Genesis 45

Josep gêwa tau sa

Ma Josep kêkô lau samob laŋôŋnêmŋa e kêpuc tau tôŋ jageo. Tec eŋ gêmôêc gebe “Lau samob sêwi aê siŋ sêsa sêna.” Amboac tonaŋ gêdêŋ taŋ Josep gêwa tau sa gêdêŋ lasitêwai naŋ, lau teŋ sêmoa sêwiŋ êsêac atom. Ma eŋ kêtaŋ lasê e lau Aiguptu sêŋô ma Paraonê lau sêŋô ŋawae amboac tonaŋgeŋ. Ma Josep kêsôm gêdêŋ nê lasitêwai gebe “Aê Josep. Tamoc gêŋgôŋ mata jali me masi.” Mago lasitêwai sêjô eŋ awa kêtôm atom, gebe eŋ kêtakê êsêac ŋanôgeŋ.

Tec Josep kêsôm gêdêŋ nê lasitêwai gebe “Atu gasuc aêmaŋ.” Ma êsêac dêdêŋ eŋ sêja. Ma eŋ kêsôm gebe “Lasimi aê Josep, taŋ akêŋ aê gadêŋ lau Aiguptu sêjam ôli aê. Mago galoc têmtac ŋawapac atom to amoa tonêm ŋalêlôm ŋatutuc êtu akêŋ aê gadêŋ lau tonec sêjam ôli aêŋa atom, gebe Anôtô kêsakiŋ aê gamuŋ amac gebe ênam amac kêsi aŋgôŋ matem jali. Tôbôm gêc gamêŋ tau jala luagêc su. Ma jala lemeŋ teŋ gacgeŋ gêc taŋ lau sêsap nom ma sejoŋ kôm ŋanô sa atom. Ma Anôtô kêsakiŋ aê gamuŋ amac gebe janam amacnêm ŋagêdô kêsi aŋga nom ma jajop lau taêsam sêŋgôŋ mateŋ jali êtu amacŋa. Kêtu tonaŋŋa amac asakiŋ aê gamêŋ tonec atom, Anôtô taugeŋ. Eŋ kêkêŋ aê katu Parao tama to ênê andu ŋatau ma gamêŋ Aiguptuŋa samob ŋagôliŋwaga. Andi ŋagaôgeŋ. Andêŋ tamoc api ana ma asôm êndêŋ eŋ gebe ‘Latôm Josep kêsôm biŋ amboac tonec gebe Anôtô kêkêŋ aê katu gamêŋ Aiguptuŋa samob ŋatau. Ôsêp ôndêŋ aê ômôêŋ ma ônam gamêŋ tôŋ atom. 10 Aôm ôŋgôŋ gamêŋ Gosen ma ômoa aê ŋagala, aôm to nêm gôlôac ma nêm gôlôacnêŋ gôlôac ma nêm domba to bulimakao ma gêŋ samob, taŋ kêtu aômnêm naŋ. 11 Aê gabe janam aôm sa aŋga tonec e aôm to nêm lau ma gêŋ samob, taŋ kêtu aômnêm naŋ, apô lêna taôm êtu gêŋ teŋŋa atom, gebe tôbôm ênêc jala lemeŋ teŋ êwiŋ.’ 12 Ma galoc amac matemanô alic to lasic Benjamin mataanô gêlic amboac tonaŋgeŋ gebe aê tauc aocsuŋ kasôm biŋ gêdêŋ amac. 13 Anac miŋ ŋoc ŋawasi aŋga gamêŋ Aiguptuŋa to gêŋ, taŋ alic naŋ, ŋawae êndêŋ tamoc. Andi ŋagaôgeŋ ma akôc tamoc êsêp gamêŋ tonec êmêŋ.” 14 Ma agêc lasi Benjamin sêmbôêŋ tauŋ ma têtaŋ kêpi tauŋ. 15 Ma eŋ kêlêsôp têwai samob ma kêmbôêŋ êsêac to kêtaŋ. Su, go lasitêwai sêjam biŋgalôm sêwiŋ eŋ.

16 Gêdêŋ taŋ sêŋô ŋawae aŋga Paraonê andu gebe Josepnê lasitêwai sêmêŋ naŋ, Parao to nê sakiŋwaga sêŋô ŋajamgeŋ. 17 Ma Parao kêsôm gêdêŋ Josep gebe “Ôsôm êndêŋ nêm lasitêwai gebe Aŋgôm amboac tonec gebe akêŋ nêm waba ênsac nêm bôc ŋaô ma amu ana gamêŋ Kanaan. 18 Ma akôc tamemi to nêm gôlôac samob andêŋ aê amêŋ ma aê gabe jakêŋ Aiguptu ŋagamêŋ ŋajamanô tau êndêŋ amac gebe aniŋ nom tonaŋ ŋaŋalêsi. 19 Ôjatu êsêac amboac tonec êwiŋ gebe Aŋgôm tonec gebe Akôc kareta aŋga gamêŋ Aiguptuŋa êtu nêm ŋasec-ŋasec to nêm lauoŋa ma akôc tamemi amêŋmaŋ. 20 Ma taêm walô nêm waba anduŋa atom, gebe Aiguptu ŋagamêŋ ŋajamanô tau êtu amacnêm.”

21 Ma Israel latui sêgôm kêtôm tonaŋ, go Josep kêkêŋ kareta gêdêŋ êsêac kêtôm Paraonê jatu ma kêkêŋ mo gebe êpuc êsêac tôŋ aŋga intênaŋa. 22 Eŋ kêkêŋ ŋakwê omŋa tageŋ-tageŋ gêdêŋ êsêac samob kêtômgeŋ, Benjamin taugeŋ tec kêkêŋ silber ŋadôŋ 300 to ŋakwê omŋa lemeŋ teŋ gêdêŋ eŋ. 23 Eŋ kêsakiŋ gêŋ amboac tonec gêdêŋ tama gêja gebe doŋki kapoac 10 togêŋ mata êjam Aiguptuŋa ma doŋki têna 10 topolom ma mo to gêŋ taniŋŋa êtu êpuc tama tôŋ aŋga intênaŋa. 24 Go kêsakiŋ lasitêwai sêja ma gêdêŋ taŋ kêkam êsêac lemeŋ naŋ, kêsôm gêdêŋ êsêac gebe “Asôm taôm aŋga intêna atom.” 25 Tec êsêac sêwi Aiguptu siŋ sêpi gamêŋ Kanaan jasêô lasê dêdêŋ tameŋi Jakob. 26 Ma êsêac sêjac miŋ gêdêŋ eŋ gebe “Josep gêŋgôŋ mata jali ma eŋ kêtu gamêŋ Aiguptuŋa samob ŋagôliŋwaga.” Mago têtac kêkac eŋ atom, gebe eŋ kêkêŋ gêwiŋ êsêac atom. 27 Mago gêdêŋ taŋ sêjac miŋ Josepnê biŋ samob, taŋ kêsôm gêdêŋ êsêac naŋ, gêdêŋ eŋ ma gêdêŋ taŋ eŋ gêlic kareta, taŋ Josep kêsakiŋ gebe êkôc eŋŋa naŋ, tec tameŋi Jakob têtac kêpô su ma nê ŋalêlôm gêdi sa kêtiam. 28 Ma Israel kêsôm gebe “Kêtômgac. Latuc Josep gêŋgôŋ mata jali. Aê gabe najalic eŋ acgom, go jamac êndu.”

Copyright information for `JAE