Genesis 27

Jakob gêjam geŋgeŋ tamanê mec

Isak kêtu ŋamalacanô ma mataanô kêtu waô e gêlic gamêŋ kêtôm atom. Gêdêŋ tonaŋ eŋ gêmôêc nê ŋacsêga Esau ma kêsôm gêdêŋ eŋ gebe “Latucenec.” Ma eŋ gêjô eŋ awa gebe “Aê tec gamoa.” Ma eŋ kêsôm gebe “Gôlicgac me, aê katu ŋamalacanô sugac ma gajam kauc ŋoc bêc jamac ênduŋa. Tec ôkôc nêm waba gwadaŋa, nêm talam to sôb naôtap gwada sa aŋga saleŋ êtu aêŋa ma ômansaŋ gêŋ tau êtôm aê têtac êwiŋ, go ôkôc mêŋjaniŋ gebe janam mec aôm su acgom, go jamac êndu.”

Ma Rebeka taŋasuŋ gêjac biŋ, taŋ Isak kêsôm gêdêŋ latu Esau naŋ. Esau gêja saleŋ kêtu êkôc gwadaŋa su acgom, go Rebeka kêsôm gêdêŋ latu Jakob gebe “Aê gaŋô tamam kêsôm biŋ gêdêŋ têwam Esau gebe ‘Ôkôc gwada êtu aêŋa, mêŋômansaŋ gêŋ tau gebe janiŋ ma janam mec aôm êmuŋ jakô Apômtau laŋônêmŋa, go jamac êndu.’ Kêtu tonaŋŋa, latucenec, taŋam wamu ŋoc biŋ, tec jajatu aôm nec. Ôna ôkôc noniŋ ŋalatu kapoac luagêc aŋga ŋatoŋ mêŋjamansaŋ tamamnê gêŋ êtôm têtac êwiŋ 10 ma ôkêŋ êndêŋ tamam êniŋ gebe ênam mec aôm êmuŋ, go êmac êndu.” 11 Mago Jakob kêsôm gêdêŋ têna Rebeka gebe “Aôm gôlic gebe teoc Esau eŋ ŋac ôlilu amuc-amuc, mago aê ôlic selec. 12 Moae tamoc êmoasac aê e ênsaê gebe kasau eŋ ma êpuc boa aê êjô mec su.” 13 Têna kêsôm gêdêŋ eŋ gebe “Latucenec, biŋ êpuc boa aômŋa êpi aê. Aôm taŋam wamu ŋoc biŋ naôkôc gêŋ tau ômôêŋ.” 14 Tec eŋ gêja ma kêkôc gêŋ luagêc jakêkêŋ gêdêŋ têna. Ma têna kêmasaŋ gêŋ kêtôm tama têtac gêwiŋ. 15 Go Rebeka kêkôc ŋacsêga Esau nê ŋakwê omŋa, taŋ gêc tênanê andu naŋ, ma kêkêŋ gêdêŋ ŋac sauŋ Jakob kêsô. 16 Ma kêkwa Jakob lêma to gêsutêkwa auc ŋa noniŋ ŋaôlic. 17 Go kêkêŋ gwada to polom, taŋ eŋ kêmasaŋ naŋ, kêsêp latu Jakob lêma.

18 Ma eŋ kêsô gêdêŋ tama jakêsôm gebe “Tamoc.” Ma eŋ kêsôm gebe “Aê tec gamoa. Latucenec, aôm asa.” 19 Jakob kêsôm gêdêŋ tama gebe “Nêm ŋacsêga Esau aê. Aê gagôm biŋ, taŋ kôsôm gêdêŋ aê naŋ, ŋanô kêsa. Galoc ôndi sa ma ôniŋ ŋoc gwada gebe ônam mec aê.” 20 Mago Isak kêsôm gêdêŋ latu gebe “Latucenec, amboac ondoc, tec kôtap gwada sa sebeŋ.” Eŋ gêjô eŋ awa gebe “Ŋam gebe Apômtau, aômnêm Anôtô tau, kêkêŋ gêdêŋ aê.” Go Isak kêsôm gêdêŋ Jakob gebe 21 “Latucenec, ômôêŋmaŋ, gebe jamoasac aôm e jajala gebe latuc Esau aôm biŋŋanô me masi.” 22 Tec Jakob jakêsa tama Isak ŋagala. Eŋ kêmoasac eŋ ma kêsôm gebe “Awam kêtôm Jakob awa, mago lêmam kêtôm Esau lêma.” 23 Ma eŋ kêjala eŋ atom gebe lêma amuc-amuc kêtôm têwa Esau lêma, tec gêjam mec eŋ. 24 Eŋ kêsôm gebe “Aôm latuc Esau biŋŋanô me masi.” Eŋ gêjô eŋ awa gebe “Aê tau tonec.” 25 Go eŋ kêsôm gebe “Ôkêŋ gêŋ êndêŋ aê mêŋjaniŋ latucnê gwada ma janam mec aôm.” Tec eŋ kêkêŋ gêŋ gêdêŋ eŋ geŋ ma kêkêŋ wain gêdêŋ eŋ gênôm. 26 Go tama Isak kêsôm gêdêŋ eŋ gebe “Latucenec, mêŋôtu gasuc ma ôlêsôp aê.” 27 Ma eŋ kêtu gasuc to kêlêsôp eŋ. Ma Isak gêŋu ênê ŋakwê ŋamalu ma gêjam mec eŋ to kêsôm gebe

“Gôlicgac me, latucnê ŋamalu
kêtôm kôm, taŋ Apômtau gêjam mec naŋ,
ŋamalu gêjam saŋiŋ.
28 Anôtô êkêŋ maniŋ umboŋŋa êsêlô êpi aôm
to nom ŋalêsi ma polom to wain ŋanô lasê.
29 Eŋ êkêŋ tenteŋlatu sênam sakiŋ aôm
to laum sewec êndêŋ aôm.
Ôtu lasiminêŋ ŋatau
to tênam latui sewec êndêŋ aôm.
Aê japuc boa lau, taŋ sêpuc boa aôm
to janam mec êsêac, taŋ sênam mec aôm.”
30 Isak gêjam mec Jakob su ma Jakob gêwi tama Isak siŋ dambêgeŋ, ma têwa Esau aŋga saleŋ gêmêŋ. 31 Eŋ kêmasaŋ nê gwada amboac tonaŋ ma kêkêŋ gêdêŋ tama. Ma eŋ kêsôm gêdêŋ tama gebe “O tamoc, ôndi sa ma ôniŋ latômnê gwada gebe ônam mec aê.” 32 Tama Isak kêsôm gêdêŋ eŋ gebe “Aôm asa.” Eŋ gêjô eŋ awa gebe “Aôm latôm ŋacsêga aê, Esau.” 33 Go Isak kêtakê ŋanôgeŋ ma kêsôm gebe “Amboac ondoc, aôm gômôêŋ atomgeŋ ma asa kêtap gwada sa to kêkêŋ gêdêŋ aê gaeŋ ma gajam mec eŋ su. Biŋŋanô, mec kêpi eŋ sugac, oc êwê kaiŋ.” 34 Esau gêŋô tamanê biŋ tonaŋ ma kêwakic to kêtaŋ lasê ma kêsôm gêdêŋ tama gebe “O tamoc, ônam mec aê amboac tonaŋgeŋmaŋ.” 35 Mago eŋ kêsôm gebe “Lasim gêmêŋ kêbôli tau kêpi aôm ma kêjaŋgo aômnêm mec su.” 36 Ma Esau kêsôm gebe “Ac sê ênê ŋaê gebe Jakob jagêdêŋgeŋ gebe eŋ kêsau aê kêtu dim luagêc sugac. Eŋ kêjaŋgo ŋoc gêŋlênsêm ŋacsêgaŋa ma galoc eŋ kêjaŋgo ŋoc mec su gêwiŋ.” Go eŋ kêsôm gebe “Aôm kôgamiŋ mec teŋ kêtu aêŋa me masi.” 37 Isak gêjô Esau awa gebe “Ôlic acgom, aê kakêŋ eŋ kêtu nêm ŋatau ma kakêŋ lasii samob gêdêŋ eŋ gebe têtu ênê sakiŋwaga ma kakêŋ polom to wain gêdêŋ eŋ gêwê kaiŋ. O latucenec, aê janam aôm sa ŋa gêŋ amboac ondoc.” 38 Esau kêsôm gêdêŋ tama gebe “O tamoc, aômnêm mec tageŋgeŋ gêc me masi. O tamoc, ônam mec aê amboac tonaŋgeŋmaŋ.” Ma Esau gêôc awa sa ma kêtaŋ lasê.

39 Go tama Isak gêjô eŋ awa gebe
“Malam ôŋgôŋŋa ênêc jaêc kôm toŋalêsi
to gamêŋ maniŋ umboŋŋa êsêlô êsêpŋa.
40 Nêm siŋ êlôm aôm
ma ônam sakiŋ lasim.
Mago embe ôŋgôm ôtu wakac,
go bêc teŋ ônsaic ênê sakiŋ su
êkôniŋ aôm tôŋ êtiam atom.

Isak kêsakiŋ Jakob gêja Haran

41 Galoc Esau têtac gedec Jakob kêtu mec, taŋ kêtap sa aŋga tamanê naŋŋa. Ma Esau kêsôm gêdêŋ tau gebe “Bêc tataŋ taŋiboa êtu tamocŋa kêdabiŋ. Su, go janac lasic Jakob êndu.” 42 Rebeka gêŋô latusêga Esau nê biŋ tonaŋ ŋaboŋa, tec kêsakiŋ biŋ gêdêŋ ŋac sauŋ Jakob ma kêkalem eŋ ma kêsôm gêdêŋ eŋ gebe “Ôlic acgom, têwam Esau gebe êkac kamocgôc. Eŋ gebe ênac aôm êndu, tec kêkic aômnêm biŋ. 43 Kêtu tonaŋŋa, latucenec, taŋam wamu aê aoc. Ôndi ôêc ôndêŋ lucŋac Laban ôna Haran. 44 Ômoa ôwiŋ eŋ têm ŋagêdô e têwamnê ŋalêlôm êtu malô 45 e têtac ŋandaŋ êôŋ su ma êliŋ biŋ, taŋ gôgôm gêdêŋ eŋ naŋ siŋ, ocgo jasakiŋ biŋ êwac gebe ômu ômôêŋ. Êtu asageŋŋa amagêc lulugeŋ anaŋa awi aê siŋ êndêŋ bêc tageŋ.”

46 Ma Rebeka kêsôm gêdêŋ Isak gebe “Aê ôlic ŋakam kêtu lau gamêŋ Hetŋa nêŋ lauoŋa. Jakob embe ênam lau Hetŋa nêŋ awê teŋ êwiŋ êtôm laocoagêc, awê teŋ aŋga lau gamêŋ tonecŋa nêŋ, go aê jamoa nom êtu ageŋŋa.”

Copyright information for `JAE