Genesis 32

Jakob kêmasaŋ tau gebe êndac Esau

Ma Jakob kêkôc nê lêŋ sa amboac tonaŋ. Ma Anôtônê aŋela dêdac eŋ. Jakob gêlic êsêac ma kêsôm gebe “Anôtônê siŋwaga êsêac.” Tec kêsam gamêŋ tau ŋaê gebe Mahanaim.

Go Jakob kêsakiŋ nê lau jaeŋ sêmuŋ dêdêŋ têwa Esau sêja, taŋ gêŋgôŋ Edomnê gamêŋ Seir. Ma eŋ kêjatu êsêac gebe “Asôm êndêŋ ŋoc ŋatau Esau amboac tonec gebe Aômnêm sakiŋwaga Jakob kêsôm biŋ tonec gebe Aê gamoa gawiŋ Laban e mêŋgêdêŋ galoc. Ma aê katap bulimakao to doŋki ma bôc ŋatoŋ ma sakiŋwagao to ŋac sa. Ma galoc kakêŋ jaeŋ gêdêŋ ŋoc ŋatau gebe ôlic aê ŋajamŋa.”

Lau jaeŋŋa sêmu dêdêŋ Jakob sêja ma sêsôm gebe “Aêac aô lasê têwam Esau. Eŋ gêdi gebe êpuc aôm tôŋtôŋ to lau 400 sêwiŋ eŋ.” Tec Jakob kêtakê ŋanô ma gêmoa toŋalêlôm ŋatutucgeŋ ma gêwa lau, taŋ sêwiŋ eŋ naŋ, ma bôc ŋatoŋ to bulimakao ma kamele kêkôc gêja toŋ luagêc. Eŋ taê gêjam gêc tauŋa gebe “Esau embe êndac toŋ teŋ ma enseŋ su, go toŋ teŋ gacgeŋ sêc sêna.”

Ma Jakob kêsôm gebe “O tamoc Abraham nê Anôtô ma tamoc Isak nê Anôtô, o Apômtau, aôm kôsôm gêdêŋ aê gebe ‘Ômu ôna nêm gamêŋ to nêm gôlôac ma aê gabe jamoasiŋ aôm.’ 10 Aê gêŋ ŋaôma nec katôm nêm moasiŋ to nêm biŋ ŋaŋêŋ, taŋ kôkêŋ gêdêŋ nêm sakiŋwaga aê naŋ atom. Aê galom bu Jordan tonec tec kamêgôm ŋoc tôcgeŋ ma galoc katu toŋ luagêc. 11 Aê jateŋ aôm gebe ônam aê kêsi êndêŋ teoc Esau lêma, gebe aê katêc eŋ. Moae êmêŋ e ênac aêac samob êndu, enseŋ teneŋi to nêŋ gôlôac êtômgeŋ. 12 Mago aôm kôsôm gebe ‘Aê gabe jamoasiŋ aôm to jakêŋ nêm wakuc têtôm gaŋac gwêcŋa, taŋ lau teŋ sêsa sa têtôm atom.’”

13 Ma eŋ gêmoa ônê gêdêŋ gêbêc tonaŋ ma kêkôc nê gêŋ samob, taŋ kêtap sa naŋ, ŋagêdô su gebe êwi siŋ êndêŋ têwa Esau ŋaôma. 14 Eŋ kêkôc noniŋ têna 200 to kapoac 20 ma domba 200 to kapoac 20, 15 ma kamela 30 tonêŋ ŋalatugeŋ, taŋ sênôm su naŋ, bulimakao tana 40 to kapoac 10, doŋki têna 20 to kapoac 10. 16 Bôc totoŋ-totoŋ tonaŋ eŋ kakêŋ sêsêp sakiŋwaga lemeŋ gêdêŋ-gêdêŋgeŋ ma kêsôm gêdêŋ nê sakiŋwaga gebe “Amac amuŋ aê ma akêŋ ŋasawa êsi tau êniŋ toŋ êndêŋ-êndêŋ-geŋŋa êŋgic êtômgeŋ.” 17 Eŋ kêjatu ŋac ŋamataŋa gebe “Teoc Esau embe êndac aôm ma êtu kênac aôm gebe ‘Aômnêm ŋatau asa. Aôm ôna ondoc. Gêŋ, taŋ gêmuŋ aôm naŋ asanê,’ 18 go ôsôm gebe ‘Êsêac têtu nêm sakiŋwaga Jakobnê gêŋ. Eŋ gebe êkêŋ gêŋ tau êndêŋ ŋoc ŋatau Esau ŋaômageŋ. Eŋ tau kêdaguc aêac.’” 19 Eŋ kêjatu biŋ tonaŋgeŋ gêdêŋ ŋac kêtu luagêcŋa to têlêacŋa ma êsêac samob, taŋ têdaguc bôc ŋatoŋ gêdêŋ-gêdêŋgeŋ naŋ. “Amac embe andac Esau, go asôm biŋ tageŋ tonaŋgeŋ êndêŋ eŋ 20 ma asôm teŋ tonec êwiŋ gebe ‘Nêm sakiŋwaga Jakob kêdaguc aêac.’” Jakob taê gêjam gebe “Aê jaê wama eŋ ŋa gêŋ, taŋ gabe jakêŋ ŋaômageŋ êndêŋ eŋ naŋ, êmuŋ acgom, go jalic eŋ laŋôanô êtu ŋamu. Moae êkôc aê sa.” 21 Tec gêŋ, taŋ gebe êkêŋ ŋaômageŋ êndêŋ Esau naŋ, kêsêlêŋ gêmuŋ eŋ ma eŋ tau gêmoa bec ŋamala gêdêŋ gêbêc tonaŋ.

Jakob agêc ŋac teŋ sêmônaŋ tauŋ aŋga Peniel

22 Gêdêŋ gêbêc tonaŋgeŋ Jakob gêdi ma kêkôc nê awêagêc to nê sakiŋwagaoagêc ma nê gôlôac 11 gebe selom buseleŋ Jabok. 23 Eŋ kêkôc êsêac ma kêsakiŋ êsêac selom bu tonê gêŋ ŋagêdô amboac tonaŋgeŋ. 24 Ma eŋ taugeŋ gêmoa ŋamakeŋ. Ma ŋac teŋ jaagêc sêmônaŋ tauŋ e gêu bôŋ. 25 Gêdêŋ taŋ ŋac tau gêlic gebe oc êku Jakob tulu êtôm atom naŋ, kêtap Jakob kêsêp magi e magi kêsu gêdêŋ agêc sêmônaŋ tauŋ sêmoa naŋ. 26 Ma eŋ kêsôm gebe “Ôwi aê siŋ gebe gêu bôŋgac.” Mago Jakob kêsôm gebe “Aê jawi aôm siŋ atom e ônam mec aê êmuŋ acgom.” 27 Ma ŋac tau kêsôm gêdêŋ eŋ gebe “Nêm ŋaê amboac ondoc.” Ma eŋ kêsôm gebe “Jakob.” 28 Go eŋ kêsôm gebe “Sêsam aôm gebe Jakob êtiam atom, sêsam aôm gebe Israel, gebe aôm gôjac siŋ gêdêŋ Anôtô to ŋamalac ma kôku êsêac tulu.” 29 Ma Jakob kêtu kênac eŋ gebe “Ôsam nêm ŋaê êndêŋ aê.” Mago eŋ kêsôm gebe “Aôm kôtu kênac ŋoc ŋaê kêtu asageŋŋa.” Ma eŋ gêjam mec Jakob aŋga tônê. 30 Go Jakob kêsam gamêŋ tau ŋaê gebe Peniel ma kêsôm gebe “Aê laŋôcanô gêdêŋ Anôtô laŋôanô ma gacgeŋ gamoa tomatoc jaligeŋ.” 31 Gêdêŋ taŋ kêka lêlêc Peniel naŋ, oc kêpi. Ma eŋ kêka gwecgeŋ gêja kêtu magiŋa. 32 Kêtu tonaŋŋa lau Israel seŋ bôc ŋalabu atom e mêŋgêdêŋ galoc gebe ŋac tau kêtap Jakob kêsêp magi.

Copyright information for `JAE