋ su sebeŋ aŋga intêna, taŋ kajatu êsêac gebe sêsaŋa naŋ. Êsêac sêmasaŋ bulimakao ŋalatu ŋakatu teŋ ŋa gold, taŋ gêwê naŋ, ma teteŋ mec to sêkêŋ da gêdêŋ gêŋ tau ma sêsôm gebe ‘O Israel, aômnêm anôtô, taŋ gêwê aôm aŋga Aiguptu gômôêŋ naŋ, tau tonec.’” Ma Apômtau kêsôm gêdêŋ Mose gebe “Aê galic lau tonaŋ ma kajala êsêac gebe lau gêsuŋtêkwa ŋatoŋ sec. 10 Amboac tonaŋ ôwi aê siŋ jamoa ŋoc tauŋa, gebe aê têtac ŋandaŋ ŋaja êkwanam êsêac. Tageŋ aôm, tec jakêŋ aôm ôtu lau-m kapôêŋ.”

11 Mago Mose keteŋ nê Apômtau Anôtô gebe “O Apômtau, êtu ageŋŋa aôm têmtac ŋandaŋ ŋaja enseŋ nêm lau, taŋ gôwê êsêac toŋaclai kapôêŋ ma lêmam ŋajaŋa sêsa aŋga gamêŋ Aiguptuŋa sêmêŋ naŋ su. 12 Amboac ondoc lau Aiguptu oc sêsôm gebe ‘Kec, eŋ kêsau êsêacgoc. Eŋ gêwê êsêac sêsa sêja, gebe ênac êsêac êndu aŋga lôc to enseŋ êsêac su aŋga nom ŋagamêŋ samob.’ Tec ôwi aôm têmtac ŋandaŋ kapôêŋ siŋ ma ônam nêm ŋalêlôm ôkwi ma ôŋgôm sec, taŋ gobe ôŋgôm êndêŋ nêm lau naŋ atom. 13 Taêm ênam nêm sakiŋwaga Abraham agêc Isak ma Jakob. Aôm kôtôc lêmam kêpi aôm taôm ma kôsôm gêdêŋ êsêac gebe ‘Aê gabe jakêŋ nêm wakuc têtu taêsam têtôm utitalata umboŋ ŋalabuŋa, ma gamêŋ samob, taŋ gajac mata gêdêŋ amac naŋ, aê gabe jakêŋ êndêŋ nêm wakuc êtu êsêacnêŋ nomlênsêm endeŋ tôŋgeŋ.’” 14 Amboac tonaŋ tec Apômtau gêjam nê ŋalêlôm ôkwi ma gêgôm sec, taŋ gebe êŋgôm êndêŋ nê lau naŋ atom.

15 Go Mose kêkac tau ôkwi ma kêsêp aŋga lôc gêja. Eŋ kêkôc biŋsu ŋapoc tapa luagêc. Apômtau keto biŋ kêsêp poc tapa makeŋ-makeŋ, keto kêsêp ŋamakeŋ nêmŋa to muŋa kêtôm taugeŋ. 16 Anôtô tau gêjam poc tapa tonaŋ ŋakôm, ma biŋ tau Anôtô keto. Eŋ tau kepeŋ ŋatalô kêsêp poc tapa. 17 Gêdêŋ taŋ Josua gêŋô lau sêjam lasê ŋakicsêa naŋ, eŋ kêsôm gêdêŋ Mose gebe “Siŋ ŋakicsêa kêpi aŋga gamêŋ becŋa.” 18 Mago Mose kêsôm gebe “Tonec wê siŋ atom, ma ŋacjo sêku êsêac tulu ŋataŋiboa atom amboac tonaŋgeŋ. Têtê wê ŋaonda tec gaŋô.” 19 Eŋ kêdabiŋ gamêŋ becŋa ma gêlic bulimakao ŋakatu to lau têtê wê, tec sep tageŋ Mose têtac ŋandaŋ kêsa ma kêbaliŋ poc tapa siŋ e popoc aŋga lôc ŋalabu. 20 Ma eŋ kêkôc bulimakao ŋakatu, taŋ êsêac sêmasaŋ naŋ, ma kêkêŋ ja geŋ to kêlêsim popoc, go kêpalip ŋataê kêsêp bu ma kêkêŋ gêdêŋ lau Israel sênôm.

21 Go Mose kêsôm gêdêŋ Aron gebe “Lau tonaŋ sêgôm asageŋ gêdêŋ aôm, tec gôgôm êsêac sêwê kaiŋ sec kapôêŋ amboac tonaŋ.” 22 Aron kêsôm gebe “O ŋatau, têmtac ŋandaŋ êsa atom. Aôm taôm kôjala gebe lau tonaŋ taêŋ gêjam secgeŋ. 23 Êsêac sêsôm gêdêŋ aê gebe ‘Ajôc, ômansaŋ ma anôtô teŋ, gebe êsêlêŋ êmuŋ aêac naŋ. Aêac ajam kauc asageŋ gêgôm Mose, ŋac tau, taŋ gêwê aêac aŋga Aiguptu amêŋ naŋ.’ 24 Ma aê kasôm gêdêŋ êsêac gebe ‘Lau samob, taŋ nêŋ gold gêc naŋ, sêkôc su.’ Tec êsêac sêkêŋ gêdêŋ aê, ma aê kabaliŋ kêpi ja gêja ma bulimakao ŋakatu tonaŋ mêŋkêsa.”

25 Mose gêlic gebe lau têtu meloc ma seseŋ ŋagôliŋ su, gebe Aron gêlôc sa, gebe sêsa lêŋ amboac tonaŋ e nêŋ ŋacjo sêmajec êsêac, 26 tec eŋ jakêkô gamêŋ becŋa ŋasacgêdô ma gêmôêc gebe “Asa lau sêsap Apômtau tôŋ. Asa andêŋ aê amêŋ.” Ma Lewinê wakuc samob sêkac sa dêdêŋ Mose sêja. 27 Ma eŋ kêsôm gêdêŋ êsêac gebe “Apômtau, Israelnêŋ Anôtô, nê biŋ tau tonec gebe Amac samob ajandiŋ ômbiŋkap tosiŋ, go asêlêŋ ana-amêŋ-ana-amêŋ aŋga gamêŋ becŋa ŋasacgêdô ŋasawa ma anac nêm lasitêwai to nêm lau ôlim andaŋ ma lau wacbaŋ amacŋa êndu.” 28 Lewinê wakuc sêgôm kêtôm Mosenê biŋ kêjatu êsêac. Ma gêdêŋ bêc tonaŋ lau amboac 3,000 sêjaŋa. 29 Ma Mose kêsôm gebe”Ocsalô tonec amac akêŋ latômi to nêm lasitêwai sêjô mec dabuŋwagaŋa gebe anam sakiŋ Apômtau, gebe eŋ ênam mec amac êndêŋ bêc tonec.”

30 Ŋageleŋ Mose kêsôm gêdêŋ lau gebe “Amac agôm sec kapôêŋ. Galoc aê gabe japi jandêŋ Apômtau jana. Moae jatôm gebe jaê wama eŋ, gebe êsuc nêm sec ôkwi.” 31 Amboac tonaŋ Mose gêmu gêdêŋ Apômtau gêja ma kêsôm gebe “Ojae, lau tonaŋ sêgôm sec kapôêŋanô. Êsêac sêmasaŋ nêŋ anôtô jaba ŋa gold. 32 Mago galoc aê jateŋ aôm, gebe ôsuc êsêacnêŋ sec ôkwi. Embe masi, go jateŋ aôm, gebe onseŋ ŋoc ŋaê aŋga nêm buku, taŋ koto naŋ, su.” 33 Apômtau gêjô Mose awa gebe”Lau samob, taŋ sêgôm sec gêdêŋ aê naŋ, oc janseŋ êsêacnêŋ ŋaê aŋga ŋoc buku su. 34 Galoc ôna ma ôwê lau sêna gamêŋ, taŋ kasôm ŋabiŋ gêdêŋ aôm naŋ. Ôlic acgom, ŋoc aŋela êsêlêŋ êmuŋ aôm. Mago êndêŋ ŋanoc janac êsêac kêsiŋa, oc jakêŋ ŋagêjô êjô nêŋ sec.”

35 Ma Apômtau kêkêŋ gêmac sec teŋ gêdêŋ lau kêtu teteŋ mec gêdêŋ bulimakao ŋalatu, taŋ Aron kêmasaŋ naŋ.

Copyright information for `JAE