Isaiah 35

Anôtô kêmasaŋ nê lau têtu wakuc

Gamêŋ gasaŋ to gamêŋ ŋakeleŋ oc têntac ŋajam
ma gamêŋ sawa oc êtu samuc ma ŋaola ênac lêtêŋ amboac mênamiŋ.
Ŋaola êsa ênam aucgeŋ
ma gamêŋ tau oc êtu samuc ma ênam wê totêtac ŋajamgeŋ.
Ma sêkêŋ Lebanon ŋaŋawasi
ma Karmel to Saron ŋagêlôŋ êndêŋ gamêŋ tau.
Êsêac oc sêlic Apômtaunê ŋawasi
ma Anôtônê ŋawasi kiŋŋa.

Aŋgôm lemem, taŋ kêtu palê naŋ, ŋajaŋa êsa
to aŋgôm emduc, taŋ kêtu goloŋ naŋ, ŋajam êsa.
Asôm êndêŋ lau tonêŋ ŋalêlôm ŋatutuc gebe
“Akô ŋajaŋa ma atêc taôm atom.
Alic acgom, nêm Anôtô oc êmêŋ êtu êkac kamocgôc
to êkêŋ ŋagêjôŋa ma ênam amac kêsi.”

Go mateŋpêc mateŋ êlac
ma taŋeŋsuŋbic taŋeŋsuŋ êpoa lasê.
Go magiŋ kêsu sêmboaŋ sa têtôm mojawa
ma aweŋmê sênam wê lambiŋŋa,
gebe bumata oc êu lasê êsa gamêŋ gasaŋ
to bu kapôêŋ êsa gamêŋ sawa.
Kekop ŋandaŋ oc êtu bugêjactoŋ
ma bumata oc êpulu aŋga nom gelo-gelo,
ma gêgwaŋ to ôpic ma siŋ êpi aŋga kêam gamêŋ sawaŋa maleŋ.

Ma intênasêga teŋ oc ênêc tonec,
ma sêsam intêna tau gebe “Intêna dabuŋ.”
Lau môpŋa sêsêlêŋ sêsa tonaŋ atom,
ma lau meloc sêmoa intêna tau atom.
Lewe teŋ oc êmoa tônê atom
ma bôclai teŋ oc êsêlêŋ êmoa intêna tau atom,
oc tatap êsêac sa sêmoa tônê atom,
lau taŋ Apômtau gêjam êsêac kêsi naŋgeŋ, oc sêsêlêŋ intêna tau.
Ma êsêac, taŋ Apômtau kêgaboac
su naŋ, oc sêmu sêmêŋ
mêŋsêô lasê Sion towêgeŋ.
Têntac ŋajam teŋgeŋŋa oc ênsac êsêac ŋaô
têntac ŋajam to têntac ŋagaô oc ênam êsêac auc
ma gêŋwapac to taŋiboa oc êwi êsêac siŋ.
10  36:1 —39:8 Lau Asuria nêŋ kiŋ Sanherib gêwê nê siŋwaga sêô lasê gamêŋ Judaŋa ŋamiŋ kêsêp môkêlatu tonec. Mago Anôtô gêjam malac Jerusalem sa ŋa lêŋ kaiŋ teŋ. Kiŋ Hiskia kêtap gêmac kapôêŋ sa, mago ôli ŋajam kêsa kêtiam.

Copyright information for `JAE