Isaiah 54

Apômtau têtac gêwiŋ Israel gedeŋ tôŋgeŋ

Apômtau kêsôm gebe

“O awê kapoac, taŋ kôkôc ŋapalê atom naŋ, ôpuc wê sa.
Aôm awê, taŋ ŋapalê kêtuŋ aôm atom naŋ, ônam wê toôndugeŋ ma têmtac ŋajam êsa.
Gebe awê sawa nê ŋapalê taêsam kêlêlêc awê toŋac nê su.
Ônac têku nêm andu
ma ôŋgôm nêm balêm ênac tau jaê,
ôŋgamiŋ salôm to waba anduŋa atom.
Gebe aôm oc ôtu taêsam ma ônam gamêŋ, taŋ gêc nêm anô to gasêŋa naŋ auc.
Ma nêm wakuc oc sêwê kaiŋ tenteŋlatu têtu nêŋ gêŋlênsêm
to sêŋgôŋ malac gasaŋ samob auc.

“Ôtêc taôm atom, gebe sêŋgôm aôm majam êsa atom.
Ma têmbêlam ŋawapac êsa êtu sêsu aôm susuŋa atom.
Gebe gêŋ, taŋ gêgôm aôm majam kêsa gêdêŋ aôm ŋapalêgeŋ naŋ, oc ôliŋ siŋ
ma taêm ênam kôtu awêtuc ŋabiŋ wapac êtiam atom.
Gebe ŋac, taŋ kêkêŋ aôm naŋ, kêtu nêm akweŋ,
nê ŋaê gebe Lausiŋ undambêŋa nêŋ Apômtau.
Ma Israelnêŋ ŋac dabuŋ kêtu nêm kêsiwaga,
sêsam eŋ gebe Nom samucgeŋ ŋaAnôtô.
Gebe Apômtau gêmôêc aôm
amboac gêmôêc awê, taŋ nê akweŋ gêwi eŋ siŋ ma gêŋgôŋ toŋalêlôm ŋawapacgeŋ naŋ,
ma amboac awê, taŋ ŋac wakuc kêtiŋ eŋ su naŋ.
Nêm Anôtônê biŋ tau tonec.
Aê gawi aôm siŋ têlageŋ,
mago taêc walô aôm ŋanô, tec jajoŋ aôm sa êtiam.
Aê têtac ŋandaŋ sec, tec gasaŋ laŋôcanô auc gêdêŋ aôm têlageŋ,
mago kêtu aêŋoc têtac gêwiŋ teŋgeŋŋa aê oc taêc walô aôm.
Apômtau, nêm kêsiwaga, nê biŋ tau tonec.

“Aê galic têm tonec kêtôm Noanê bêc.
Aê katôc lemoc gebe Noanê bu êsuŋ gamêŋ sa êtiam atom,
tec aê katôc lemoc amboac tonaŋgeŋ gebe oc têtac ŋandaŋ êndêŋ aôm
to jaec biŋ aôm êtiam atom.
10 Lôc oc êc su ma gamêŋ ŋabau oc ŋawiwic-êsa,
mago ŋoc têtac gêwiŋ teŋgeŋŋa oc êwi aôm siŋ atom
ma ŋoc poac wamaŋa oc ŋawiwic êsa atom.
Apômtau taŋ taê walô aôm naŋ, nê biŋ tau tonec.”

Jerusalem wakuc

11 “Aôm taŋ gômoa jageo ma gamêŋ kêlaŋgaŋ aôm
ma teŋ gêjac aôm têmtac tôŋ atom naŋ,
ôlic acgom, aê jakêŋ nêm alê êkô poc ŋaô
ma jau nêm demboŋ ênsac pocawa ŋaô.
12 Aê oc jamansaŋ nêm bôcdêmôê ŋa pocawa kokoc
to nêm katam ŋa pocawa ŋaôsic-ôsic
ma nêm sagiŋ samob ŋa poc ŋawasi tokaiŋ-tokaiŋ.
13 Apômtau tau oc êndôŋ nêm latômi samob
ma nêm wakuc oc têtap kôm ŋamoasiŋ kapôêŋ sa.
14 Aôm oc ôkô biŋgêdêŋ ŋaô.
Lau teŋ oc sêkôniŋ aôm tôŋ atom, tec ôtêc taôm atom.
Ma gêŋ êtakê aômŋa oc êndambiŋ aôm atom, oc ênac jaê aôm.
15 Lau teŋ embe sêkêŋ kisa êndêŋ aôm, naŋ ŋam êsêp aê atom
ma aôm taôm oc ôku ŋac, taŋ ênac siŋ êndêŋ aôm naŋ tulu.
16 Ôlic acgom, aê kakêŋ ŋac-kêpac-kiwaga, taŋ gêguc ja
gebe êmansaŋ waba siŋŋa naŋ,
ma kakêŋ ŋac, taŋ enseŋ waba tau su naŋ, amboac tonaŋ.
17 Waba siŋŋa, taŋ sêmasaŋ gebe sênac aômŋa naŋ, ŋateŋ êpi aôm atom
ma lau, tan têtiŋ biŋ êpi aôm naŋ,
aôm oc ôwa êsêacnêŋ dansaŋ sa êndêŋ noc mêtôcŋa.
Gêŋ tonaŋ kêtu Apômtaunê sakiŋwaganêŋ gêŋlênsêm
ma kêtu moasiŋ, taŋ kakêŋ gêdêŋ êsêac naŋ.
Apômtaunê biŋ tau tonec.”
Copyright information for `JAE