Hosea 14

Hosea gêlêŋ biŋ lau Israel

O Israel, ômu ôndêŋ Apômtau, aômnêm Anôtô, ôna gebe nêm sec gêgôm aôm gôjac taôm êndu. Ômu ôndêŋ Apômtau ôna ma ôkôc biŋ tonec êwiŋ. Ôsôm êndêŋ eŋ gebe “Ôsuc ma keso samob ôkwi gebe ŋalêlôm ŋajam êsa ma akêŋ aweŋsuŋ ŋalambiŋ êtu da êndêŋ aôm. Asuria ênam aêac sa atom. Aêac naapi aŋgôŋ hos ŋaô atom. Ma aêac oc asôm êndêŋ lemeŋ ŋakôm gebe ‘Aêacnêŋ Anôtô’ naŋ êtiam atom gebe aôm taômgeŋ taêm walô mosêbu.”

Apômtau gêjac mata moasiŋ wakuc gêdêŋ Israel

“Aê gabe jaŋgôm êsêacnêŋ gêmac sêwi aê siŋŋa ŋajam êsa. Aê oc têtac êwiŋ êsêac janac ŋawaegeŋ gebe ŋoc têtac ŋandaŋ kêkac tau su aŋga êsêacnêŋ. Aê oc jatôm maniŋ êndêŋ lau Israel. Nêŋ ŋaola ênac lêtêŋ amboac mênamiŋ ma nêŋ ŋawakac êsêlêŋ êsêp nom amboac kaleloŋ ŋawakac. Êsêacnêŋ ŋasêli oc esewec, nêŋ ŋakatu amboac katêkwi ŋakatu ma. nêŋ ŋamalu amboac môsê Lebanonŋa. Êsêac oc sêmu sêmêŋ sêŋgôŋ aêŋoc ajuŋlabu êtiam. Êsêac oc têtôm amboac kôm ŋajam teŋ ma sênam ŋaola amboac kôm wainŋa teŋ. Ma nêŋ wain ŋanô êtu wain towae amboac wain Lebanonŋa. O lau Israel, aêagêc gwam ma asageŋ ŋagêdô gêdêŋ tauŋ. Aê taucgeŋ jajô aômnêm biŋ ma janam jaom aôm. Aê katôm ka, naŋ ŋalauŋ ŋamajaŋ ŋapaŋ ma nêm moasiŋ samob gêmêŋ aŋga aêgeŋ.”

Asa kêtu ŋac tokauc gebe êjala gêŋ tonec. Asanê kauc kêsa gebe êlic gêŋ tonec. Apômtaunê intêna solop ma laugêdêŋ oc sêsa intêna tau, mago lau alôb-alôb oc sênac tauŋ êndu.

Copyright information for `JAE