Genesis 39

Josep gêjam sakiŋ Potipar

Ma êsêac sêkôc Josep sêsêp Aiguptu sêja ma Paraonê kasêga teŋ, ŋac Aiguptuŋa Potipar, taŋ gejob siŋwaga toŋ teŋ naŋ, gêjam ôli eŋ aŋga lau Ismael, taŋ sêkôc eŋ gêja ônê naŋ nêŋ. Apômtau gêwiŋ Josep, tec gêjam kôm samob toŋanôgeŋ gamoa nê ŋatau, ŋac Aiguptuŋa, nê andu. Ma ênê ŋatau gêlic gebe Apômtau gêwiŋ eŋ ma kêmoasiŋ eŋ, tec gêgôm gêŋ samob ŋapep sawa. Kêtu tonaŋŋa eŋ gêlic eŋ ŋajam ma kêkêŋ eŋ kêtu tau nê sakiŋwaga ma eŋ gêgôm eŋ kêtu ênê andu ŋagejobwagasêga ma kêkêŋ eŋ gejob ênê waba samob. Gêdêŋ têm taŋ eŋ kêkêŋ eŋ kêtu andu to êna waba samob ŋagejobwagasêga naŋ, Apômtau gêjam mec ŋac Aiguptuŋa nê andu kêtu Josepŋa. Apômtau gêjam mec ênê waba samob aŋga andu to kôm kêtômgeŋ. Kêtu tonaŋŋa eŋ kêkêŋ gêŋ samob kêsêp Josep lêma ma taê kêka eŋgeŋ, gê go tau kêtu nê gêŋ ŋagêdôŋa atomanô, nê gêŋ êniŋŋa tageŋ, tec tau gejob.

Josep eŋ ŋac ŋajam ma ŋac tolaŋô.
Têm ŋagêdô gêjaŋa, tec ênê ŋataunê awa mata ola Josep ma kêsôm gebe “Mêŋônêc ôwiŋ aê.” Mago eŋ gedec ma kêsôm gêdêŋ nê ŋataunê awê gebe “Ôlic acgom, ŋoc ŋatau taê kêka aêgeŋ ma gê go tau nê andu ŋagêŋlêlôm teŋŋa atom ma eŋ kêkêŋ gêŋ samob kêsêp aê lemoc. Eŋ ŋac kapôêŋ kêlêlêc aê aŋga andu tonec atom ma kêgamiŋ gêŋ teŋ gêdêŋ aê atom, aôm taômgeŋ gebe aôm kôtu ênê awê. Tec aê jaŋgôm gêŋ alôb-alôb kapôêŋ tonec ma jaŋgôm sec êndêŋ Anôtô êtu asageŋŋa.” 10 Eŋ kêsôm biŋ gêdêŋ Josep katôm bêcgeŋ, mago eŋ kêkêŋ taŋa awê atom ma gêc to gêmoa gêwiŋ eŋ atom. 11 Bêc teŋ Josep jakêsô andu gebe ênam nê kôm ma ŋac teŋ gêmoa andu ŋalêlôm gêwiŋ atom. 12 Tec awê gê ênê ŋakwê tôŋ ma kêsôm gebe “Ônêc ôwiŋ aê.” Mago eŋ gêwi nê ŋakwê siŋ kêsêp eŋ lêma ma gêc kasa aŋga andu gêja. 13 Ma gêdêŋ taŋ awê gêlic eŋ gawi nê ŋakwê siŋ kêsêp eŋ lêma ma gêc kêsa aŋga andu gêja naŋ, 14 eŋ gêmôêc nê sakiŋwaga ma kêsôm gêdêŋ êsêac gebe”Alic acgom, ŋoc ŋatau kêkêŋ ŋac Ebolaiŋa teŋ gêmoa gêwiŋ aêac gebe êŋgôm aêac majeŋ êsa. Eŋ kêsô gêdêŋ aê gamêŋ gebe ênêc êwiŋ aê. Mago aê gamôêc aoc kapôêŋ. 15 Eŋ gêŋô aê kawakic to gamôêc, tec gedec nê ŋakwê gêcŋa ma gêc kêsa aŋga andu gêja.” 16 Go awê ketoc Josepnê ŋakwê gêc gêwiŋ eŋ e nê ŋatau gêmu gamêŋ. 17 Ma eŋ gajac miŋ biŋ tonaŋgeŋ gêdêŋ eŋ ma kêsôm gebe “Sakiŋwaga Ebolaiŋa, taŋ kôkêŋ eŋ gêmoa gêwiŋ aêac naŋ, kêsô gamêŋ gebe aŋgôm aê majoc êsa. 18 Mago gêdêŋ taŋ aê kawakic to gamôêc naŋ, eŋ gedec nê ŋakwê gêcŋa ma gêc kêsa aŋga andu gêja.”

19 Ênê ŋatau gêŋô biŋ, taŋ nê awê kasôm gêdêŋ eŋ naŋ, gebe “Aômnêm sakiŋwaga gêgôm aê amboac tonaŋ,” tec eŋ têtac ŋandaŋ kêsa. 20 Ma eŋ kêkôc Josep gêja ma kêbaliŋ eŋ kêsêp kapoacwalô, gamêŋ, taŋ kiŋnê lau kapoacwalôwaga sêŋgôŋ naŋ. Ma eŋ gêŋgôŋ kapoacwalô tonaŋ. 21 Mago Apômtau gêwiŋ Josep e lau têntac gêwiŋ eŋ ma kapoacwalô ŋagejobwaga gêlic eŋ ŋajam. 22 Ma kapoacwalô ŋagejobwaga kêkêŋ lau kapoacwalôŋa samob, taŋ sêŋgôŋ kapoacwalô naŋ, sêsêp Josep lêma. Ma kôm samob, taŋ sêgôm naŋ, eŋ kêtu ŋatau. 23 Kapoacwalô ŋagejobwaga gê go tau kêtu kôm, taŋ kêsêp Josep lêma naŋŋa, atomanô, gebe Apômtau gêwiŋ Josep ma kêmoasiŋ ênê kôm samob e ŋapep sawa.

Copyright information for `JAE